LISSU KIBARAKA ANAYETUMIA SIASA KUGANGA NJAA

MWANASHERIA Mkuu wa CHADEMA, Tundu Lissu amedaiwa ni kibaraka anayetumia siasa katika kuganga njaa, hivyo anapaswa kupuuzwa kwa kuwa uchoyo unamfanya kutokuwa na uzalendo kwa taifa.

Lissu, ametajwa kuwa ni miongoni mwa wanasiasa wanaoshirikiana na moja ya kampuni ya mawakili kuhujumu utendaji wa Shirika la Ndege Tanzania (ATCL).

Naibu Waziri wa Ujenzi, Mawasiliano na Uchukuzi wa Zanzibar, Mohamed  Ahmada Salum, akiwa na Kamati ya Baraza la Wawakili ya Ardhi  na Mawasiliano,  alisema jana kuwa, Lissu ni kibaraka anayeumia na choyo, hivyo kutokuwa na  uzalendo kwa taifa.

Alisema Tanzania itajengwa na wananchi, hivyo ni vizuri kuwa watulivu na kumuunga mkono Rais Dk. John Magufuli, katika kufanikisha uchumi wa kati.

Mohamed alisema hatua ya hivi karibuni ya Lissu kuibuka katika vyombo vya habari na kuonyesha furaha kwa kutokufika kwa ndege mpya ya tatu aina ya Bombadier Q 400, ni choyo ya mafanikio.

Alisema  Serikali ya Zanzibar ilikutana na uongozi wa ATCL na kuridhishwa na hatua ya utekelezaji wa majukumu yake, ikiwemo  ujio wa ndege hizo.

"Hakuna wa kuikomoa serikali, Lissu anatumia siasa kutaka kuwachelewesha wananchi kufikia malengo na hawezi kufanikiwa. Tunajua kinachomsumbua ni choyo na njaa na kutokuwa na elimu ya siasa ya uzalendo.

“Ukiona mwanasiasa yupo tayari kuhatarisha maisha ya wananchi kwa ajili tu ya njaa yake, ujue ana upungufu na hafai,”alisema.

Katika hatua nyingine, Mohamed alisema Serikali ya Zanzibar, imeridhishwa na hatua ya ATCL kuanza kulipa deni la sh. milioni 241 la viwanja vya ndege Zanzibar, kwa kuwa itawezesha ufanisi katika utendaji.

Salum alihimiza haja ya deni hilo kumalizwa kwa wakati.

Naye,  Mwenyekiti wa kamati hiyo,  Hamza Hasan Juma, alisema shirika hilo limepita katika changamoto nyingi na hatua ya Rais Dk. Magufuli, kwa nia moja, kufanya maboresho ni lazima wasio na mapenzi na taifa waumie na kulitakia mabaya.

Alisema hatua iliyopo ATCL katika kwenda kwenye ushindani wa biashara inajieleza,  hivyo ni lazima kufufuka kwake kutawauma na kuwaudhi wengi.

"Lilivyokufa hakuna aliyekuwa analisemea, sasa linafanyakazi vizuri ni lazima liwaudhi na kulisemea vibaya na hii iwe tija kwa watendaji kufanya kazi,"alisema.

Aliutaka uongozi wa ATCL, kuona haja ya kuwa na wajumbe wa bodi na kurugenzi yenye kuzingatia sheria, kwa kuwapo na watendaji kutoka Zanzibar na kumaliza changamoto ya marubani iliyopo.

Kwa upande wake, Makamu Mwenyekiti wa kamati hiyo , Mwakilishi wa Chakechake,  Suleiman Sarahan , alisema ni vizuri shirika hilo kumtosikiliza mtu na kwendau taratibu na kwa safari yenye uhakika, kuliko kukimbia huku likiisababishia Taifa hasara.

Sarahan alisema mtikisiko wa kisiasa nchini ni jambo la kawaida, muhimu wasifikie kwenye vita kwa kuwa wapinzani hupinga kila kitu kwa kuwa ndio ulaji wao.

"Wapinzani hawana jema, kupinga kwao ni ulaji, tuangalie ATCL inafanya nini na ipo hatua gani, hakuna muda wa kubishana nao,"alisema.

Alisema ipo haja ya kuboresha mishahara kwa watendaji, hususani marubani ili kuchochea ufanisi wa kazi na kuwa na wigo wa soko la nje ya nchi.

Naibu Waziri wa Ujenzi, Mawasiliano na Uchukuzi,  Mhandisi Edwin Ngonyani,  alisema serikali imejidhatiti kuwa na mabadiliko katika shirika hilo.

"Hii ni ATCL mpya, hatutampa nafasi mtoto wa mjomba wala shangazi, tunataka utendaji bila kurudi nyuma, nawahakikishia tutaendelea kufanya vizuri,"alisema

Mwenyekiti wa Bodi, Mhandisi Emanuel Korroso, alisema pamoja na   kukamilika kwa ununuzi wa ndege mbili za Bombadier Q400, zilizoanza kazi, ndege nyingine iliyotarajiwa kuwasili Julai, mwaka huu, itaingia nchini, muda si mrefu.

Alisema lengo la shirika hilo ni kutoa huduma bora ndani na nje ya nchi, ambapo nchini Comoro, zinafanya vizuri na matarajio ni kuanza safari za Nairobi, Entebe na Bunjumbura.

Mhandisi Ngonyani alisema mfumo mpya wa utoaji huduma katika ukatishaji tiketi na udhibiti wa mapato, utasaidia  kufikia lengo katika mpango wa miaka mitano, huku likitarajia ujio wa ndege mpya mbili CC 300, zenye uwezo wa kubeba abiria 132, ambazo zitawasili nchini June 2018.

Pia, alisema ndege moja ya masafa marefu aina ya Boeing 787, yenye kubeba abiria 262, itawasili Julai, 2018, huku ununuzi wa ndege hiyo ukizingatia bajeti ya mwaka ujao wa fedha.