'MSITUKANANE, UCHAGUZI UTAPITA NCHI ITABAKI'

NA DOTTO MADUHU, MWANZA

WANANCHI wametakiwa kutogombana na kutoleana lugha ya matusi kwa sababu uchaguzi mkuu utapita na nchi itabaki.

Wito huo ulitolewa juzi na Mwenyekiti wa Umoja wa Vijana CCM (UVCCM) Wilaya ya Ilemela, Herry James, katika mkutano wa kampeni wa kumnadi mgombea udiwani wa Kata ya Nyamanoro kwa tiketi ya CCM, uliofanyika katika uwanja wa Ghana.

Alisema kugombana kwa ajili ya siasa husababisha wahusika kupata ulemavu, kufungwa na kupoteza maisha huku wanasiasa wakiendelea kula raha bila kuwakumbuka wahusika.

James alisema wanasiasa wengi ni waigizaji na hawana uadui wa kudumu zaidi ya siasa, lakini katika maisha ya kawaida ni marafiki na wanashirikiana katika mambo mbalimbali na kuwaacha wananchi wasiojua wakikwazana kivyao.

"Ngoja niwaambie ndugu zangu, siasa hazina uadui wa kudumu, kwani viongozi wengi katika maisha ya kawaida wanashirikiana, mfano, kuna kiongozi mmoja kwa miaka minane alituhumiwa na kuchafuliwa na chama kimoja cha siasa nchini, lakini sasa wanakaa meza moja na kula pamoja huku wananchi mkibaki na alama ya mshangao,” alisema.

Aliwaomba wananchi kujitokeza kwa wingi kupigakura ifikapo Oktoba 25, mwaka huu, bila kufanya vurugu kwa kuwa matokeo yote watakuwa nayo mawakala wa vyama.

Alisema ni vyema wafanye hivyo ili kujiepusha kupata ulemavu, kufungwa na kupoteza maisha kwa ajili ya wanasiasa ambao hawawezi kuwakumbuka.

Naye Katibu wa Siasa na Uenezi wa Kata ya Kirumba, Wessa Juma, aliwaomba wananchi hususan vijana kutokubali kutumika kama chambo kisiasa kwa kuwa watu wengi wamepoteza maisha na kubaki na ulemavu sambamba na kufungwa huku familia zao zikibaki masikini na wahusika wanaendelea kuishi salama.

“Kuna matukio tofauti yanayohusika na vurugu za kisiasa yalitokea hapo nyuma nchini huku vijana wengi wakitumika na baadhi yao wakipoteza maisha, kuwa walemavu na wengine wapo magerezani wakipata tabu, ingawa wanasiasa waliokuwa wanawatetea hawawajali,” alisema Juma.