MAMA SALMA KIKWETE ATEMA CHECHE

Na Mwamvua Mwinyi, Chalinze

MKE wa Rais Jakaya Kikwete, Mama Salma Kikwete, amewataka wapigakura wa Jimbo la Chalinze, wasidanganyike na kutofanya makosa ya kuwachagua wapinzani, badala yake wawachague wagombea wa CCM.

Mama Salma, ambaye pia ni Mjumbe wa Halmashauri Kuu (NEC) ya CCM, amewaomba wananchi hao kumchagua Dk. John Magufuli kuwa rais, Ridhiwani Kikwete kuwa mbunge na madiwani wote kutoka CCM.

Amesema maendeleo ya kweli na ya haraka huletwa na viongozi kutoka ndani ya CCM na kwamba, ndio wenye uwezo na sifa za uwajibikaji.

Aliyasema hayo juzi jioni, wakati akizungumza kwenye mkutano wa kampeni za Ridhiwani, katika Kijiji cha Pera, Jimbo la Chalinze, ambapo alisema wana-Chalinze hawapaswi kuharibu kura kwa kuwapa wapinzani.

“Uongozi si lelemama ndugu zangu, hawa wenzetu wa upinzani bado hawajui lolote ni wababaishaji. Tumchague Dk. Magufuli na Ridhiwani kuwa mbunge wetu kwa sababu ndio wenye sifa za uongozi.

“Huyu Ridhiwani ni mtoto wenu na hajaanza kuisaidia Chalinze leo hivyo, tuendelee kumuunga mkono ili atusaidie zaidi kuinua maendeleo yetu,” alisema.

Naye Subira Mgalu, ambaye ni mbunge mteule wa Viti Maalumu Mkoa wa Pwani, alisema Ridhiwani anatosha kuendelea kuongoza jimbo hilo kutokana na kutekeleza Ilani ya CCM ya mwaka 2010 kwa mafanikio makubwa.

Alitumia fursa hiyo kuwataka vijana, wanawake na wazee kujitokeza kwa wingi wakati wa kupigakura na kumchagua Dk. Magufuli kuwa rais na Ridhiwani kuwa mbunge ili washirikiane kuleta maendeleo.