KAMPUNI ZA ULINZI ZAONYWA KUTUMIA ASKARI FEKI

POLISI Kanda Maalumu ya Dar es Salaam, imezionya kampuni za ulinzi zinazoajiri wafanyakazi katika ulinzi bila kupitia mafunzo ya JKT na Magambo, kwamba kufanya hivyo ni makosa.

Kauli hiyo ilitolewa juzi na Kamanda wa Polisi Kanda maalumu ya Dar es Salaam, Lazaro Mambosasa alipozungumza na Uhuru, ofisini kwake.

Alisema kampuni zinazofanya hivyo, zinakiuka taratibu zinazostahili, kwani zinaajiri baadhi ya watu wasiojua hata namna ya kushika silaha vizuri.

Kamanda huyo alisema, kutokana na hali hiyo, wamegundua kuna baadhi ya walinzi wa kampuni binafsi, wanakaa kwenye maeneo yao ya ulinzi huku silaha wanazotumia wakiwa wameziweka pembeni, jambo ambalo ni hatari kwa usalama wao na jamii inayowazunguka.

"Ni vyema viongozi au wamiliki wa kampuni hizo, wakajaribu kuajiri watu waliopita mgambo au JKT ili kuhakikisha wanakuwa na weledi wa kazi.

“Wanaopitia huko, wanafahamu namna silaha inavyoshikwa na mbinu zingine za ulinzi," alisisitiza Mambosasa.

Alisema silaha ni kitu muhimu kushikwa na mtu aliyepewa jukumu la kulinda au aliyeomba kujilinda mwenyewe, badala ya kumpa mtu mwingine.

Pia, kamanda huyo amewaomba wafanyabiashara kuacha kubeba fedha nyingi bila kuomba ulinzi wa askari kwa sababu wanahatarisha maisha yao.

Alikiri kuwepo kwa baadhi ya watumishi wa benki, ambao siyo waaminifu kutokana na kushirikiana na wahalifu ili kufanikisha uporaji wa fedha za wateja.