NANI MAKEPTENI WA MAGUFULI?

Na Mwandishi Maalumu

WALIOFUATILIA siasa za Marekani wakati wa uchaguzi mkuu wake wa mwaka 2008, wana kumbukumbu za kampeni ya aina yake iliyokuwa ikifanywa na aliyekuwa mgombea urais wa chama cha Democrats, Barack Obama.

Nyakati za asubuhi, mchana na jioni, lilikuwa jambo la kawaida kwa familia za Marekani kupokea wageni waliojitambulisha kama wapiga kampeni wa Obama.

Hawa walikuwa wakitembea nyumba kwa nyumba, mtaa kwa mtaa na jimbo kwa jimbo. Walifanyakazi hiyo kwa kujitolea, lakini baada ya kupata mafunzo maalumu na pia wakiwa wanaamini kuwa Obama ndiye alikuwa mgombea sahihi wa urais kwenye uchaguzi huo.

Takribani mwaka mmoja uliopita, baada ya kubaini upinzani mkali dhidi ya mgombea wao wa nafasi ya Waziri Mkuu, Narendra Modi, chama chake cha Bharatiya Janata (BJP) kilitumia mbinu hizi za Obama na hatimaye kuibuka na ushindi kwenye uchaguzi huo.

Ni mbinu za namna hii za kisasa, kistaarabu na kisayansi, ndizo ambazo CCM inazitumia katika kampeni zake za uchaguzi mkuu wa mwaka huu. Na nyuma ya mbinu hizo, ni mkakati unaoitwa Makepteni wa Magufuli.

Kwa bahati mbaya, vyama vya UKAWA vinatumia magazeti yake kupotosha umma kuhusu kazi, hasa za hawa wanaoitwa Makepteni wa Magufuli.

Wiki mbili zilizopita, mojawapo ya magazeti hayo, liliandika habari yake kuu ya ukurasa wa mbele kwamba makepteni hao ndiyo wamepangwa kufanyakazi za kuiba kura.

Gazeti hilo la MAWIO, lilikwenda mbali kwa kutaja namba za simu za wahusika wa mkakati huo. Kilichotokea ni kwamba baadhi ya waliotajwa wameanza kutishiwa maisha yao. Wanatafutwa na kuambiwa watashughulikiwa.

Ni wazi kwamba vyombo hivi vya habari vya UKAWA, itabidi viwajibike kwa tatizo lolote litakalowatokea wale ambao namba zao za simu zilibandikwa kwenye gazeti la MAWIO. Hii ni kwa sababu, walichokifanya kinakwenda kinyume hata na maadili ya taaluma ya uandishi wa habari.

Makepteni wa Magufuli

CCM ilifanya uamuzi wa kimsingi kuwa kwenye uchaguzi wa mwaka huu, itafanya kampeni zake kisayansi. Iliamua kuwa itatumia mbinu na mikakati yote ya kisasa inayoweza kutumika.

Mkakati mmojawapo ni huo wa Makepteni wa Magufuli au kwa jina lingine ‘Jeshi la Magufuli’. Mkakati huo unafanana sana na ule uliotumiwa na Obama mwaka 2008, ukiwa umebuniwa na wapanga mikakati kama David Axelrod.

Ni mkakati usio wa kibabaishaji na usio na uhusiano wowote wa wizi wa kura kama ambavyo UKAWA sasa wanashupaa kupotosha. Badala ya kuwa wabunifu na kuiga vilivyo bora, wao wameamua kufanya kampeni bwete, zisizo na ubunifu na za kulialia kuwa wataibiwa kura.

Wakati CCM ikitengeneza kifanisi mkakati huu, UKAWA wanaendeleza siasa za kuzomea wagombea wa CCM na wananchi wanaoonekana kuvaa sare za chama hicho.

Kwa mujibu wa Kitini cha Mafunzo kwa Makepteni wa Magufuli (ambacho naambatanisha picha yake), kuna malengo kama sita ya kuanzisha mkakati huo.

