HAPA KAZI TU, UTAFITI WA TWAWEZA WAMPA USHINDI DK. MAGUFULI DHIDI YA LOWASSA

Na waandishi wetu

MGOMBEA urais wa CCM, Dk. John Magufuli, ameendelea kung’ara dhidi ya wagombea wa upinzani ambapo, utafiti  umeonyesha kuwa atapata ushindi wa asilimia 66.

Huu ni utafiti wa pili kutolewa ndani ya wiki moja, ambapo ule wa awali uliofanywa na CCM ulionyesha Dk. Magufuli atashinda kwa asilimia 69.5 dhidi ya mgombea urais wa CHADEMA, Edward Lowassa.

Katika utafiti huru uliofanywa na Taasisi ya Twaweza, uliotangazwa jana mjini Dar es Salaam, umeonyesha kuwa Dk. Magufuli bado ni kinara dhidi ya wagombea wengine.

Pia, makundi yote yakiwemo wazee, vijana na wanawake wanamuunga mkono Dk. Magufuli kwa zaidi ya asilimia 60, ikilinganishwa na Lowassa mwenye asilimia chini ya 28.

Pia, CCM kimeendelea kuwa chama chenye mvuto na kilicho karibu na wananchi kwa asilimia 62, kikifuatiwa na CHADEMA chenye asilimia 25. Vyama vingine ni na asilimia zao kwenye mabano ni CUF (2), ACT WAZALENDO (1), NCCR-MAGEUZI (0).

Mbali na urais, pia utafiti huo umeonyesha wagombea wa nafasi za ubunge na udiwani wa CCM watapata ushindi wa asilimia 60, wakifuatiwa na CHADEMA yenye asilimia 24.

Vyama vingine ni CUF chenye asilimia mbili, ACT WAZALENDO na NCCR-MAGEUZI vyenye asilimia moja.

Akitangaza matokeo ya utafiti huo jana, Mkurugenzi Mtendaji wa TWAWEZA, Aidan Eyakuze, alisema utafiti huo ni wa kwanza na umezingatia matakwa ya wananchi katika mikoa ya Tanzania Bara.

Alisema utafiti huo umefanywa kwa wananchi kupitia simu za mkononi ukiwa na uwakilishi wote wa kitaifa.

Alisema walichukua maeneo ya wakazi kinasibu kutoka kwenye kaya 100 ambako katika kila kaya hizo, walimteua mtu mmoja kwa kuzingatia rika la upigaji kura.

Alisema kuwa utafiti huo uliopewa jina la Sauti za Wananchi, ulibainisha kuwa kati ya watu watatu waliohojiwa, wawili walisema watampigia kura Dk. Magufuli.

Hatua hiyo inatokana na kukubalika kwa Dk. Magufuli, ambaye anaaminiwa na Watanzania wengi kutokana na utendaji kazi wake na kutokuwa na kashfa.

Kingine ni dhamira yake katika kupambana kulinda rasilimali za taifa na kwamba, ana uwezo wa kudhibiti vitendo vya ufisadi ikilinganishwa na wengine.

Katika utafiti huo, pia imebainika kuwa wananchi hawana imani na Lowassa kama ana uwezo wa kupambana na ufisadi hivyo, hafai kuaminiwa.

Pia, utafiti huo umeonyesha watu wote waliohojiwa wamesema Lowassa si mwaminifu hivyo, hawana imani na hawafahamu ni kwa vipi anaweza kupambana na ufisadi.

Pia, wamesema mgombea huyo wa CHADEMA hana tabia ya kuwajali wananchi wanyonge.

Katika kipengele hicho, Lowassa ambaye alijiuzulu wadhifa wa Waziri Mkuu kwa kashfa ya Richmond, alipata alama sifuri.

Kwa mujibu wa Eyakuze, CCM pia imeendelea kung’ara kwenye ngazi ya ubunge na udiwani ambapo, utafiti umeonyesha kitapata ushindi wa asilimia 60, CHADEMA asilimia 26, CUF asilimia 3 huku ACT Wazalendo na NCCR-MAGEUZI vikishika mkia.

