ALIYETOBOLEWA MACHO APATA MISAADAA LUKUKI

JAMII imeendelea kuguswa na tukio la kikatili alilofanyiwa Said Ally, ikiwemo kutobolewa macho, ambapo Jumuia ya Mabohora imemkabidhi msaada wa bajaji mbili ili zimsaidie kuendesha maisha yake.

Said, alitobomolewa macho Septemba 6, mwaka huu, maeneo Buruguruni Sheli na mtu aliyefahamika kwa jina la Salumu Henjewele, maarufu kwa jina la ‘Scorpion’.

Pamoja na kujeruhiwa, pia aliporwa vitu mbalimbali, zikiwemo fedha taslimu sh. 331,000, mkufu wa dhahabu wenye uzito wa gramu 34, ambao thamani yake ni sh. 60,000 na bangili.

Akipokea msaada huo, Dar es Salaam, jana, kutoka kwa Kiongozi wa Jumuia hiyo, Shekhe Syedna Dk. Mufaddal Saifuddin, Mkuu wa Mkoa, Paul Makonda, alisema anamshukuru kiongozi huyo na waumini wote wa mabohora kwa msaada huo na kwamba, utamsaidia Said kuendesha maisha yake.

Makonda alisema jitihada za kumwezesha Said kuona tena zinaendelea, lakini bado hazijafanikiwa. Awali, madaktari wa macho waliompima, walisema hakuna uwezekano kwa Said kuona tena.

Mkuu huyo wa mkoa alisema pamoja na kwamba jitihada hizo hazijafanikiwa, ofisi yake kwa kushirikiana na wananachi, wataendelea kujitoa ili kuhakikisha Said anaendelea na shuguli zake alizokuwa akizifanya kabla ya kupatwa na tatizo hilo.

“Mimi na wananchi ambao naamini bila wao nisingekuwa hivi nilivyo, tutahakikisha tunamsaidia Said ili kuona anaendelea na shughuli zake za kila siku,”alisema Makonda.

Aliongeza: “Tunaamini hapa tulipofika ni hatua nzuri ya kumwezesha kuendelea na shughuli zake na kujiona ni sehemu ya jamii, japokuwa siyo kama alivyokuwa anafanya shughuli zake kwa kuona kwa macho yake.”

Mapema mwishoni mwa wiki iliyopita, Makonda alimpatia Said, sh. milioni 10, alizomuahidi huku msanii Nasseb Abdul, maarufu kwa jina la Diamond, akimpatia msaada wa sh. milioni mbili.

Kijana huyo pia alipatiwa msaada wa pikipiki tano, ambazo zilitolewa na wahisani mbalimbali kupitia kwa Makonda.

Mkuu huyo wa mkoa alitoa wito kwa wananchi wenye mapenzi mema, kujitoa kwa ajili ya kuhakikisha Said anaendelea na shughuli zake na anakuwa na amani kama ilivyokuwa mwanzo.

Kwa upande wake, Said aliwashukuru wananchi wote kupitia mkuu wa mkoa, ambaye amekuwa akijitoa kwa ajili yake usiku na machana ili kuhakikisha hali ya afya yake inaimarika.

Said, aliiishukuru Jumuia hiyo kwa kutambua ulemavu alioupata bila kutarajia na kumuwezesha kuendelea na shughuli zake kwa kumpatia bajaji mbili na kuwaombea dua kwa Mungu awabariki.