LOWASSA NI 'KIPANDE CHA CHUPA', AMBACHO UKAWA WANADANGANYWA NI ALMASI

NA CHRISTOPHER LISSA

SISI waafrika ni watu wa ajabu sana. Unajua ni wadogo, lakini nasema, ni udogo wa mawazo. Umaskini wa mawazo ni umasikini mbaya kupita wote.

Unaweza ukawa na almasi mfukoni, akaja tapeli na kijiwe kimetengenezwa kama almasi, akakuambia: “Ebu tuone almasi yako. Bwana aa! Hii ya kwako sio almasi ni chupa tu, almasi ni hii.”

“Mkabadilishana. Yeye akachukua almasi yako na akakuachia kichupa na ukatoka hapo unashangilia kama zuzu!”

Hayo si maneno yangu bali ni ya hayati Baba wa Taifa Mwalimu Nyerere katika moja ya hotuba zake.

Maneno haya yamegeuka kweli hasa katika kipindi hiki cha mchakato wa kuelekea uchaguzi mkuu wa Oktoba 25, mwaka huu.

Inashangaza kuona wafuasi wa genge la UKAWA  wakipiga vifua vyao kumshangilia mgombea urais wa CHADEMA, Edward Lowassa, wakiamini fika kuwa ni almasi  ambayo inathamani kubwa inayoweza kufikia thamani ya kuinunua Ikulu.

Inauma kuona watu hawa hasa vijana wa mjini waliokuwa wakionekana wajanja,  ‘wamepigwa  changa la macho’ mchana kweupe na viongozi wao wajanjawajanja,  wanaojinufaisha kupitia mgongo wa Lowassa, kwa kuamini kuwa  mgombea huyo ni almasi waliyoichukua kutoka CCM na wafuasi wanashangilia.

Kama alivyosema Nyerere hapo juu, UKAWA wamedanganywa  na kipande cha chupa ‘Lowassa’  huku wakiikataa almasi halisi   ambayo ni mgombea wa CCM, Dk. John Magufuli ‘Tingatinga’.

Rais wa zamani wa Marekani  Hayati John  Kennedy aliwahi kusema: “Usiulize Marekani itakufanyia nini, jiulize wewe utaifanyia nini Marekani?”. 

Magufuli ni almasi kwa sababu amefanya mambo mengi ya thamani kubwa na hana makandokando yanayawoweza kuwa sumu kubwa kwa mustakabali wa taifa hili. Yanaonekana kwa macho.

Ni dhambi  kulinganisha thamani ya almasi ‘Magufuli’ na kipande cha chupa yao? Tena  kipande hiki kilimeguka kutoka kwenye chupa iliyokuwa imejaa sumu kali ya ufisadi uliotafuna taifa hili  na kutesa wananchi, kabla ya chupa hiyo kuvunjwa vunjwa  kisha kutupwa katika lundo la makapi, kisha viongozi wa UKAWA kuiokota na kuwapelekea wafuasi wao na kuwadanganya kuwa wameokota almasi.

Ajabu wafuasi wanashangilia  kipande cha chupa ambacho wanaamini watakibadilisha kwa Watanzania kwa thamani ya nchi yao. Haiwezekani.

Picha tu ya mikutano ya kampeni ya UKAWA inayoendelea inadhihirisha thamani  ‘sifuri’ ya Lowassa. Amekuwa akisitiriwa sana na wapambe wake ili kumlindia heshima.

Ni kioja UKAWA kudai eti Lowassa ameahirisha mkutano Tanga  ili kuepusha maafa kwa sababu mkutano  ulijaa sana na majeruhi walikuwa wengi .

Hivi watu wenye akili timamu wenye lengo la kusikiliza sera za mgombea  makini  wa Chama chao,  wakiwa uwanjani  watajeruhiwa vipi kama kweli wote ni watu wenye akili timamu  na  mkutano umeandaliwa na viongozi wenye akili timamu? Huu si usanii jamani?

Tena Lowassa anaahirisha mkutano huo kwa kusema ‘Naombeni kura zenu. Mtanipa kura?” Yaani hilo tu basi?

Harakati zote za Lowassa  zinadhihirisha fika uchu binafsi  alionao wa kwenda Ikulu.

‘Ikulu hapakimbiliwi.  Hakuna Biashara Ikulu. Lowassa anayetaka kwenda Ikulu kutaka faida yoyote Ikulu pale, hatufai hata kidogo.

‘Najua kwa mtu halisi kabisa, Ikulu ni mzigo. Hupakimbiliwi. Si mahali pa kupakimbilia hata kidogo, huwezi kupakimbilia Ikulu.

‘Unapakimbilia kwenda kutafuta nini? Ni mgogoro, ni mzigo mkubwa kabisa. Pazito pale. Huwezi kupakimbilia na watu safi hawapakimbilii.

‘Ukiona mtu anapakimbilia Ikulu na hasa anapotumia vipesa kwenda Ikulu, huyo ni mtu wa kuogopa kama ukoma.

‘Mtu yeyote anayeonekana anapenda sana kwenda Ikulu na hata yupo tayari kununua kura ili kumwezesha kufika Ikulu, ni wa kumkwepa kama ukoma.

‘Kwanza, hizo fedha kapata wapi? Mtanzania wa leo hawezi kununua watu bila kwanza yeye kununuliwa. Na kama kanunuliwa, atataka kuzilipaje? Kazipata wapi?

‘Watanzania wote ni masikini tu. Mtanzania anaomba urais wetu kwa hela, amezipata wapi? 

‘Pili, kama hajanunuliwa, kazipata wapi? Kama kakopa, atarudishaje? Ikulu pana biashara gani mtu akope mamilioni halafu aende ayalipe kwa biashara ya Ikulu?

‘Ikulu mimi nimekaa kwa muda wa miaka ishrini na mitatu. Ikulu ni mahali pazito. Kuna biashara gani Ikulu?

Haya ni maneno yaliyotamkwa na Mwalimu Nyerere, akiwausia watanzania kuwa makini na wanasiasa wanaopigana kufa na kupona ili waende Ikulu.

Ni maneno yaliyotamkwa miaka mingi iliyopita, lakini bado yana maana kubwa kwetu. Watanzania tuamke. Tuzinduke. Tusikubali kutumiwa.