Pia, katika utafiti huo asilimia mbili ya wananchi walisema bado hawajaamua watawapigia kura wagombea wa chama gani.

Hata hivyo, utafiti huo umeweka bayana kuwa asilimia 98 ya wananchi, wamesema wamejiandikisha kupiga kura huku zaidi ya asilimia 99 wakionyesha dhamira ya  kutumia haki yao ya kupiga kura.

Eyakuze, alibainisha kuwa sababu za wananchi kumuunga mkono Magufuli inatokana na rekodi nzuri ya kiutendaji, uwezo wa kutatua matatizo ya wananchi ikiwemo kupambana na ufisadi, uaminifu pamoja na sera nzuri za chama chake.

Pia, utafiti huo umebainisha kuwa, afya, upatikanaji wa maji, elimu na masuala ya umasikini na uchumi, zimekuwa kero zenye kupewa kipaumbele na wananchi wakitaka zitafutiwe ufumbuzi wa kudumu.

NAFASI YA UKAWA

Kwa mujibu wa Eyakuze, utafiti huo umebainisha kuwa, wananchi hawaelewi nafasi ya kundi la Ukawa kwenye uchaguzi mkuu wa Oktoba 25, mwaka huu.

Hali hiyo imejitokeza baada ya asilimia 49 ya wananchi kudhani Ukawa ni chama cha siasa kilichosajiliwa huku asilimia 57 wakitegemea kuwepo kwa jina hilo kwenye karatasi za kupigia kura.

Hivyo kuna uwezekano wa kuongezeka kwa hali ya kutokuwa na uhakika wa maamuzi ya wapigakura kuhusiana na kundi hilo.

Mbali na utafiti huo wa TWAWEZA, malumbano ya ndani ya umoja huo hususan kushindwa kuzingatia makubaliano ya mgawanyo wa mjimbo yamezua hali ya kutoaminiana.

Matokeo ya utafiti huo yanatokana na kundi la awamu ya kwanza la wahojiwa 1,848 lililoundwa Agosti na Septemba, mwaka huu, ambapo matokeo ya utafiti huo yanatoa picha halisi jinsi wapiga kura wanavyowaunga mkono wagombea.

Utafiti huo haukufanyika upande wa Zanzibar kwa sababu eneo hilo lina sheria zake zinazohusu masuala ya utafiti hivyo, TWAWEZA haina kibali cha kuendesha tafiti kwenye visiwa hivyo.

Makamba: Utafiti haujibiwi kwa matusi

Mjumbe wa Kamati ya Kampeni ya Ushindi ya CCM,  January Makamba, amewataka wote wanaobeza utafiti wa TWAWEZA kuacha kufanya hivyo kwa kuwa utafiti wowote haujibiwi kwa matusi.

Alitoa kauli hiyo jana muda mfupi baada ya utafiti wa TWAWEZA, ambapo alisema ni vyema wale wanaotoa shutuma kuacha kufanya hivyo na badala yake wajikite kujibu utafiti huo kwa utafiti mwingine na waamini CCM inapendwa mno na Watanzania.

"Tafiti yeyote haijibiwi kwa matusi dhidi ya utafiti au mtafiti, bali jibu la tafiti ni kuja na utafiti mbadala dhidi ya huo uliotolewa,'' alisema January.

Mbali na January, wanasiasa wengi wameridhishwa na utafiti huo, akiwemo mgombea ubunge wa Jimbo la Nzega Vijijini, Dk. Khamis Kigwangalla, aliyesema Watanzania wamefanya uamuzi sahihi.

Alisema utafiti wa TWAWEZA umefanyika kwa wakati mwafaka na Watanzania, wamepata ukweli wa mambo.

Alisema utafiti huo ni sahihi na umekuja na majawabu bora yenye mwelekeo sahihi, ambapo watanzania wamepaza kauli zao kupitia utafiti huo, ambao ni bora.