WAFUASI 30 WA CHADEMA WAJIUNGA NA CCM KARATU

NA LILIAN JOEL, ARUSHA

HALI bado ni tete ndani ya CHADEMA, kutokana na wimbi la wanachama wake kukihama na kujiunga na CCM, ambapo zaidi ya wafuasi wake 30 wilayani Karatu wamekihama chama hicho.

Wanachama hao walikihama chama hicho juzi, wakati wa mkutano wa hadhara wa kampeni uliohutubiwa na Mwenyekiti wa UVCCM Taifa, Sadifa Juma Hamis, alipokuwa akimuombea kura mgombea urais wa CCM, Dk. John Magufuli, mgombea ubunge wa Karatu, Dk. Wilbard Lory na madiwani wa CCM.

Mkutano huo ulifanyika katika kata ya Dumbechand na kuhudhuriwa na mamia ya wananchi, ambapo wanachama wa upinzani, hususan CHADEMA, waliokuwa kwenye mkutano huo, walivutiwa na sera nzuri na kuamua kurejesha kadi zao na kupewa za CCM.

Akizungumza kwa niaba ya wenzake, Anna Bohay alisema kata yao inakabiliwa na changamoto kubwa ya maji pamoja na miundombinu na kwamba, kipindi cha uchaguzi CHADEMA iliahidi kuwaletea maendeleo lakini haikufanya hivyo.

“Tulipotea njia, tumedanganywa vya kutosha, hatudanganyiki tena na sasa tumeamua kurudi CCM kwa kuwa ahadi zake zinatekelezeka na tutafanya kampeni usiku na mchana kuhakikisha CCM inashinda kwa kishindo katika wilaya ya Karatu,” alisema.

Akizungumza katika mkutano huo, Sadifa aliwataka wananchi kuichagua CCM katika uchaguzi wa mwaka huu, utakaofanyika Oktoba 25, ili iweze kuwaletea maendeleo ya uhakika na kwa wakati.

Alisema serikali itakayoongozwa na Dk. Magufuli, itakuwa ya mapinduzi ya viwanda, ambapo itatoa ajira za uhakika kwa vijana ili kutatua changamoto hiyo kubwa, ambayo kwa sasa inawakabili vijana wengi hapa nchini, wakiwemo wasomi.

Akizungumzia migogoro ya ardhi katika kata ya Mang’ola, inayosababishwa na wawekezaji waliohodhi ardhi kinyemela, alisema baada ya uchaguzi mkuu kumalizika, kero hiyo itatatuliwa mara moja na kurejesha mashamba hayo kwa wananchi.

“Mwekezaji hawezi kuhodhi ardhi na kukaa nayo bila kuiendeleza. Mashamba yote ambayo hayaendelezwi, nitamuomba rais ayafutie hati na kuwamilikisha wanachi ili waweze kulima na kuongeza kipato cha familia,”alisema.