Moja ni kujenga mtandao wa ushindi kwenye majimbo yote ya uchaguzi, kupata taarifa ya hali ya kisiasa kwenye kila jimbo wakati wote wa uchaguzi, kupaza sauti za wananchi kuhusu kero zao, kuhakikisha mipango ya kampeni inaendana na uhalisia wa hali ya kisiasa, kufikia idadi kubwa ya wapigakura na kuhakikisha wana CCM wanapiga kura.

Mkakati wa Makepteni wa Magufuli unalenga makundi yote makuu kwenye jamii wakiwamo wanawake, vijana, wazee, watu wenye ulemavu, wavuvi, wafanyabiashara wadogo, wanamichezo, wasanii, waendesha pikipiki (bodaboda) na makundi mengine.

Kila jimbo la uchaguzi lina makapteni waliopatiwa mafunzo ya kutosha kupitia kitini hiki. Kazi ya makepteni hawa, kwa kushirikiana na wagombea wa ubunge na udiwani nchini kote, ni kuhakikisha kuwa CCM inaibuka na ushindi kwenye uchaguzi huo.

Ukiona watu kwenye vituo vya mabasi wakishawishi wananchi wapigie kura CCM, ujue hao ni Makepteni wa Magufuli. Ukiona watu wanagonga hodi nyumbani kwako wakiomba umpigie kura Magufuli na wagombea wa ubunge na udiwani katika eneo lako, ujue hao ni Makepteni wa Magufuli.

Kwenye gazeti la MAWIO, iliandikwa kwamba makepteni hao wanachukua namba za vitambulisho vya kupigia kura, jambo lililoelezwa kama ni ukiukaji wa taarifa.

Huu ni upotoshaji kwa sababu makapteni hawachukui namba za vitambulisho.  Wanachofanya Makepteni wa Magufuli ni kuwashawishi wapigakura kuchagua wagombea wa CCM katika ngazi zote.

Maajabu ni kwamba, wale wanaofanya siasa za kistaarabu na ambazo zinatumika katika mataifa yote yaliyokomaa kidemokrasia, sasa wanatengenezewa fitna waonekane wabaya, lakini wanaofanya siasa za kihuni za kuzomea na kudhalilisha wanawake, waonekane watu wa maana. 

Majukumu ya Makepteni

Kwa mujibu wa kitini cha mafunzo, kuna majukumu mbalimbali ya Makepteni wa Magufuli. Kwenye makala haya, nitanukuu maelezo rasmi kutoka kwenye kitini kueleza majukumu ya msingi ya makepteni.

 “Hawa watakuwa wafanyakazi wa kudumu katika muda wote wa kampeni na watafanya mambo yatakayowafanya wapigakura waone CCM ndiyo chama pekee kinachotakiwa kuendelea kutawala.”

Ukiona majukumu hayo ya Makepteni wa Magufuli, utashangaa ni kwa vipi magazeti yanayoheshimika yanavyokubali kuwatia hofu wananchi kwa dhana ambazo hazipo na kwa mambo ya kusingizia.

Wiki iliyopita, kuna kinamama wawili waliojitolea kuwa makepteni wilayani Mbozi, mkoani Mbeya, walikimbia makazi yao wakikwepa vitisho walivyokuwa wakivitoa viongozi wa UKAWA majukwaani kuhusu Makepteni wa Magufuli.

Ningefurahi sana kama UKAWA nao wangejikita katika kufanya kampeni za kisasa. Wamekuwa na kampeni za kawaida, za mgombea kuzungumza kwa dakika tatu na kubaki mijini kila siku.

CCM kimeweka utaratibu wa kwenda kuzungumza na watu wa mijini na vijijini. UKAWA wanatakiwa kushindana na CCM kwenye ufanyaji wa kampeni za kiteknolojia ya sasa, badala ya kubaki kulia kuibiwa kura kila uchao.

CCM inaposema itashinda kwenye uchaguzi wa mwaka huu, inafanya hivyo ikijua inatumia mbinu zilizotumika kushinda kwingineko.

CCM inajiamini kuwa itashinda kwenye uchaguzi mkuu wa mwaka huu uliopangwa kufanyika Oktoba 25, kwa sababu inajua itabebwa na wagombea bora, sera sahihi na usasa pamoja na ufanisi wa mikakati yake ya kisiasa wakati huu.

Tuache siasa za upotoshaji na uongo na tujikite kwenye siasa za kweli.