MGOMBEA UBUNGE SIMIYU AMUAHIDI MAZITO MAGUFULI

NA PETER KATULANDA, ITILIMA

MGOMBEA ubunge wa CCM katika jimbo la Itilima, mkoani Simiyu, Njalu Silanga, amemuahidi maendeleo makubwa mgombea urais wa Chama,Dk. John Magufuli iwapo watachaguliwa na wananchi.

Ameahidi kuwa iwapo Dk. Magufuli anataka ‘kazi tu’, yeye atakuwa ni mbunge wa ‘vitendo tu’ ili maendeleo ya wananchi wa wilaya hiyo mpya yapae.

Majibu ya ahadi hiyo iliyotolewa mwishoni mwa wiki iliyopita kwenye mkutano wa hadhara wa kampeni za CCM katika Kijiji cha Nanga, wilayani humo, yalipotolewa na Dk. Magufuli, yalikonga nyoyo za mamia ya wananchi hao waliopaza sauti kuomba wambebe huku wakiwaahidi kura za kishindo.

“Mheshimiwa mgombea urais Dk Magufuli najua wewe ni kipenzi cha wananchi, wengine wanashiriki tu uchaguzi, mimi tayari nakuita Rais mteule,” alisema Silanga na kuufanya umati wa wana Itilima uzizime kwa shangwe na kukubaliana naye kuwa huyo ndiye rais wanayemhitaji awamu ijayo.

“Tuna matatizo makubwa ya barabara, maji safi na salama ya kunywa, mabwawa na malisho ya mifugo yetu, tunajua wewe ni mtu wa sheria, uje ulishughulikie hilo, watu wanateseka, hawana marisho, watumishi hawana nyumba,” aliomba mgombea huyo.

Silanga, ambaye aliahidi pia kuboresha huduma za jamii na kuwapiga jeki vijana, alifafanua kuwa, wananchi wa wilaya hiyo wamekosa malisho ya mifugo kwa sabau ya mgogoro ulioshindikana kutatuliwa baina yao na pori la Hifadhi ya Akiba ya Maswa, hivyo wanaamini atakapokuwa rais kero hiyo itatatuliwa mara moja.

Mgombea huyo alimpongeza Rais Jakaya Kikwete kwa kuanzisha wilaya hiyo ili kusogeza karibu huduma za wananchi na kuondoa michango mbalimbali iliyokuwa kero kwa wananchi na sasa CCM imepania kutoa elimu ya msingi hadi kidato cha nne bure.

Akijitambulisha na kuomba kura kwa Wana-Itilima, Dk. Magufuli alimfagilia Silanga kwa kumuahidi kutekeleza kwa vitendo Ilani ya Uchaguzi ya CCM ya mwaka 2015-2020, ambayo itatatua kero hizo.

“Barabara zenu na daraja nimeziona, nawaahidi ndugu zangu nikiwa rais, nitayatekeleza na kuijenga wilaya hii mpya ikiwa pamoja na nyumba za watumishi, suala la mpaka nitalishughulikia mara moja ili mpate malisho,” alisema.

Dk. Magufuli alihoji atashindwaje suala la mipaka ya ardhi akiwa rais wakati rais ndiye mwenye mamlaka ya kubadilisha matumizi ya ardhi na kuwafanya tena wananchi hao wamshangilie na kumuomba kwa lugha ya kisukuma wambebe (kama heshima) na ishara ya kutukuka.

“Mnataka kunibeba ?” Aliwauliza.

 “Ndiyo,” walijibu na Dk. Magufuli akawashukuru na kuwaomba wambebe kwa kumpigia kura za ndiyo nyingi, ikiwa ni pamoja na wagombea wote wa udiwani na ubunge wa CCM na kwamba wasipofanya hivyo, hata kama wakimbeba mgongoni haina maana na matumaini yao yatapotea bure.