BODI YA UTALII YARIDHISHWA NA IDADI YA WATALII KUTOKA CHINA

BODI ya Utalii Tanzania (TTB), imeridhishwa na idadi wa ya watalii kutoka  China na kusema kuwa, endapo kutakuwa na safari za ndege za moja kwa moja, itasaidia kupunguza gharama za safari na kuchochea utalii.

Mwenyekiti wa Bodi ya TTB, Jaji mstaafu Thomas Mihayo, alisema hayo juzi, alipokuwa akizungumza na waandishi wa habari mkoani hapa.

Alisema  endapo kutakuwa na ndege ya moja kwa moja kutoka Tanzania mpaka China, idadi kubwa ya watilii kutoka nchi hiyo itaongezeka na  pia mataifa mengine, hivyo sekta ya utalii itachangia zaidi  mapato  ya serikali.

Jaji mstaafu Mihayo alsiema hayo baada ya kumaliza ziara ya kuwatembeza waandishi waandamizi wa habari kutoka China, katika Hifadhi za Ngorongoro Crater na Manyara.

Alisema vivutio vya utalii vilivyopo  nchini ni tunu kubwa kwa taifa na pia vinawaleta watalii kutoka sehemu mbalimbali.

“Ujio wa wanahabari hawa ni fursa kwetu kwani watakwenda kuwa mabalozi wazuri kwa kutoa machapisho na habari nchini kwao, kuhusu  vivutio vya utalii vilivyoko Tanzania,” alisema.

Kwa mujibu Jaji mstaafu Mihayo, waandishi hao kutoka China, wameonyesha nia ya dhati ya kuvitangaza vivutio  nchini,  hivyo kutokana na urafiki wa kihistoria uliopo kati ya China na Tanzania, mpango huo utakuwa na mafanikio makubwa.

Alisema China ni nchi yenye watu wengi duniani, hivyo kupitia waandishi hao, watawafikia wananchi wengi wa nchi hiyo kwa kuandika makala na machapisho mbalimbali, kuhusiana na vivutio vya utalii vilivyopo nchini.

“Changamoto kubwa waliyoiona ni gharama ya usafari wa ndege kuwa ni kubwa kutokana na kutokuwepo kwa ndege za moja kwa moja,” alisema.

Mwenyekiti wa bodi hiyo alisema  usafiri wa anga utakapoimarishwa, utachochea idadi kubwa ya watalii kutoka China.

Alisema tayari Rais Dk. John Magufuli, ameahidi kuleta ndege kubwa itakayofanya safari ndefu, hivyo itasaidia kupata soko la watalii kutoka China na kuongeza mapato.

Jaji mstaafu Mihayo alisema halmashauri na wawekezaji katika hoteli zilizopo katika maeneo ya vivutio vya utalii, waunganishe nguvu ili kutatua changamoto za barabara kwani zimekuwa kero kwa wageni.

Alisema miundombinu ya barabara kwenda maeneo ya hoteli katika vivutio ni mibovu , hivyo serikali  kwa kushirikiana na sekta binafsi, wajipange kuiboresha ili iwe rafiki na kuvutia watalii zaidi.

Akizungumza kwa niaba ya watalii wengine,  Mhariri Msaidizi kutoka China Daily Media Group, Kang Bing, alisema wamefurahi kuona vivutio vilivyopo nchini na ukarimu wa Watanzania.

“Tulitembelea maeneo mbalimbali kama Ngorongoro na Ziwa Manyara na kuona wanyama na ndege, mandhari nzuri na hili limekuwa somo jipya kwetu,” alisema.

Alisema watakwenda kuwa mabalozi  wa kutangaza maeneo ya vivutio vya utalii kupitia machapisho na makala mbalimbali, ili kuchochea idadi ya watalii kutoka China kuongezeka.

Waandishi sita kutoka Beijing Press Group, China Daily, International Liaison Department, English News Service na China Radio International, walitembelea Hifadhi ya Ziwa Manyara na Ngorongoro Crater.