KIGOGO CHADEMA MBARONI KWA KUMSHAMBULIA ASKARI

NA HAPPINESS MTWEVE, Dodoma

MGOMBEA ubunge jimbo la Dodoma Mjini kwa tiketi ya CHADEMA, Benson Kigaila, leo anatarajiwa kufikishwa kwenye Mahakama ya Wilaya mkoani hapa, kujibu mashitaka ya kumpiga askari polisi na kumjeruhi kwa chupa pamoja na kufanya fujo katika kituo cha kati cha polisi.

Mashitaka mengine yanayomkabili Kigaila, ambaye ni Mkurugenzi wa Oganaizesheni na Mafunzo wa CHADEMA, ni kukiuka amri halali ya polisi na kufanya maandamano bila kibali.

Mbali na Kigaila, wapo wanachama wengine 10 wa chama hicho ambao wote kwa pamoja wanashikiliwa kwa tuhuma hizo na watafikishwa mahakamani kujibu mashtaka kwa mujibu wa sheria.

Kwa mujibu wa Kamanda wa Polisi Mkoa wa Dodoma, David Misime,  watuhumiwa wengine ni Mwenyekiti wa Vijana wa CHADEMA mkoa wa Dodoma, Godfrey Manyanya (29), Hashim Kilaini (45), Alex Thomas(28), Khadija Maula (40) na Stellah Massawe (38).

Wengine ni Prisca Mgaza (20), Luckyson Kweka (28), Aisha Urio (22), Pompey Remijo (40) na Lawi Tumuza (52).

Akielezea tukio hilo, Kamanda Misime alisema watuhumiwa hao walifanya makosa hayo juzi, saa 12:45 jioni wakiwa kwenye barabara ya Jamatini.

Alisema wafuasi hao walifanya maandamano bila kibali na kuzuia watumiaji wengine wa barabara kuendelea na shughuli zao licha ya kupewa maelekezo ya askari kuwataka kutokufanya hivyo.

Watuhumiwa hao kwa pamoja walikaidi maagizo hayo ya polisi na kuanza kutoa lugha za matusi na kumshambulia na kumjeruhi askari kwa chupa ya soda.

Askari aliyejeruhiwa aliyetambulika kwa jina la PC Rebecca, alipelekwa katika Hospitali ya Rufaa ya mkoa kwa matibabu.

Kamanda Misime alitoa wito kwa wagombea wa vyama vyote vya siasa na wananchi wa Dodoma, kutii sheria bila shuruti kwani umaarufu hautafutwi kwa kuvunja sheria na watambue kufanya hivyo ni kosa la jinai.

Aliwataka wanasiasa watambue kuwa hakuna haki isiyokuwa na wajibu, hivyo wanatakiwa kutimiza wajibu wao kwa kuhakikisha wanapokwenda na kutoka kwenye mikutano, hawafanyi maandamano.

Alisema hata watunapotumia barabara, wanapaswa kuzingitia sheria za usalama barabarani, ili watu wengine waendelee na shughuli zao bila kubughudhiwa wala kutishwa.