TAKUKURU YAWASAKA WALIOFICHA MKATABA WA ZANTEL

TAASISI ya Kuzuia na Kupambana na Rushwa (TAKUKURU) kwa kushirikiana na  polisi, wanawasaka vigogo walioficha mkataba wa  Kampuni ya  Zantel na Manispaa ya Kinondoni.

Kampuni hiyo tayari imeilipa manispaa hiyo  kiasi cha  sh. milioni 627.

Tamko hilo lilitolewa jana na Kaimu Mkuu wa Mkoa wa Dar es Salaam, ambaye pia ni Mkuu wa Wilaya  ya Kinondoni, Ali Happi, alipokuwa akizungumza na waandishi  wa habari, kuhusiana na taarifa  ya ufisadi  uliokuwa unaikabili Zantel, tangu mwaka 2009.

Happi alisema serikali imejipanga kikamilifu kuhakikisha wale wote waliohusika kuuficha mkataba huo katika Manispaa ya Kinondoni,  wanapatikana.

“Tutahakikisha  tunawabaini waliohusika kuuficha mkataba wa Kampuni ya Zantel kwa muda wa  miaka saba  katika Manispaa ya Kinondoni  na kusababisha  kushindwa kuipa manispaa hiyo mapato kwa kipindi chote hicho,” alisema.

Pia, aliipongeza kampuni  hiyo kwa kutii agizo lililotolewa na kulipa fedha hizo.

Happi  alisema  kutokana  na ulipaji huo, Manispaa ya Kinondoni kwa  sasa tayari imewapa risiti ya malipo ya fedha hizo, ambapo zililipwa  Desemba  23, mwaka huu.

Happi alisema  baada ya  kuwabaini  watu hao,  watajibu tuhuma za  kuisababishia serikali upotevu wa mapato kwa miaka hiyo saba na sababu za kutoonekana  kwa kumbukumbu ya mkataba katika manispaa hiyo.

Alizitaka kampuni  zilizoingia mkataba na manispaa yoyote  Dar es Salaaam, kuhakikisha zinalipa  madeni yao  mapema  katika  manispaa husika.

“Mwenye mkataba na serikali tambueni ya kuwa tumeanza msako na endapo tukiwabaini,  tambueni mtatakiwa kulipa fedha  zote bila kujali  nani kasababisha,” alisema.

Pia, alisema fedha zilizolipwa zitatumika  kujenga  vyumba vya madarasa   40, katika Manispaa  ya Kinondoni,  ambapo  kila darasa litagharimu sh. milioni  17.

“Manispaa ya Kinondoni tuna upungufu mkubwa wa vyuma 79, vya  madarasa, hivyo kupitia fedha iliyolipwa na Zantel, tutahakikisha  tunajenga vyumba 40, vya madarasa, ambapo kila kimoja kitagharimu shilingi milioni 17,”alisema.

Alisema ujenzi huo wa madarasa ni moja ya utekelezaji wa agizo la Waziri Mkuu, Kassim Majaliwa la kuwataka  wakurugenzi  kuhakikisha kila  mwanafunzi aliyefaulu anapata shule.

Dhamira nyingine, Happi alisema ni kuhakikisha  wanatekeleza  nia ya Rais Dk. John Magufuli ya kutaka kila mwanafunzi apate haki yake ya elimu bure.

Kutokana na hilo, Happi  aliwataka  wakurugenzi wote wa  Dar es Salaam kujipanga kutekeleza maagizo hayo  na  ikifika Januari,  mwakani,  tayari kwa  kuanza ujenzi wa vyumba vya madarasa.

Hata hivyo, aliwataka maofisa  elimu  na wakurugenzi  kuhakikisha wanatazama maeneo  yaliyowazi kwa ajili ya kuanza ujenzi  wa madarasa.