UKAWA MAJI SASA SHINGONI

Na Mwandishi Wetu

BAADA ya kuona maji yamewafika shingoni, Umoja wa Katiba ya Wananchi (UKAWA) umeamua kujiuliza na sasa kuja na mbinu mpya ya kampeni.

Mgombea wa UKAWA, Edward Lowassa ameonekana kupata tabu sana ya kuhutubia mikutano ya hadhara na hivyo kuanza kupoteza mvuto kwa hadhira, wakiwamo wanachama na wapenzi wa vyama vinavyounda umoja huo.

Tabu hiyo inatokana na kudorora kwa afya yake na hivyo kuwiwa vigumu kunadi sera za chama chake, ambacho anakipeperushia bendera ya urais, badala yake kumwachia kazi hiyo mpiga debe wake mkuu, Frederick Sumaye kumpamba na kumwombea kura.

Kwa hali hiyo, habari kutoka ndani ya UKAWA zimesema leo mgombea huyo na baadhi ya viongozi wa umoja huo watakutana na waandishi wa habari kwenye Hoteli ya Bahari Beach, Dar es Salaam, ambako pamoja na mambo mengine, utazinduliwa mkakati mpya wa kampeni ujulikanao kama ‘Toroka Uje’.

‘Toroka Uje’ ni kauli mbiu ambayo ilitumika katika mashindano ya soka ya ‘mchangani’, maarufu kama ‘Ndondo Cup’ , yaliyomalizika hivi karibuni wilayani Temeke, Dar es Salaam, kwa udhamini wa Dk. Juma Mwaka. Maana ya maneno hayo ni mashabiki watoroke majumbani mwao kwenda viwanjani kushuhudia michuano hiyo.

Chanzo chetu cha habari kimesema kikao hicho cha jana usiku, kilitarajiwa kufanya tathmini ya utendaji wa mgombea huyo kwenye kampeni na jinsi ya kujipanga upya, ambapo baadhi ya viongozi wa CCM walio wafuasi wa Lowassa watatangaza kujiunga.

“Toroka Uje itamkumba mwana mama aliyekuwa na nafasi nyeti ndani ya Umoja wa Wanawake wa CCM, ambaye awali alijipambanua kuwa mmoja wa wafuasi wakubwa wa Lowassa akiwa CCM,” chanzo hicho kilisema huku kikimtaja jina (linahifadhiwa).

Chanzo hicho kilisema mama huyo ni mtata hata akiwa ndani ya CCM na huko anakohamia, bila shaka CHADEMA atawasumbua kwa sababu ana uchu wa madaraka kama alivyo mgombea wao.

Lakini pia chanzo hicho kilieleza kuwa mwanasiasa wa siku nyingi nchini, ambaye pia ni mfanyabiashara, anatarajia kutangaza rasmi kujiunga na UKAWA ingawa alikuwa akifanyakazi za kimkakati za CHADEMA kwa siri huku akiwa CCM.

“Unakumbuka hivi karibuni mwanasiasa huyo alilipuliwa kwenye mitandao ya kijamii kwa kutoa ushauri kwa UKAWA na akaja juu akikanusha na kutishia kushitaki aliyeasisi mawasiliano hayo ambayo aliyaita ya uzandiki?” kilihoji chanzo hicho.

Hata hivyo, chanzo hicho kimesikitishwa na wimbi la kupokea watu kutoka CCM, ambao hawana faida ndani ya UKAWA, badala yake wanaingia kuwafunika watu waliomwaga damu na kutoka jasho kuzijenga CHADEMA, CUF, NCCR-Mageuzi na NLD.

“Angalia, hivi watu kama Makongoro (Mahanga), Msindai (Mgana), Guninita (John) wana faida gani UKAWA tangu wahamie, kama si mizigo na kuziba nafasi za ‘wazawa’ wa vyama hivi vinavyounda UKAWA? Hivi tukishindwa wataendelea kubaki UKAWA?” Kilihoji chanzo hicho.

