MAGUFULI ASEMA PISHA NJIA

Mgombea urais wa CCM, Dk. John Magufuli akihutubia maelfu ya wananchi waliofurika kwenye Uwanja wa Samora mjini Iringa, wakati wa mkutano wa kampeni

Dk. Magufuli akisisitiza jambo wakati wa mkutano huo.

Wananchi wakimshangilia Dk. Magufuli alipokuwa akihutubia mkutano wa kampeni kwenye Uwanja wa Samora mjini Iringa

Mgombea ubunge wa jimbo la Iringa Mjini, Frederick Mwakalebela, akiomba kura kwa wananchi wakati wa mkutano huo

Dk. Magufuli akimtambulisha mfanyabiashara, Salim Abri Asas kwa wananchi wakati wa mkutano wake wa kampeni uliofanyika kwenye Uwanja wa Samora

NA WAANDISHI WETU

MGOMBEA urais wa CCM, Dk John Magufuli, ameendelea kuwatia tumbo joto watendaji wa serikali wenye kujilimbikizia mali, kuendekeza vitendo vya rushwa na ufisadi kwa kuwatangazia kiama pindi atakapochaguliwa kuwa rais.

Dk. Magufuli amesema viongozi wa serikali wenye kuendekeza semina, kujilimbikizia fedha huku magari yao wakiyajaza mafuta saa 24 wakati wafanyakazi wa kada ya chini na wananchi wakiteseka, atawashughulikia na hawatompenda kamwe.

Akizungumza na maelfu ya wananchi waliofurika kwa wingi kwenye Uwanja wa michezo wa Samora mjini Iringa jana, Dk. Magufuli alisema kwenye serikali yake wafanyakazi wavivu wakatafute kazi ya kufanya.

Katika hotuba yake, ambayo Dk Magufuli alitumia saa 1:05 huku akishangiliwa na wananchi hao, alisema wafanyakazi wachache wamejinufaisha kwa fedha za rushwa na ufisadi.

Alisema wafanyakazi watakaobainika kufanya vitendo vya ubadhirifu wakatafute kazi zingine nje ya utumishi wa uuma kwani, kwenye serikali yake hatokuwa na nafasi kwa wezi, wabadhirifu na wazembe.

Hata hivyo, amesisitiza kuwa maslahi na mazingira mazuri kwa watumishi wa umma watakaotimiza wajibu wa kuwatumikia Watanzania, yataangaliwa kwa jicho la pekee ili kuwawezesha kufanya kazi kwa ari kubwa.

“Najua kuna wengine wanaharibu eneo moja na kisha wanahamishiwa kwenye ofisi nyingine. Sasa nawaambia wafanyakazi wa aina hiyo kwangu hawatokuwa na nafasi, wakatafute kazi za kufanya na ninafahamu watanichukia,” alisisitiza Dk Magufuli kwa sauti ya ujasiri.

Alisema wafanyakazi wachapakazi wajiandae kupata maslahi mazuri kwa kuboreshewa mishahara yao kama alivyofanya kwenye idara alizokuwa akiziongoza katika Wizara ya Ujenzi.

Dk. Magufuli alibainisha kuwa kutokana na uchapakazi mzuri wa wafanyakazi wa Wakala wa Barabara Tanzania (TANROADS), wafanyakazi wengi wanavutiwa kufanyakazi kwenye taasisi hiyo kutokana na kuwepo kwa maslahi mazuri.

“Sio kweli kuwa nitawabana wafanyakazi wasilipwe vizuri kama baadhi ya watu wanavyodai, leo hii watu wanatamani kufanya kazi TANROADS kutokana na maslahi mazuri yaliyokuwepo pale… kama ningekuwa hivyo kama wanavyodai si wangekimbia kufanyakazi?” Alisema Magufuli.

Katika kuthibitisha kauli hiyo, alisema serikali imeanza kupitia upya mfumo wa ulipaji mishahara kwa watumishi wa umma ili kuhakikisha kila mfanyakazi analipwa mshahara unaoendana na hali halisi ya maisha.

Aliwataka wafanyakazi kumpigia kura ili akapambane na viongozi wao wanaowabana kwa kujilimbikizia mali wakati wao wakiishi kwenye mazingira magumu.

Wananchi waliofurika kwenye uwanja huo walizizima kwa furaha na vifijo baada ya mgombea huyo wa urais wa CCM, kumtaka mwekezaji aliyepewa kiwanda cha usagishaji mkoani hapa, kuhakikisha kiwanda hicho kinafanyakazi kabla ya Oktoba 25.

“Nimepita nikaona kiwanda cha National Milling kimekufa. Sasa namtaka mwekezaji akifufue kabla sijachaguliwa kuwa rais Oktoba 25, akishindwa aandae nyaraka za kukirudisha serikalini tukifufue,” alisema Magufuli.

Alisema wananchi wa mkoa wa Iringa wamechoshwa kuona kiwanda kilichobinafsishwa hakiendelezwi, hivyo kiwanda hicho kitatafutiwa mwekezaji mwingine au kukabidhiwa vijana wa vyuo vikuu wakisimamie.

Alibainisha kuwa pindi atakapochaguliwa, serikali yake imepanga kutengeneza ajira asilimia 9.9 hadi 40, hivyo ajira hizo zinahitaji uwepo wa viwanda vitakavyofanyakazi.

Alisisitiza kuwa mizengwe kwa wawekezaji wenye nia ya kujenga viwanda itaondolewa ili nchi iwe na idadi kubwa ya viwanda vitakavyozalisha ajira kwa wingi.

“Kwenye serikali yangu kama kuna mwekezaji anayetaka kujenga viwanda aje, hakutakuwa na njoo leo au kesho. Kama awe waziri au mtendaji yeyote atakayeendekeza mizengwe hiyo, atatangulia yeye,” aliongeza Dk Magufuli huku akishangiliwa na wananchi waliofurika kumsikiliza.

Aliwaeleza wananchi wa Iringa kuwa, serikali yake itajenga uwanja wa ndege wa mkoa huo kwa kiwango cha lami, sambamba na ujenzi wa barabara kutoka katikati ya mji huo  kwenda Tumaini ili kuondoa msongamano.

Dk. Magufuli alisema katika hatua ya kumaliza tatizo la ajira kwa wahitimu wa vyuo vikuu, serikali yake itawakopesha wahitimu fedha za kuanzisha miradi ya maendeleo.