LOWASSA ANA MATATIZO-CCM

Na Mwandishi Wetu

CHAMA cha Mapinduzi (CCM), kimekemea vitendo vya vurugu na uvunjifu wa amani vinavyofanywa na vyama vilivyo kwenye kundi la UKAWA ili kuwapa fursa wananchi kusikiliza sera na Taifa libaki na umoja, mshikamano na utulivu baada ya uchaguzi.

Pia, Chama kimevitaka vyama vinavyounda UKAWA, viwaambie ukweli Watanzania kuhusu sababu za mgombea wao wa nafasi ya urais, Edward Lowassa kushindwa kuhutubia baadhi ya mikutano ya hadhara badala ya kuwahadaa kwa kutengeneza matukio na vioja ili kuficha udhaifu wake.

Kwa mujibu wa taarifa iliyotolewa na CCM kwa vyombo vya habari jana, kupitia kwa Mjumbe wa Kamati ya Kampeni, January Makamba, CCM imesikitishwa na matukio ya vurugu yaliyofanywa na wafuasi wa UKAWA katika mikoa ya Tanga na Mbeya mapema wiki hii.

Juzi, akiwa mkoani Tanga, Lowassa alipangiwa kuhutubia, lakini wafuasi wa vyama hivyo waliwarushia mawe viongozi wa CCM na kutupa chupa, nyingine zikiwa na mikojo, kwa lengo la kutaka kuzusha vurugu.

“CCM tumesikitishwa sana na vitendo vya wafuasi wa UKAWA kurusha mawe na chupa, nyingine zikiwa na mikojo kwenye Ofisi ya CCM Mkoa wa Tanga kabla na baada ya mkutano wao uliofanyika Uwanja wa Tangamano.

“Ifahamike kwamba tukio la Tanga si la kwanza kwani Septemba 27, mwaka huu, viongozi wa UKAWA waliwapanga vijana katika Stendi ya Uyole mkoani Mbeya, kwa lengo la kumfanyia vurugu mgombea wa CCM, Dk. John Magufuli, na kumpigia kelele ili wananchi wasimsikilize.

“Kwa bahati nzuri, mgombea wetu alikabiliana na hali hiyo kwa kuonyesha ukomavu mkubwa wa kisiasa, lakini vitendo vile havikuwa vya kistaarabu. Mashabiki na wafuasi wa CCM wana uwezo wa kufanya mambo kama hayo, tena kwa ufanisi zaidi, lakini hatuoni kama hiyo ni namna bora ya kuomba ridhaa ya kuongoza Watanzania,” alisema January.

Aliviasa vyama hivyo kuwahimiza mashabiki wao kuachana na mwenendo wa vurugu katika kipindi kilichobaki cha kampeni ili kuhakikisha kuwa nchi inabaki salama mara baada ya Uchaguzi Mkuu wa Oktoba 25, mwaka huu.

“Tukio la Ofisi ya CCM Tanga kupigwa mawe limewaudhi na kuwakera wapenda amani wa mkoa huo. Hata hivyo, viongozi tumewasihi kuwa wasilipize kisasi. CCM ina dhamana ya kuongoza na kulinda amani ya Watanzania, lakini wenzetu hawana dhamana hiyo.

“CCM ina uhakika wa kushinda na kushika dola, lakini UKAWA wana uhakika wa kushindwa na tayari wameanza kuonyesha ishara za kukata tamaa. Tunawapongeza wana CCM kote nchini kutokana na utulivu waliouonyesha katika wakati wote wa kampeni hadi sasa,” alisema Makamba.

Taarifa hiyo ya CCM pia imeeleza tukio la kuahirishwa kwa mkutano wa hadhara uliopangwa kuhutubiwa na Lowassa juzi, mjini Tanga kuwa ni hadaa na vioja ambavyo havitakiwi kufanyika katika siasa za sasa.

Katika taarifa hiyo, January alieleza kuwa wakati umefika kwa viongozi wa genge la UKAWA kuwa wakweli na kueleza sababu za kweli za kuahirishwa kwa mkutano huo pamoja na mingine ambayo inatolewa maelezo ya hadaa.

Viongozi wa UKAWA walitangaza kuahirisha kufanyika kwa mkutano huo kwa madai ya kujaa kwa watu wengi kiasi cha kuhatarisha uhai wa waliohudhuria mkutano huo.

“Hii si mara ya kwanza kwa wenzetu kutafuta kisingizio cha kutofanya mkutano wa kampeni. Walipokuwa Geita, walitangaza kuahirisha mkutano kwa madai kuwa jukwaa na vipaza sauti havikuwa vikifanya kazi ingawa aliyetangaza hivyo alipanda kwenye jukwaa na kutangaza kwa kutumia vipaza sauti. Mabadiliko wanayohubiri wenzetu yanaanza na kusema ukweli.

“Imefika wakati sasa viongozi wa Ukawa wawaeleze ukweli Watanzania kuhusu mgombea wao kushindwa kuhutubia baadhi ya mikutano au kuhutubia kwa dakika tatu kuliko kuwahadaa kwa kutengeneza matukio na vioja badala ya kueleza mapungufu ya mgombea wao.

“Katika mikutano ya kampeni, ikiwamo ya CCM na mingine katika shughuliza kitaifa, ni kawaida kwa watu kuzidiwa na kupewa huduma ya kwanza wakati mikutano ikiendelea. Hii ni mara ya kwanza ambapo mkutano wa kisiasa unaahirishwa kwa sababu ya wingi wa watu,” alisema Makamba.

Katika taarifa yake hiyo, CCM iliwashukuru wanachama wake wa mkoani Tanga kwa kubaini na kutorubuniwa na propaganda nyepesi ya UKAWA kwamba mkutano wa Tangamano uliahirishwa kwa sababu ya wingi wa watu.