DK MAGUFULI AANIKA DAWA YA WATAKAOBORONGA KAZINI

 

NA SELINA WILSON, TARIME

MGOMBEA urais kupitia Chama Cha Mapinduzi (CCM), Dk. John Magufuli, amesema watumishi wa  serikali watakaoboronga kazi hawatahamishwa vituo vya kazi, badala yake watatimuliwa mara moja.

Amesema kumekuwa na mtindo wa watendaji wa serikali kufanya kazi na kuharibu kisha kuhamishiwa vituo vingine, lakini katika serikali atakayoiongoza atahakikisha mtumishi anayeharibu kazi anaondolewa  moja kwa moja.

Dk. Magufuli alisema hayo jana alipozungumza kwa nyakati tofauti na wakazi wa Nyamongo, Tarime, Rorya na Musoma katika mikutano ya kampeni za uchaguzi mkuu zinazoendelea mkoani Mara.

Alisema akipata ridhaa ya wananchi akiwa Rais, anataka watendaji wa serikali wachape kazi na kwamba, atakayeharibu kazi ajue ameharibu maisha yake kwa kuwa hatapata nafasi ya kwenda kuharibu mahali pengine.

“Mtendaji akiharibu kazi ajue anakwenda nyumbani moja kwa moja. Serikali ya Magufuli kutakuwa hakuna mambo ya hamahama. Nataka watu wafanye kazi,” alisema na kuongeza kuwa wananchi wamekuwa wakiichukia serikali kwa sababu ya watendaji wachache wanaoshindwa kutekeleza majukumu na kuwasababishia kero.

Dk. Magufuli aliwataka wananchi wamuunge mkono katika msimamo wake wa kutohamisha watendaji wa serikali wanaoharibu kazi kwa kusema ‘hakuna kuhama’ kwa kuwa watendaji hao ndio wamekuwa kikwazo cha maendeleo ya watu.

Akiwa Rorya Dk. Magufuli aliwataka wananchi kuacha uvuvi wa kutumia mabomu kwa kuwa rasilimali zilizomo ziwani zinapaswa kutunzwa ili zitumike kwa maendeleo ya wananchi wote.

“Mkitumia sumu kuvua mnaua mpaka mayai ya samaki. Hivi mayai yakikosekana watoto watazaliwa.. Serikali ya awamu ya tano itatoa mikopo kwa wavuvi na kushusha bei ya vifaa vya uvuvi ili wananchi wapate urahisi kwenye shghuli zao,”alisema.

Kwa upande wake, Mgombea ubunge wa jimbo la Bunda, Stephen Wassira akizungumza Mjini Tarime alisema wananchi wanapaswa kujenga amani na umoja kwa kutokubali kupotoshwa na watu wanaosema watawaletea mabadiliko ambayo hawawezi kuyatekeleza na kwamba Dk. Magufuli ndiye chaguo sahihi kwa maendeleo yao.

Awali, Dk. Magufuli aliwatumia salamu wawekezaji kufanya shughuli zao kwa kufuata sheria na kuweka uwazi kwenye hesabu za mapato yatokanayo na uchimbaji wa madini.

Hatua hiyo itawezesha wawezekezaji kulipa kodi stahiki, ajira  na kutoa huduma kwa wananchi wanaozunguka migodi kwa kuleta maendeleo katika maeneo hayo.

Mgombea huyo alisema hayo alipozungumza na wakazi  wa Nyamongo wilayani Tarime ambako kuna mgodi wa North Mara.

“Ukimpa mtu biashara yako lazima atoe hesabu ijulikane faida ni ipi na kama kuna hasara pia ijulikane. Kwenye serikali yangu nitalisimamia hili ili wananchi na serikali ipate manufaa ya uwekezaji.

Wawekezaji tunawapenda, lakini tunataka biashara pasu kwa pasu. Tunataka tujue mapato ya uwekezaji sio waje wachote madini watuachie mashimo,” alisema.

Alisema hatakubali wananchi wanyonywe bila kunufaika na uwekezaji kwenye migodi ambayo wawekezaji wachimba wanaacha mashimo.

