SERIKALI YAOKOA BIL 25/ KWA KUWABAINI WATUMISHI HEWA

SERIKALI imeokoa  sh. bilioni  25 kwa kuwaondoa watumishi  hewa 12,246,  kwenye mfumo wa malipo ya mishahara kwa kipindi cha Machi Mosi  hadi  Mei  30, mwaka huu.

Akizungumza Dar es Salaam, jana, Waziri wa  Nchi,  Ofisi ya  Rais Menejimenti  ya Utumishi  wa  Umma  na Utawala Bora , Angellah Kairuki, alisema watumishi  hao wameondolewa kwenye  mfumo huo wa malipo ya mishahara kutokana na sababu mbalimbali.

Alizitaja sababu hizo kuwa ni  kutimiza umri wa kustaafu kwa lazima  au kufukuzwa kazi, vifo, kuhitimishwa kwa  mikataba  na ugonjwa.

Angellah alisema fedha hizo  zingepotea kama  watumishi hao wasingeondolewa kwenye mfumo.

Alisema watumishi wengine hewa 10, 295 waliondolewa kwenye mfumo huo Aprili 3, mwaka huu, ambapo jumla ya sh. bilioni 23.2 ziliokolewa,
ikiwa ni ongezeko la watumishi  1,951, ambapo  sh. billoni 1.8,ziliokolewa ndani ya mwezi mmoja.

Angellah  aliwataka  wakuu wa taasisi  zote za umma  na mamlaka  za serikali  za mitaa, kuwasilisha taarifa za watumishi hewa kabla ya 
Juni 15, mwaka huu.

Alisema taarifa hizo zitasaidia kufanya tathmini na kupata uhakiki  wa zoezi  zima  ili kuondoa watumishi hao na kuziwasilisha kwa Rais Dk. John Magufuli.

Akizungumzia maadhimisho ya wiki ya utumishi wa umma mwaka huu, alisema yatadhimishwa kuanzia Juni 16 hadi 23,  mwaka huu na  kauli mbiu ni 'Uongozi  wa umma kwa ukuaji jumuishi kuelekea katika Afrika  tunayoitaka'.

Aliwataka watendaji wakuu wa wizara, idara zinazojitegemea na wakala wa taasisi  za serikali, kutenga siku moja kwa ajili ya kukutana  na watumishi  sehemu za kazi ili kusikiliza kero zao kwa lengo la kuzitafutia ufumbuzi.