ASKOFU NGONYANI AWATAKA WATANZANIA KUCHAGUA VIONGOZI WAADILIFU

Na Clarence Chilumba, Mtwara

ASKOFU wa Kanisa Katoliki Jimbo la Lindi, Mhashamu Bruno Ngonyani, amewataka Watanzania kudumisha amani iliyopo kwa kuchagua viongozi wenye uadilifu na watakaotenda haki na usawa kwa watanzania wote.

Alitoa wito huo juzi, wakati akiongoza Ibada ya kufunga mwaka kwa familia za Kikristo, iliyofanyika kwenye viwanja vya Chuo Kikuu cha SAUTI, tawi la Mtwara na kuhudhuriwa na waumini kutoka majimbo saba yanayounda Kanda ya Kusini.

Alisema amani ni kitu muhimu kwa ustawi wa Taifa na kwamba amani hiyo hutoweka pindi yanapotokea machafuko huku waathirika wakubwa wakiwa kinamama na watoto.

Alisema mwaka huu ni wa kipekee katika historia ya siasa za Tanzania kwani, wananchi wa rika mbalimbali wamekuwa wakijitokeza kwa wingi kushiriki kwenye mikutano ya kampeni huku akiwaomba kuchagua kiongozi atakayekuwa na sera nzuri kwa taifa.

“Wananchi mnapaswa kupima ahadi zinazotolewa na wagombea wa vyama vyote vya siasa kama zinatekelezeka au hazitekelezeki ili siku ya kupiga kura, mfanye maamuzi sahihi kwa kumchagua kiongozi aliyetoa ahadi zinazotekelezeka,” alisema Ngonyani.

Kwa mujibu wa kiongozi huyo wa Kanisa, wananchi wenyewe nao wanapaswa kutendeana haki huku akiiomba serikali nayo kutenda haki kwa raia wake katika kipindi hiki cha uchaguzi kwa kuwa ni jukumu la serikali kufanya hivyo.

Kaimu Mkuu wa Mkoa wa Mtwara, Johansen Bukwali, alisema jambo la muhimu ni kudumisha familia na  amani kwa kutii utawala uliopo na kutekeleza kanuni zilizopo ili uchaguzi uwe huru na wa amani kwani baada ya uchaguzi, maisha yanaendelea.