KINGUNGE NA TABIA YA FUATA NYUKI ULE ASALI

Na John Kiroboto

UPO usemi wa Kiswahili unaosema kwamba ‘mwonja asali huchonga mzinga’. Maana yake ni kwamba mtu akishapata tamu hutaka aendelee kuwa nayo zaidi na zaidi. Ndiyo sababu hata nzi akishatua kwenye kinyesi au kidonda huwa radhi kufia hapo.

Tabia hiyo iko hata kwa binadamu wenye uchu wa kupata na kuishi maisha mazuri na kutaka aendelee kuwa hapo hata kwa gharama ya kupoteza maisha ya mwenzake. Tumeshuhudia matajiri wakipitia njia hizo na kuwa tayari kuangamiza wengine.

Yupo mfanyabiashara nchini ambaye alipata kuapa kuwa amepata utajiri alionao kwa gharama kubwa na hivyo hata kuwa tayari hata kwa sekunde kuupoteza na kuporomosha hadhi yake na atakuwa tayari kuulinda kwa gharama yoyote ile.

Wapo watu ambao daima hupenda kuishi kwa kubebwa na hata kunyenyekewa kwa kulipwa fadhila hata kama mchango wao kwa maendeleo ya watu wengine si mkubwa wa kulingana na ngazi aliyofikia mlengwa aliyesaidiwa.

Katika nchi hii wapo watu waliotoa michango yao katika ujenzi wa Taifa na kupewa heshima kubwa na kuwa miongoni mwa watu wanaoheshimika na majina yao kutajwa kwa heshima kila wanapokuwa.

Haipingwi, kuwa mwanasiasa mkongwe nchini Kingunge Ngombale-Mwiru, ana historia ndefu katika ujenzi wa Taifa hili na hasa ndani ya TANU na CCM, kutokana na kuwa mstari wa mbele kwenye ujenzi wa vyama hivyo kabla na baada ya uhuru.

Amekuwa katika serikali kwa awamu zote nne akiwa mshauri wa karibu sana wa marais Julius Nyerere, Ali Hassan Mwinyi, Benjamin Mkapa na Jakaya Kikwete na akifanya hivyo hata ndani ya CCM na akishiriki kuandaa ilani na hata miongozo ya chama.

Nafasi zote hizo zilimjenga na kumpa heshima kubwa licha ya upungufu wa kibinadamu ambao kila mwanadamu anao, na hapana sababu ya kuuelezea hapa kwani kuna safu zingine ambazo zitahusika na kumchambua mzee huyu ambaye kaamua kuzima nyota yake mwenyewe.

Baada ya kuanza kinyang’anyiro cha kutafutwa mrithi wa Rais Kikwete ambaye atakuwa Rais wa awamu ya tano, Kingunge hakukaa mbali na  mchakato, huku akiibuka ndani ya CCM na kujinasibu kuwa na mgombea wake ambaye anasema alimkubali kuwa ndiye pekee anayeweza ‘kuikomboa Tanzania’, Waziri Mkuu aliyejiuzulu kwa kashfa ya Richmond, Edward Lowassa.

Alijitokeza siku Lowassa anatangaza nia yake ya kuwania urais wa Tanzania kupitia CCM kwenye  mkutano uliofanyika Arusha na kupewa nafasi kubwa ya kumzungumza na kumsifu Lowassa, jambao ambalo lilizusha gumzo kwa maana ya nafasi aliyokuwa nayo Kingunge na alivyoamua kumkumbatia mwana CCM mmoja.

Hata Lowassa alipokatwa katika kura ya maoni ya kuchuja wagombea ndani ya CCM ambapo Dk John Magufuli alibuka kidedea, Kingunge alionesha waziwazi hasira zake na kudai kuwa kanuni na Katiba ya CCM vilikiukwa hata kumpata Magufuli baada ya mgombea aliye na mahaba naye kukatwa.

Juzi nyumbani kwake Mikocheni, Dar es Salaam, katika hali ile ile ya kusononeka kwa kukatwa kipenzi chake na kuhamia Chadema ambako hivi sasa ni mgombea urais, Kingunge aliibuka tena na kuisema CCM kabla ya kutanga kuachana nayo na kuudanganya umma kuwa hatajiunga na chama hicho.

“Sikubaliani na mambo yaliyotokea katika mchakato wa kumpata mgombea urais wa CCM kule Dodoma, kilichotokea ni kuwadhalilisha wagombea wenye haki…wagombea wamezungushwa mikoa 15 kwa gharama zao na kuishia mlangoni mwa Kamati Kuu, CCM inaamini binadamu wote ni sawa na kila mtu anastahili heshima ya kutambuliwa utu wake,” alisema Kingunge.

