UVCCM YAISHUSHUA CUF

Na Mwandishi Wetu, Zanzibar

JUMUIA ya Umoja wa Vijana wa CCM (UVCCM), imesema haijawahi kufikiria kuanzisha vikundi au kambi za vijana zenye lengo la kutoa mafunzo ya uharamia.

Kauli hiyo ilitolewa jana na Kaimu Naibu Mkuu wa UVCCM Zanzibar, Abdulhafar Idrissa, alipokuwa akizungumza na waandishi wa habari mjini hapa.

Idrisa alikuwa akizungumzia tuhuma zilizotolewa na Chama cha CUF kuwa, UVCCM imeanzisha vikundi vya aina hiyo.

Alisema UVCCM haina kambi mahali popote iliyoanzishwa kwa ajili kuandaa vijana kuhujumu uchaguzi mkuu kwa kuwa hilo siyo jukumu lao.

Idrissa alisema CCM haina sababu ya kufanya vurugu wakati wa uchaguzi huo kwa vile ina uhakika mkubwa wa kuibuka na ushindi.

"UVCCM inatambua kuwa uharamia ni kinyume cha sheria na kwa malezi tunayopewa na chama chetu, hatuwezi kutenda mambo ambayo ni kinyume na sheria na hatuwezi kuruhusu kuivunja katiba ya nchi yetu," alisema.

Aliongeza kuwa UVCCM imesikitishwa na kauli za kichochezi zilizotolewa na CUF, zinazodai kwamba wameandaa vijana wenye lengo la kuharibu uchaguzi kwa kufanya fujo siku za mwisho za kampeni na siku ya upigaji kura.

"Tunawaomba wananchi wapuuze kauli hiyo na hizo ni ishara za waziwazi za kushindwa kwa CUF, hivyo wanatafuta mahali pa kutua lawama au visingizio baada ya matokeo ya ushindi kutangazwa," alisisitiza.

Alisema CCM Zanzibar ina hakika itashinda uchaguzi mkuu kama kama ilivyokuwa miaka ya nyuma, kutokana na hamasa kubwa ya wananchi wanaojitokeza katika mikutano na kukubalika kwa sera za chama.

Alisema UVCCM itaendelea kuhamasisha vijana kujitokeza katika mikutano hiyo ili waweze kupata fursa ya kusikia Ilani na pia wataendelea kuwahamasisha wajitokeze kwa wingi kupigakura.