CHADEMA WAPANGA KUVURUGA AMANI, POLISI YATOA ONYO KALI

NA WAANDISHI WETU

SIKU chache baada ya aliyekuwa mgombea urais wa CHADEMA, Edward Lowassa, kushindwa na mgombea wa CCM, Dk. John Magufuli kwenye uchaguzi mkuu wa mwaka huu, CHADEMA wameanza mikakati ya kuvuruga amani ya nchi.

Katika uchaguzi huo ambao ulikamilika kwa amani na utulivu huku waangalizi wa ndani na nje ya nchi wakithibitisha kuwa ulifanyika kwa amani, utulivu na bila kuingiliwa, mgombea wa CHADEMA alilalamika kuonewa kwa madai kuwa ameibiwa kura.

Katika madai hayo aliyoyatoa kwa vyombo vya habari kabla na baada ya kukamilika kwa mchakato wa kuhesabu kura, alisema yeye ndiye alistahili kuwa mshindi wa uchaguzi huo na kwamba hatakubali matokeo hayo yaliyotangazwa na Tume ya Taifa ya Uchaguzi (NEC).

Kauli hiyo ya Lowassa ilionyesha dalili za kutaka kuharibu amani ya nchi kwa kuwa mamlaka husika kwenye kutangaza matokeo hayo (NEC), ilikiri kuwa matokeo yalikuwa halali yasiyokuwa na kasoro hivyo kila mgombea aridhike nayo.

Hata hivyo, CHADEMA walionekana kuendelea na mikakati ya chini kwa chini kama moja ya njia za kupinga matokeo hayo, wakianzia na kutokuhudhuria kwenye vikao muhimu vya NEC vilivyowajumuisha wagombea wote kwa lengo la kutia saini hati ya ushiriki wao.

Jana, viongozi wa chama hicho katika maeneo mbalimbali ya nchi, waliendeleza mkakati wao kwa kuwasilisha kwa jeshi la polisi barua za maombi ya kufanya maandamano waliyoyaita ya amani, yasiyo na kikomo, ombi ambalo jeshi la polisi limekataa na kusema endapo yatafanyika ni batili.

Kutoka Kanda ya Dar es Salaam, Kamishna Suleiman Kova, akizungumza na waandishi wa habari ofisini kwake jana, alisema walipokea barua ya CHADEMA saa 7.30 mchana ambapo iliwataka watoe kibali cha maandamano hayo.

Alisema barua hiyo ilikiuka sheria za nchi kwa kuwasilishwa kwa kuchelewa na kwamba maandamano yasiyo na kikomo hayajawahi kutokea hapa nchini na hata katika nchi zilizowahi kuyapata kwa sasa hazina amani.

Alisema barua hiyo yenye namba ya kumbukumbu CDM/PW/GEN/042/2015, ilionyesha kuwa imeandikwa Oktoba 31, mwaka huu, ikieleza azma yao ya kufanya maandamano maeneo yote ya jiji la Dar es Salaam, bila kikomo kwa madai ya kupinga kubakwa kwa demokrasia.

Kova alisema baada ya kuipokea barua hiyo waliisoma kwa makini pamoja na kupata tafsiri za kisheria na kubaini kuwa imekiuka sheria ya polisi sura ya 322, k/f 43 (1) ya mwaka 2002, inayotaka barua ya aina hiyo kuwasilishwa saa 48 kabla ya kufanyika kwa maandamano.

Pia, alisema katika barua hiyo, CHADEMA walimtaja Edward Lowassa, kuwa mshindi wa urais katika  uchaguzi mkuu, jambo ambalo ni kinyume cha sheria ya nchi ibara ya 41 (7), iliyoko kwenye katiba ya Jamhuri ya Muungano wa Tanzania, inayotoa mamlaka kwa NEC pekee kumtangaza rais.   

Kamishna Kova alinukuu sheria hiyo kuwa: ”iwapo mgombea ametangazwa na Tume ya Uchaguzi kwamba amechaguliwa kuwa rais kwa mujibu wa ibara hii, hakuna mahakama yoyote itakayokuwa na mamlaka ya kuchunguza kuchaguliwa kwake.”

