MAPIGANO WAKULIMA NA WAFUGAJI YAZUSHA BALAA, MKULIMA ACHOMWA MKUKI MDOMONI NA KUTOKEZEA SHINGONI

MKULIMA Agustino Mtitu, amenusurika kifo baada ya kuchomwa  mkuki mdomoni na kutokezea  shingoni.

Aidha, watu wengine wanane wamejeruhiwa na kulazwa katika Hospitali  ya Wilaya ya Kilosa, kufuatia kuzuka kwa mapigano baina ya wakulima na wafugaji katika kijiji  cha Dodoma Isanga, wilayani Kilosa, mkoani Morogoro.

Tukio hilo lililovuta hisia za watu wengi, lilitokea juzi, saa tano asubuhi, katika kijiji  cha Dodoma Isanga, kilichoko kata ya Masanze.

Akizungumiza tukio hilo, mmoja wa wakulima, mkazi wa kijiji  hicho, aliyejitambulisha kwa jina la Stanley George,  alisema akiwa katika shughuli zake za uchomaji mkaa, alisikia kelele zikipigwa na baadhi ya wananchi wakilalamikia wafugaji kuingiza mifugo katika  mashamba ya mahindi.

Alisema baada ya hali hiyo, Mtitu alifika katika eneo hilo kuwahoji wafugaji hao sababu za  kuingiza ng'ombe kwenye mashamba ya wakulima.

George alisema baada ya kuwahoji  wafugaji,  mmoja  wao alitokea  kwa  mbele  na kumchoma mkuki mdomoni na kutokea upande wa pili wa shingo ya Mtitu.

Alidai  kuwa baada  ya wafugaji  hao  kufanya  tukio  hilo na  kubaini  kuwa  wanakijiji  wamegundua, walikimbia  na kuacha mifugo yao shambani ikiwa imedhibitiwa.

Alisema dakika chache baadaye, wafugaji hao wanaochunga ng'ombe wa mfugaji mmoja wa jamii ya kimasai, waliyemtaja  kwa  jina la Sele, walirudi kwa lengo la kutaka kuteka ng'ombe  zao, ndipo walipoanza  kujeruhi  wakulima wengine, akiwemo mwenyekiti wa kijiji.

Diwani wa kata ya Masanze, Bakari Pilo, akizungumzia  tukio ilo kwa  njia  ya simu, alisema wafugaji  hao walirudi  kwa mara  ya  pili  na  kufanya  shambulio  kwa lengo  la   kuteka  ng’ombe zao, ndipo  walipowakata mapanga, Mwenyekiti wa  kijiji hicho,  Stephano Daud, George  Andrea  na Mwenyekiti wa Kitongoji, Saimon Luhoga.

Pilo alisema baada ya kuona hali imekuwa mbaya, walifanya jitihada za kuwafikisha wananchi waliojeruhiwa katika Hospitali  ya Wilaya ya Kilosa, ambapo kati ya hao tisa, wakulima  wanane  walilazwa na mmoja  aliyechomwa  mkuki mdomoni  alitakiwa kuwahishwa katika Hospitali ya Rufani Morogoro.

Mganga Mkuu wa Mkoa wa Morogoro, Dk.  Frank  Jacob, alikiri kupokewa kwa majeruhi huyo juzi na kusema kuwa, alipelekwa kwenye
chumba  cha upasuaji na kufanikiwa  kutolewa mkuki huo, ambao  ulikuwa  umekaa sehemu mbaya.

“Kutokana na jitihada za madaktari kufanya kazi nzuri, hali yake kwa sasa inaendelea  vizuri  na amelazwa wodi namba moja kwa ajili ya matibabu zaidi,”alisema Dk. Jacob.

Tukio la wafugaji  kushambulia  wakulima, limekuwa likitokea mara  kwa mara kijijini  hapo, ambapo Mbunge wa  Mikumi, Joseph  Haule, aliiomba serikali kufanyia  kazi  suala  hilo  ili  kupunguza mapigano ya wakulima  na wafugaji.

Kamanda wa Polisi Mkoa  wa Morogoro,  Ulurich Matei, alithibitisha kutokea kwa tukio hilo  na kusema kuwa, ofisi yake inaendelea kukusanya takwimu.