KANDORO AWAPA DARASA MAWAKALA WA VYAMA VYA SIASA

NA SOLOMON MWANSELE, MBEYA

MKUU wa Mkoa wa Mbeya, Abbas Kandoro, ameonya kuwa mawakala wa vyama vya siasa hawaruhusiwi kuingilia kazi za watendaji wa uchaguzi waliopo vituoni.

Hata hivyo, amesema mawakala hao wataruhusiwa kuwepo katika vituo vya kupigiakura kwani hilo ni jambo muhimu na linalodhihirisha uwazi katika uchaguzi.

Kandoro aliyasema hayo jana, wakati akifungua mafunzo kwa waratibu wa uchaguzi wa mikoa, wasimamizi, maofisa na wasimamizi wasaidizi wa uchaguzi ngazi ya jimbo kutoka mikoa ya Iringa na Mbeya.

Mafunzo hayo yanafanyika kwenye ukumbi wa mikutano uliopo katika Halmashauri ya Wilaya ya Mbeya.

Alisema watendaji wanapaswa kufanya mambo yote kwa uwazi na kuwashirikisha mawakala wa vyama vya siasa kwa mujibu wa sheria na taratibu zilizopo, ili kuepusha malalamiko yasiyo na msingi.

“Wajibu wa mawakala wa vyama vya siasa ni kuangalia sheria, kanuni na taratibu zilizowekwa na tume zinazingatiwa katika mchakato mzima wa kupigakura hadi kutangaza matokeo,” alisema Kandoro.

Aliwataka wakurugenzi  wa halmashauri za mikoa ya Mbeya na Iringa, kuhakikisha wanavihakiki vifaa na fomu mbalimbali watakazokabidhiwa na Tume ya Taifa ya Uchaguzi, ili kuona kama vinakidhi mahitaji na viko sahihi.

Kandoro alisema katika uchaguzi mkuu uliopita, miongoni mwa matatizo yaliyojitokeza, ambayo yanawahusisha moja kwa moja watendaji hao  wa uchaguzi ni pamoja na kutohakiki vifaa na fomu hizo hivyo kusababisha uchaguzi kuahirishwa katika baadhi ya kata na majimbo.