Aidha, ibara ya 74 (11), imeeleza wazi kuwa katika kutekeleza madaraka yake kwa mujibu wa masharti ya katiba hii, Tume ya Uchaguzi haitalazimika kufuata amri au maagizo ya mtu yeyote au idara yoyoyte ya serikali au maoni ya chama chochote cha siasa.

Kova alisema maandamano yasiyo na kikomo hayawezekani kwa kuwa yatasababisha usumbufu kwa wakazi wa jiji la Dar es Salaam, ikiwa ni pamoja na kushindwa kufanya shughuli zao.

Alisema pia hayakubaliki na kwamba jeshi la polisi linapiga marufuku maandamano hayo yanayotarajiwa kufanyika leo, kwa kuwa yana vishiria vya kutaka kuvuruga amani ya nchi.

Aliwataka wananchi kutokujihusisha na maandamano hayo kama walivyokataa agizo la baadhi ya viongozi wa vyama vya siasa waliowataka kusimama mita 200 kulinda kura Oktoba 25, mwaka huu.

Mwanza

Akizungumza na waandishi wa habari jana, ofisini kwake, Kamanda wa Polisi mkoani Mwanza, Charles Mkumbo, alisema jeshi lake limepiga marufuku maandamano ya CHADEMA yaliyoombwa kufanyika leo wilayani Misungwi, kupinga ushindi wa Rais Mteule Dk. John Magufuli.

Kamanda huyo alisema wakati huu wa maandalizi ya kuapishwa kwa Rais Mteule, kitendo cha kuandamana kitakuwa ni kukiuka sheria na kusababisha uvunjifu wa amani, hivyo watu wakatae na waendelee na shughuli zao.

“Uchaguzi umepita, tufanye kazi za maendeleo na siyo suala la kupinga kura za kiongozi fulani, maana kumchagua mtu ni utashi wa mtu baada ya kuridhika na sera zake na kumuamini kuwa ndiye atakayewaletea maendeleo na ndiyo demokrasia,” alieleza Kamanda Mkumbo.

“Kama hujaridhishwa na matokeo vipo vyombo vya sheria, siyo maandamano maana ni uvunjifu wa sheria. Nachukua fursa hii kuwatangazia wale wote waliokuwa wanataka kuandamana kesho (leo), maandamano ni marufuku mkoa wa Mwanza, atakaye kiuka tutamchukulia hatua maana amevunja sheria,” alisisitiza Mkumbo.

Singida

Kamanda wa Polisi mkoa wa Singida, Kamishna Msaidizi Thobias Sedoyeka, alisema jeshi lake lilipokea barua ya CHADEMA kuomba kufanya maandamano hayo, lakini hawayaruhusu.

Alifafanua kuwa pamoja na kupinga matokeo hayo yaliyotangazwa, CHADEMA na vyama vinavyounda UKAWA, vinaitaka pia mamlaka husika (NEC) kumtangaza mgombea wao, Edward Lowassa wakiamini kuwa ndiye mshindi wa kiti cha urais.

Alisema uchunguzi unaonyesha kuwa maandamano hayo yatashirikisha makundi mbalimbali ya watu, hususan vijana zaidi na kupita sehemu mbalimbali za mji kabla ya kuhitimisha katika ofisi walizolenga.

Mwenyekiti wa CHADEMA mkoa huo, Shabani Limu alikiri kupokea maagizo kutoka ngazi za juu za chama hicho na kuongeza kuwa, mpaka sasa bado hakuna mafanikio ya kufanyika kwa maandamano hayo kutokana na makamanda wa polisi wa wilaya zote kutoyaruhusu kwa kuhofia uvunjifu wa amani.

“Ni kweli tumepokea taarifa kutoka kamati kuu ya chama kwamba maamuzi ya kamati kuu ni kufanya maandamano nchi nzima kupinga matokeo ya urais ambayo yametangazwa na Tume ya Uchaguzi.

“Nimesambaza taarifa zote kwa viongozi wangu wa wilaya, wakawa wamepekela taarifa hizi kwa maofisa wa polisi wa wilaya zao, lakini mpaka leo (jana) na mpaka sasa wakati nikiendelea kuzungumza na nyie, maofisa wa polisi wa wilaya wamekataa maandamano haya kwa kudai kuwa hayatakuwa ya amani,” alisisitiza.