KITANDULA AAHIDI KUJENGA VIWANDA VIDOGO VYA KOROSHO

NA SOPHIA WAKATI, MKINGA

MGOMBEA ubunge wa jimbo la Mkinga, Dunstan Kitandula, amesema iwapo atachaguliwa kwa mara nyingine kushika wadhifa wa ubunge, atajenga viwanda vidogo vidogo vya kubangulia korosho ili kuharakisha maendeleo ya wananchi wake.

Kitandula (CCM), alisema hayo wakati akizungumza kwenye mkutano wake wa kampeni uliohudhuriwa na mamia ya wananchi mjini hapa.

Alisema atahakikisha anajenga viwanda ili kusaidia wakulima wa korosho na kuinua uchumi wa jimbo hilo.

Kitandula alisema viwanda hivyo vitajengwa katika vijiji vya Mavovo, Horohoro na Mnyenzani na kwamba amefanya mazungumzo na wawekezaji kwa ajili ya kujenga viwanda hivyo.

Mgombea huyo alisema wanafanya mazungumzo na kituo cha utafiti wa mbegu za korosho kilichopo mkoani Mtwara ili wananchi waweze kupata mbegu bora.

Aliwataka wananchi kuwachagua wagombea wa CCM katika uchaguzi mkuu wa Oktoba 25, mwaka huu.