DK. SHEIN ATASHINDA KWA ASILIMIA 60-CCM

Na Hamis Shimye, Zanzibar

CHAMA Cha Mapinduzi (CCM), kimesema mgombea wake wa urais wa Zanzibar, Dk. Ali Mohammed Shein, atashinda kwa asilimia zaidi ya 60 dhidi ya wapinzani wake.

Kimesema ushindi huo unatokana na tathmini yao walioifanya visiwani hapa pamoja na kukubalika kwa Dk. Shein kwa makundi yote ya jamii ndani ya visiwa vya Unguja na Pemba.

Tathmini hiyo ya awali ya ushindi ilitolewa jana na Naibu Katibu Mkuu wa CCM-Zanzibar, Vuai Ali Vuai, katika ukumbi wa mikutano wa Afisi Kuu ya CCM, Kisiwandui-Zanzibar. 

Alisema tathmini hiyo ya awali iliyofanywa na CCM inabainisha kuwa Chama kimefanikiwa sana kwenye kampeni zake kutokana na kukubalika kwa wananchi wake.

"Uhudhuriaji wa watu kwenye kampeni zetu kwa wingi tena kwa makundi ni kielelezo kimojawapo na pia utekelezaji wa Ilani ya Uchaguzi kwa mwaka 2010 kwa asilimia 90," alisema.

Naibu Katibu Mkuu huyo alisema dalili za ushindi kwa CCM zimeanza kuonekana mapema tangu ilipozindua kampeni zake na kutoa viashiria vingi.

Alisema miongoni mwa sababu kubwa zinazomfanya Dk. Shein kupata ushindi huo ni pamoja na udhaifu wa vyama vya upinzani, ikiwemo CUF na mgombea wake Maalim Seif Shariff Hamad.

Vuai alisema sababu nyingine inayompa ushindi Dk. Shein ni kushindwa mara nne kwa Maalim Seif katika uchaguzi uliofanyika katika awamu nne tofauti huku mgombea wa CCM akitelekeza ilani kwa vitendo pamoja na vigezo vingine 19.

Kwa mujibu wa Vuai, tathmini hiyo wameifanya kwa umakini mkubwa kuanzia ngazi ya shehiya hadi taifa.

"Tuna mtandao mpana na tunajua ni wanachama wangapi watatupa kura, wakeretwa wetu ni kina nani na vipi watatupa kura. Hivyo hatuna wasiwasi na ndio maana tunasema uchaguzi huu tutashinda zaidi ya asilimia 60," alisema.

Alisema kwa siasa za Zanzibar ni rahisi kujua kura zako kwani jamii nyingi zinajuana na ndio maana CCM imekuja na tathmini hiyo ya ushindi. 

Vuai alisema hata katika visiwa vya Pemba, mwamko wa wananchi umekuwa mkubwa zaidi na kuanza kuwa na imani kubwa na CCM kutokana na sera zake.

Alisema awali, Pemba kulikuwa na siasa za vitisho hasa kwa wafuasi wa CCM kupigakura kwa woga na kuipenda CUF na ndio maana vijana wengi wamechoshwa na siasa za Maalim Seif.

Alisema utekelezaji wa ilani, kukuza pato la Zanzibar, kukuza zao la karafuu na utekelezaji wa ujenzi bora wa miundombinu ni miongoni mwa mambo yanayoipa ushindi zaidi CCM kwenye uchaguzi huu.

Vuai alisema serikali ya umoja wa kitaifa ipo kikatiba na hata kama wakishinda uchaguzi kwa asilimia nyingi, hawataivunja serikali hiyo.

Alisema chochote kinachotaka kutokea kwenye serikali lazima kiendane na Katiba iliyotengeneza serikali hiyo.

"Hapa lazima Chama kiseme wazi kuwa hakuna anayeweza kuvunja serikali ya umoja wa kitaifa kwa kuwa ipo kikatiba,” alisema.

AWAPONDA WANASIASA UCHWARA

Akizungumza kuhusiana na mafuta na gesi, Dk. Shein alisema Rasimu ya Muswada wa Sheria ya Mafuta na Gesi upo tayari ofisini kwake.

Pia, ameeleza kushangazwa kwake na baadhi ya wanasiasa wanaotaka kuchukua ujiko wa suala hilo, ambalo kwa kiasi kikubwa lilishamaliza kufanywa na serikali yake.

Alisema yeye si mtu wa kujisifia na angekuwa ni mtu wa hivyo, angetaka sifa hizo kwa kuwa alianza kulishughulikia suala la mafuta na gesi tangu alipokuwa Makamu wa Rais wa Jamhuri ya Muungano wa Tanzania.

"Nawashangaa sana wanaojisifia, lakini hawajui ukweli na hili lazima Wazanzibar mlifahamu kuwa nilianza kulifanyia kazi muda mrefu sana,” alisema.

Pia, alisema tayari serikali imeshaingia makubaliano ya awali na baadhi ya nchi ikiwemo Uholanzi kwa ajili ya utafiti wa mafuta na gesi visiwani humo.

Hata hivyo, alisema baada ya makubaliano hayo kuna nchi zaidi ya saba zimeonyesha nia, lakini amewataka wasubiri hadi sheria itakapoanza.