MAGUFULI AISHIKA PABAYA UKAWA

Na Waandishi Wetu

NI dhahiri kundi la UKAWA na mgombea urais wao, Edward Lowassa, wameshikwa pabaya na mgombea urais wa CCM, Dk. John Magufuli, ambapo sasa wameanza kuweweseka.

Dk. Magufuli, ambaye amekuwa akipata umati mkubwa kwenye mikutano yake ya kampeni na maeneo yote anayopita, amekuwa mahiri katika kunadi Ilani ya Uchaguzi ya CCM na kutoa ahadi zinazotelekezeka.

Pia, timu ya makada wa CCM ambayo imekuwa ikizunguka naye kwenye maeneo mbalimbali nchini, imekuwa kikwazo kikubwa kwa UKAWA na mgombea wao, ambaye amekuwa akishindwa kunadi Ilani na kuzungumza kwa dakika chache.

Hilo limekuwa kikwazo kikubwa na sasa UKAWA wameibuka na madai mapya wakidai CCM  kinavunja kanuni na taratibu za uchaguzi, jambo ambalo hawatakubaliana nalo.

Akizungumza na waandishi wa habari jijini Dar es Salaam, jana, Mwenyekiti wa CHADEMA, Freeman Mbowe, alidai kauli zinazotolewa na makada wa CCM akiwemo Mwenyekiti wa WAZAZI Taifa, Abdlaah Bulembo, zinaashiria vurugu.

Kwa mujibu wa Mbowe,  Bulembo alikaririwa akizungumza kwenye mikutano ya kampeni akisema kuwa CCM haitakuwa tayari kuachia Ikulu.

Mbowe alisema kauli hiyo ni ya uchochezi na inaondoa umuhimu wa uchaguzi kwa kuwa tayari CCM imeshafanya uamuzi na kwamba, Tume ya Taifa ya Uchaguzi (NEC) haijakemea mpaka sasa.

Hata hivyo, Naibu Katibu Mkuu wa CCM, Shaka Hamdu Shaka, amesema kauli ya Mbowe ni ishara kuwa wameshikwa pabaya na mgombea wao hana uwezo wa kupambana na Dk. Magufuli.

Alisema CHADEMA ni mabingwa wa siasa chafu kwani, juzi walitangaza kumfikisha Dk. Magufuli mahakamani na sasa wamemgeukia Bulembo, lakini watambue kipigo kiko pale pale.

Katika mkutano huo, Mbowe mbali na kuibua madai hayo pia alikiri UKAWA kukabiliwa na changamoto nzito ya mgawanyo wa majimbo.

Alisema shutuma zinazotolewa na viongozi wa vyama vingine vinavyounda UKAWA dhidi ya CHADEMA, hazina tija na kuwa ukweli wanaujua.

Alisema shutuma hizo zinaonyesha kuwa viongozi hao wamefika thamani ya bei na hawatambui kuwa vyama na wagombea wao hawana uwezo wa kuongoza.

Alisema viongozi hao kamwe wasitarajie CHADEMA kuwapa majimbo ya uchaguzi kama zawadi na badala yake vigezo huangaliwa.

Alhamisi Makamu Mwenyekiti wa NCCR-MAGEUZI, Leticia Masore, Katibu Mkuu Mosena Nyambabe na viongozi wengine wa juu, walilalamikia hatua ya CHADEMA kuwaburuza na kumtaka Mwenyekiti wao, James Mbatia, kutetea maslahi ya chama.

Pia, wameahidi kupambana kuhakikisha hadhi na heshima ya chama hicho inarejea tofauti na ilivyo sasa ambapo, kimedhoofika baada ya kujiunga na UKAWA.

“Watu wanalalamika wakati wanajua vyama vyao na wagombea hawana uwezo wa kuongoza… kupata jimbo ni kazi nzito sio wanalialia tu ooh tumenyimwa majimbo kwani hawajui hawana sifa za kugombea na kushinda.

“Nawashauri waache kupiga kelele na kumshambulia Mbatia…wakajipange kisiasa.

Wanalalamika wajue wamenyimwa majimbo likiwemo la Serengeti na Segerea ambapo, jimbo mojawapo tumempa Julius Mtatiro…mgombea wetu ana sifa zote za kushinda, lakini CUF walituomba tukamuachia na tukisema aendelee na kampeni peke yake bila kumuunga mkono hatashinda, hivyo wasitegemee walale wapewe viti,” alisema Mbowe.