Siku za karibuni, Lowassa amekuwa akishindwa kuhutubia mikutano ya hadhara ya kampeni na badala yake hutafutwa visingizio vya kuahirishwa mikutano.

Ilitokea Geita na kutoa kisingizio cha vipaza sauti havifanyi kazi huku aliyetangaza kuahirisha akisikika; Nako Tanga mkutano uliahirishwa kwa madai kuwa watu zaidi ya 100 walizirai kutokana na msongamano uwanjani ili kumwona Lowassa.

Afya ya mgombea huyo imeendelea kutatiza kutokana na kazi ngumu ya kampeni licha ya kushauriwa na madaktari kupumzika. Mahali ambako aliweza kuhutubia, hakuzidisha dakika tano, ambazo wananchi walitazamia kumsikiliza akimwaga sera, lakini akaishia kujisifu mahudhurio na kuomba kura.

WAFUASI WAZIDI KUIKIMBIA UKAWA

VUGUVUGU la Kundi la Magufuli kwa Maslahi ya Umma (M4PI), limeingia jijini Mwanza na kubomoa ngome ya UKAWA baada ya watu 189, wakiwemo vigogo kutoka kundi la ‘Team Lowassa’ na wanachama wa vyama mbalimbali kujiunga na CCM.

Wanachama hao kutoka CHADEMA, ACT Wazalendo, UDP, CUF na Jahazi Asilia, walijiunga na CCM kwenye mkutano wa M4PI uliofanyika katika Hoteli ya New Mwanza, jana na kuamsha ari mpya ya ushindi wa CCM pamoja na mgombea wake wa urais, Dk. John Magufuli.

Akizungumza katika mkutano huo, Mwenyekiti wa M4PI Taifa, Donatus Rutagimbwa, aliasa kuwa itikadi za vyama zisiwanyime Watanzania viongozi bora, wachapa kazi na waadilifu kama Dk. Magufuli.

Rutagimbwa, ambaye mara kwa mara alikuwa akishangiliwa na umati wa wananchi waliohudhuria mkutano huo, alisema kikundi chake hakifungamani na itikadi ya chama chochote, wanaangali maslahi ya taifa ndiyo maana wanazunguka nchini kuhamasisha Watanzania wachague viongozi bora hususan Dk. Magufuli.

“Leo tumekutana hapa kwa ajili ya kuwapokea watu wanaojiunga timu ya Magufuli For Public Interest (Magufuli kwa Maslahi ya Umma), tumeweka pembeni itikadi za vyama vyetu, kabila zetu, dini zetu, tunataka maslahi ya taifa, tutaanza kuelimisha watu nyumba kwa nyumba, kwa nini Magufuli,” alisema.

Alifafanua, kati ya wagombea urais wote, Dk. Magufuli pekee ndiye ana sifa stahili, anaweza kusimamia maslahi ya Tanzania kwa ajili ya Watanzania wote, tofauti na Edward Lowassa, anayetafuta urais wa shoo kwa ajili ya maslahi yake na watu wachache wanaomzunguka.

Msimamizi wa M4PI taifa, Jacqueline Mzindakaya, alisema wafuasi hao 189 wamejiunga na kikundi hicho baada ya kutafakari kwa kina toka kampeni za uchaguzi mkuu zianze, wakabaini Lowassa, aliyejiuzulu kwa kashfa ya Richmond, hastahili kuwa rais wa Tanzania inayoondoka kwenye umaskini, ataididimiza tena kwenye umaskini.

Kati ya wafuasi hao, wamo waliokuwa katika makundi ya Team Lowassa, Friends of Lowassa, 4U Movement, Bodaboda na Shirika la Wamachinga Mwanza, ambao yalikuwa yakimpiga kampeni mwanasiasa huyo.

Akizungumza kwa niaba ya Friends of Lowassa, Yohana Chacha, ambaye ni Mwenyekiti wa Shirika la Umoja wa Machinga Mwanza, (SHIUMA), alisema vijana wasitumike ovyo, wataliangamiza taifa kwani Lowassa hana sifa za kuwa Amiri Jeshi Mkuu wa Tanzania.