MWISHO WA SIMU FEKI NI LEO

WAKATI Mamlaka ya Mawasiliano Tanzania (TCRA), ikitarajia kuzima simu 'feki' leo, imesema idadi ya simu nchini hazitazimwa kwa kuwa zinakidhi vigezo na ni halisi.

Imesema asilimia 96.95, ya simu nchini ni halisi, ambapo zimethibitika kupitia namba  tambulishi za  simu  halisi (IMEI).

Akizungumza  Dar es Salaam jana, Kaimu Mkurugenzi Mkuu wa TCRA, Mhandisi  James  Kilaba, aliwataka  wauzaji wa vifaa vya mawasiliano  vya mkononi,  kutambua  kuwa ni kosa kisheria  kubadilisha  namba tambulishi  za vifaa vya simu.

Pia, alisema yeyote atakayehusika kubadili namba hizo, atakumbana na adhabu ya  kifungo cha hadi miaka 10 au faini isiyopungua sh. milioni 30 au  vyote kwa pamoja.

Mhandisi  Kilaba aliwataka  wafanyabiashara wa simu nchini,  kuhakikisha  wanaleta simu zenye  viwango  na zilizohakikiwa  na Shirika la Viwango Tanzania (TBS) na  kuwa na  leseni kutoka TCRA.

Alisema leseni hizo ni kwa  mafundi simu, ambao wanatakiwa kuanza mchakato  wa kuzipata kwa ajili ya shughuli zao za utengenezaji simu  na kuweka utaratibu  wa kuwaorodhesha wateja wao ili  kuepuka  mtandao wa wizi wa simu nchini.

Kilaba  alieleza faida za   mfumo rajisi wa namba tambuishi kuwa ni kupunguza wizi kwa njia  ya simu, kuhimiza utii wa sheria  na kujenga  misingi  ya matumizi  ya simu  halisi  zisizo bandia.

Alisema  pamoja na jitihada zilizofanywa na mamlaka na wadau wengine, bado katika  kuelekea kuzima mitambo ya simu bandia,
kuna changamoto ambazo ni uaminifu kuwa mdogo kwa  baadhi  ya wauzaji wa simu  kwa kutoa  punguzo kwa wananchi  na kuwashawishi  kununua simu bandia  kwa bei nafuu.

Changamoto nyingine ni  gharama kubwa kuwafikia wananchi  na  kuwaelimisha ili  waweze kuelewa zaidi  juu ya mpango  mzima  wa  kuhakiki simu zao na  uelewa mdogo  kwa  wananchi katika kuitikia wito wa kuhakiki simu zao kwa kipindi cha mpito.

“Tangu Desemba, mwaka jana, tumejitahidi kufanya kampeni  ya kutoa elimu juu ya  kuhakiki namba tambulishi na vifaa vya  simu  za mikononi katika mikoa ya Tanga,  Kilinanjaro,  Arusha na Manyara,"alisema na kuitaja mikoa mingine kuwa ni  Mbeya, Rukwa, Ruvuma, Iringa, Dodoma, Singida, Tabora, Mwanza,  Shinyanga, Geita, Simiyu, Mara, Kagera na Zanzibar.

Aliwataka watanzania kuhakiki simu zako iwapo ni za bandia   kwa kuwa kuanzia leo, hakutakuwepo na simu bandia itakayoweza kufanya kazi nchini.