ACHANENI NA LOWASSA, HANA SIFA YA KUWA RAIS-MWIGULU

Na Abdallah Amiri, Igunga

MJUMBE wa Kamati ya Ushindi ya CCM, Mwigulu Nchemba, amesema mgombea urais wa CHADEMA, Edward Lowassa hana sifa ya kuwa rais.

Aidha, amewataka wananchi kuacha ushabiki wa kisiasa kwa kuwashabikia wagombea ambao wamepoteza dira na mwelekeo.

Mwigulu, alisema hayo jana alipokuwa akiwahutubia wananchi kwenye mkutano wa kampeni uliofanyika uwanja wa Barafu, mjini Igunga mkoani Tabora.

Alisema wapo baadhi ya vijana wa bodaboda na mama lishe wamekuwa wakimshabikia Lowassa katika mikutano yake ya kampeni wakidai kwamba ndiye mwenye uwezo wa kuleta mabadiliko wakati uwezo huo hana.

“Ninakiri kuwa Lowassa ni mtu maarufu sana na alikuwa anafaa kuwa rais wa nchi hii, lakini ana tatizo mmoja tu kwani ni miongoni mwa watu wanaopiga madili ya fedha za Watanzania,’’ alisema Mwigulu huku akishangiliwa na umati wa watu.

Alisema anashangazwa na viongozi wa UKAWA, wanaomtetea Lowassa kuwa sio fisadi.

Mwigulu alisema ni wazi kuwa hivi sasa CHADEMA inafanyiwa kampeni na watu matajiri, ambao ni mafisadi ili aweze kuingia Ikulu na kuhujumu uchumi wa nchi kwa maslahi yao binafsi.

Aliwataka wananchi kumchagua mgombea urais wa CCM, Dk. John Magufuli kwani ana kila sifa ya kuwa rais kutokana na uadilifu wake.

Mgombea ubunge wa jimbo la Igunga, Dk. Dalali Kafumu, aliwaomba wananchi wamchague ili aweze kutekeleza baadhi ya ahadi alizoahidi.