Aliwaponda viongozi hao kuwa kelele zao ni mwendelezo wa siasa za majitaka ambazo zimewahi kufanywa na baadhi ya viongozi wengine wa UKAWA akiwemo Dk. Wilibroad Slaa.

Aidha, Mbowe alikwenda mbali zaidi na kudai kuwa Mbatia ana ulinzi wa kutosha wa vijana wa Red Bridged, kauli ambayo inaashiria kuwa ndani ya NCCR-Mageuzi hali ni mbaya.

Hata hivyo, alikiri changamoto kwenye mgawanyo wa majimbo ni kubwa na kwamba, wataendelea kuzifanyia kazi.

Kwa upande wake, Shaka alisema madai ya Mbowe hayana tija kwani wao ndio wamekuwa vinara wa kutoa kauli za kuvuruga amani.

Alisema matamshi yanayotolewa na viongozi wa UKAWA ni hatari ikiwemo kuwataka wananchi kutoondoka vituoni ili kulinda kura, kufanya kampeni kwa misingi ya udini, kuandaa vijana kwa ajili ya vurugu na kutangaza kuwa wataibiwa kura.

“Hizi ni kauli za mfa maji, hivyo waacheni watape tape kwanza hadi Oktoba 25, mwaka huu, ndio itakuwa kifo cha UKAWA. Wameingiza vijana msituni, wanashambulia wafuasi wetu kwenye mikutano, wanaomba kura kanisani yote hayo hawaoni.”

“Tunafahamu hali yao ni mbaya sana…wamegawanyika vipande na hawana umoja tena, hivyo wanatafuta sababu za kuonewa huruma…wakumbusheni kuwa kwa Dk. Magufuli ni kazi tu,” alisema Shaka.

Lowassa, Sumaye ni

pwagu na pwaguzi

Katika hatua nyingine Shaka alisema usanii unaofanywa na Waziri Mkuu mstaafu, Frederick Sumaye kumnadi mgombea urais wa CHADEMA, Edward Lowassa, ni sawa na vichekesho vya pwagu na pwaguzi.

Lowassa, ambaye alijiuzulu kwa kashfa ya kampuni ya kufua umeme ya Richmond, amekuwa akinadiwa na Sumaye anayetajwa kuwa mbadala kutokana na afya ya mgombea huyo kugubikwa na utata.

Alisema viongozi hao walipewa nafasi za juu ndani ya Chama na serikali, lakini walishindwa kuonyesha ufanisi na badala yake wengine wakaondoka kwa aibu.

Alisema wanachokifanya kwa sasa ni kuwalaghai Watanzania ili wapate nafasi ya kurudi madarakani, jambo ambalo ni ndoto kwao kutokana na mbinu hizo kubainika.

Alikuwa akizungumza kwenye mkutano wa uzinduzi wa kampeni za mgombea ubunge Jimbo la Mtwara Vijijini, Hawa Ghasia uliofanyika Kijiji cha Mango Pacha Nne mkoani hapa.

Alisema kinachoonekana kwa sasa kwenye jukwaa la siasa la CHADEMA ni kituko na kwamba, kamwe hawana ubavu wala dhamira ya kuleta mabadiliko kama wanavyojinadi.

“Sumaye anapomfanyia kampeni Lowassa awe rais ni sawa na pwagu kumfanyia kampeni pwaguzi…hawajui wafanyalo kabisa na pia hawafahamu kuwa hawaheshimiki tena mbele ya Watanzania wanaojitambua.”

“Walipewa nafasi za juu wakashindwa kufanya kazi kwa ufanisi na sasa wamegeukia upekepeke…wakataeni hawa ni wasanii,” alisema Shaka.

Alisema Sumaye akiwa Waziri Mkuu alisababisha halmashauri nyingi nchini kupata hati chafu kwa mujibu wa ripoti za Mkaguzi na Mdhibiti Mkuu wa Hesabu za Serikali (CAG) hivyo hana jipya na la kujivunia mbele ya Watanzania.

Shaka aliwaomba wananchi wa Mtwara Vijijini kumchagua Hawa kwa kura nyingi ili aendelee kuwatumikia na kamwe wasikubali ghiliba za upinzani.

Alisema Hawa ni mwadilifu na ameonyesha uwezo mkubwa katika kusimamia kazi za serikali na ameongoza TAMISEMI kwa mafanikio makubwa huku akizuia vitendo vya wizi, ufujaji wa fedha za miradi kwenye halmashauri.

“Huyu ni mwanamke wa shoka, hodari na makini, msikubali kupoteza hazina hii inayotegemewa na taifa…mpigieni kura kwa sababu ni mwadilifu na makini,” alisisitiza  Shaka.