WALIOTAFUNA MILIONI 29/- ZA UJENZI WA ZAHANATI MIKONONI MWA TAKUKURU

NAIBU Waziri wa Afya, Maendeleo ya Jamii, Jinsia, Wazee na Watoto, Dk. Khamis Kigwangalla, ameiagiza Taasisi ya Kuzuia na Kupambana na Rushwa Nchini (TAKUKURU), kuwakamata watu wote waliohusika kuchakachua sh. milioni 29, fedha za ujenzi wa jengo la Zahanati ya Neruma, iliyopo wilaya ya Bunda mkoani Mara.

Dk. Kigwangalla, ambaye yuko ziarani mkoani Mara katika ili kukagua na kuimarisha sekta ya afya, alitoa agizo hilo baada ya kukagua jengo hilo.

Wakati wa ukaguzi huo, wananchi wakiongozwa na  Diwani wa kata ya Neruma, ambaye pia ni Mwenyekiti wa Halmashauri Wilaya ya Bunda, Isaack Mahela, walimtaka Mkurugenzi wa Halmashauri kueleza siku maalumu, ambayo jengo hilo litakamilika na kujua gharama halisi.

“Nakuagiza Mkurugenzi kuhakikisha unawasilisha nyaraka zote za fedha za jengo hili kwa TAKUKURU na wale wote waliohusika. Wale waliohusika na uchakachuaji huu, nawakabidhi TAKUKURU wafanye  uchunguzi na kuchukua hatua,” alisema naibu waziri huyo.

Aliongeza kuwa, taifa linataka kusonga mbele, hivyo watu wanaokwamisha juhudi za Rais Dk. John Magufuli, kuwaletea maendeleo wananchi, lazima wachukuliwe hatua ili wengine waogope kutafuna fedha za umma.

Jengo hilo, ambalo limeonekana kujengwa chini ya kiwango, ujenzi wake ulianza mwaka juzi, kwa nguvu za wananchi.

Baadaye, halmashauri ilitenga fedha za kumalizia mchakato sh. milioni 29, ambazo zimebainika kutafunwa na watendaji waliokuwa wakishughulikia ujenzi huo.

Dk. Kigwangalla atakuwepo mkoani Mara kwa siku mbili, ambapo anakagua vituo vya afya, zahanati na hospitali, ikiwa ni sehemu ya mpango wa uboreshaji sekta ya afya.