Kuzungushwa kutafuta wadhamini ni utaratibu wa chama ambao mzee huyu alikuwa anaufahamu na bila shaka alishiriki kuuweka, hivi sasa malalamiko yake hayatokani na utaratibu huu kufuatwa bali ni kipenzi chake kukatwa.

Kama Lowassa  asingekatwa, hoja ya kuzungushwa kuwa udhalilishwaji isingekuwapo, kwa sababu roho yake ingetulia kwa kuwa anaamini Lowassa angeshinda urais na yeye kuendelea kuwa mshauri tena wa Rais katika masuala ya kisiasa na kuendelea kulia kivulini.

Akizungumza na wanahabari, alisema anaachana na CCM na hatajiunga na chama chochote. Hapana uhakika kama hayo yalitoka rohoni, kwa sababu ni wale wale ambao leo wanasema hiki kesho wanabadilika, ni dhahiri kama baadhi ya vyombo vya habari vilivyoripoti, anamfuata swahiba wake Lowassa, hivyo atajiunga na Chadema.

Alisisitiza kubaki kuwa mtetezi wa mabadiliko huku kauli yake ikionesha kuwa wazee hawataki mabadiliko akiwamo yeye. “Vijana wanataka mabadiliko ukiondoa wale wa UVCCM, akina mama wengi nao wanataka mabadiliko, wafanyakazi, wakulima, wafugaji, wavuvi wachimbaji wadogo wa madini, wanafunzi wa sekondari, vyuo pamoja na wasomi,” alisema Kingunge bila hata kutaja wazee kama yeye.

Mzee huyu aliyekaa ndani ya chama hicho kwa zaidi ya miaka 60 leo anaibuka na kuishambulia CCM kuwa imeishiwa pumzi, yawezekana kwa yeye kujipima kiumri akijilinganisha na CCM ataona ni sawa, huku akisahau kuwa kuna vijana wamekuwa wakiingia kadri wazee wanavyoishiwa pumzi kama yeye.

Ndani ya CCM wamepita vijana na wazee wengi na wengine kukaa pembeni wakitoa ushauri wa hapa na pale, huku akina Kingunge wakiendelea kubaki humo kwa sababu za kutaka kujihami kiuchumi, lakini pia kwa huruma ya viongozi wa kitaifa wasiotaka kumwona akiadhirika kimaisha.

Lakini pia Kingunge amekuwa akijisahau na kutaka kujiona au kujilinganisha na Mwalimu Nyerere akidhani kuwa kauli yake inaweza kuwa na uzito mkubwa wa hata kuibadili na kuigeuzageuza CCM kwa mujibu wa matakwa yake. CCM waliliona hilo na kuendelea naye hivyo hivyo kwa kuheshimu umri alionao na mchango wake kwa chama nyuma.

Vijana wa CCM, damu changa ya CCM asiyoitambua Kingunge ililiona hilo na kumwona mzee huyu akikengeuka na hivyo kuamua kumvua ukamanda wa vijana Taifa kwa sababu hakuonekana kama mtu ambaye bado na msimamo ila anayeendeshwa kimaslahi zaidi.

Ieleweke tu kuwa Kingunge na wenzake wakiwamo akina Frederick Sumaye , Lowassa, Mgana Msindai, Makongoro Mahanga, James Lembeli, Hamis Mgeja na wengineo kadhaa, ndio wamepoteza mwelekeo na kuamua kukumbatia nyuki.

Mwanasiasa huyo mkongwe akaamua kuishambulia CCM eti inakumbatia matajiri na kusahau kuwa huko aliko swahiba wake ambaye naye ni tajiri, kuna matajiri ambao pia hawawezi kuelezea vyanzo vya  mali walizonazo licha ya hata kuficha taarifa kwenye Tume ya Maadili ya Viongozi.

Si siri kuwa haya yanayiofanyika hivi sasa miongoni mkwa baadhi ya viongozi wa siasa, yanatokana na kutokuwapo kwa Nyerere, kwa sababu angekuwapo hata Lowassa asingethubutu kutia mguu kwenye kinyang’anyirio na wala akina Kingunge na Moyo wasingefunua vinywa kuitukana CCM.

Kingunge alichelewa sana kutoa tamko alililotoa juzi kwa wanahabari, kwani alitakiwa aondoke au aondolewe pamoja na mwenzake Hassan Nassoro Moyo wa Zanzibar pale tu walipoanza kujiumauma na kutafuna maneno yao, huku wakiishambulia CCM kutokana na uchumi wao binafsi kutetereka. Inajulikana tu kuwa Kingunge na wenzake wana tabia ya fuata nyuki ule asali. Lakini ajue anaweza kufuata nyuki akakosa asali na kuambulia manundu usoni.