“Mimi sichukii migodi, nataka wawekezaji waje wengi lakini na wananchi wanufaike. Najua kuna malalamiko mengi kuna watu wamechukuliwa maeneo yao na nataka mlipwe fedha zenu,”alisema.

Dk. Magufuli alisema anashangazwa kusikia Nyamongo kuna tatizo la maji na kusema kwamba hakuna sababu ya kukosa maji wakati kuna mgodi na wawekezaji wanazalisha hivyo wanapaswa kutoa huduma hiyo kwa wananchi.

Kwa upande wa wachimbaji wadogo, alisema serikali itaendelea kuwawezesha kupata mitaji kwa kuwapa mikopo ya fedha na vifaa ili wafanye kazi zao kwa ufanisi, suala ambalo limekwishaanzishwa na serikali iliyopo.

Katika hatua nyingine, aliwaomba wazee wa koo na viongozi wilayani Rorya na maeneo mengine wakae chini kuzungumzia namna ya kudhibiti wizi wa ng’ombe ambao umekuwa kero kwa wananchi na kutishia kukwamisha maendeleo ya watu.

Hata hivyo aliwaahidi kuwa akiingia Ikulu atatumia polisi na mitambo ya kamera (CCTV) kudhibiti wizi huo.

“Zipo kamera zinaweza kufungwa na kuona kilometa 15 hadi 30, tutawapatia askari polisi ili wazitumie kudhibiti wimbi la wizi wa n g’ombe. Inauma mno unaamka asubuhi unakuta zizi liko wazi, ulikuwa unategemea maziwa yanakuwa hakuna,”alisema.

Kutoka Itilima mkoani Simiyu Chibura Makorongo anaripoti kuwa, Mjumbe wa Timu ya Ushindi ya CCM, Mwigulu Nchemba, amezindua kampeni za Chama wilayani humo na kuwaomba wananchi wampe kura nyingi Dk. Magufuli.

Nchemba alisema Dk. Magufuli ndiye jibu sahihi la utatuzi wa kero za wananchi kwa kuwa ana rekodi nzuri ya utendaji wa kazi nchini.

Mwigulu alisema kuwa Tanzania inakabiliwa na matatizo matatu ambayo aliyataja kuwa ni watu waliosoma kwa kodi za Watanzania na wakaaminiwa na kupewa dhamana, lakini wanafanya kazi kizembe, ukosefu wa uaminifu na utapeli miongoni mwa watu walioaminiwa.

Alisema mgombea huyo ni kiboko cha matapeli na mafisadi, na pia wanaofanya kazi kizembe na kwamba iwapo Watanzania watamchagua atawashughulikia ikiwa na pamoja na kuhakikisha taifa linasonga mbele.

“Magufuli hana rafiki kwenye utendaji. Tangu ujana wake rafiki yake ni Tanzania na kazi anayopewa kuisimamia tu basi leo hii tunaona baadhi ya wagombea wanafadhiliwa na mafisadi wote na tutakapowapa nchi lazima waibe kwanza walizotumia kwenye kampeni tusiwakubali katisa kuwachagua,”aliongeza.

Aidha Mwigulu aliwabeza wagombea wengine wa nafasi ya urais na hasa mgombea urais kwa tiketi ya Chama cha Demokrasia na Maendeleo (CHADEMA), chini ya mwamvuli wa UKAWA, Edward Lowassa na kusema kuwa ni msanii wa kutafuta madaraka na hana nia njema na nchi.

“Lowassa kwa miaka 40 mimi nazaliwa anatembelea gari ila leo wakati wa kutafuta urais ndio anapanda daladala? Lowassa ni maarufu tangu akiwa na umri wa miaka 40 na angeweza kuwa rais kama sio rekodi yake ya kutiliwa mashaka tangu wakati wa Hayati Baba wa Taifa Mwalimu Julius Nyerere,”alisema Mwigulu.

“Lowasa anatiliwa mashaka kwa sababu wakati wote amezungukwa na wapiga dili na hata chama alichokwenda amepokelewa kwa dili. Msipotoshwe na wapiga dili maana kinachowasukuma sio matatizo ya Watanzania bali ni kutaka kurudisha pesa walizotumia tangu mchakato wa kuteua mgombea ndani ya chama,” alisema mjumbe huyo.