MADEREVA WALEVI WASABABISHA AJALI 2,795

POLISI nchini imesema inaendesha msako mkali kwa madereva kufuatia kuongezeka kwa ukamataji wa makosa ya ulevi barabarani.

Makosa hayo yameongezeka mpaka kufikia 2,795, sawa na asilimia 21, katika kipindi cha kuanzia Januari hadi Julai, mwaka huu.

Pia, polisi wamedhamiria kukomesha tabia za baadhi ya madereva, kuendesha magari wakiwa wamelewa huku wengine wakisikiliza simu, jambo ambalo linaweza kusababisha ajali.

Kamanda wa Kikosi cha Usalama Barabarani nchini, Fortunatus Musilimu, aliliambia gazeti hili hivi karibuni kuwa, dhamira ya polisi ni kukomesha vitendo hivyo vilivyokithiri kwa madereva.

Alisema watapambana na madereva, ambao wamekuwa wakishindwa kutii sheria bila shuruti.

Kamanda Musilimu alisema, msako dhidi ya madereva walevi, unaendelea kufanyika nchi nzima, ambapo tayari yamefanyika makosa 15,988, katika kipindi hicho cha mwaka huu, ikilinganishwa na makosa 13,193, mwaka jana.

Alisema msako huo umewezesha kupungua kwa ajali za barabarani 2,749, ambazo ni sawa na asilimia 45, kwa kipindi cha Januari hadi Julai, mwaka huu.

Mwaka jana, ajali hizo zilikuwa 3,354, tofauti na Januari hadi Julai, mwaka jana, ambapo zilikuwa 6,103.

Pia, alisema wameweza kupunguza ajali zilizokuwa zinasababisha vifo vya barabarani 468, sawa na asilimia 24, kwa kipindi cha Januari hadi Julai, mwaka huu.

Alisema katika kipindi hicho, vilitokea vifo 1,477, ikilinganishwa na kipindi cha Januari hadi Julai, mwaka jana, ambapo vilitokea  vifo 1,945.

Musilimu alisema idadi ya majeruhi kutokana na ajali za barabarani pia imepungua hadi  2,459, sawa na asilimia 44, kwa kipindi cha Januari hadi Julai, mwaka huu. Mwaka jana, idadi ya majeruhi ilikuwa 5,656.

Alisema operesheni hiyo pia imewezesha kuongezeka kwa ukamataji wa makosa 1,597, 771 ya usalama barabarani, sawa na asilimia 32, ikilinganishwa na kipindi cha Januari hadi Julai,mwaka jana, ambapo makosa 1,207,832 yalikamatwa.

Kamanda huyo alisema kuongezeka kwa uelewa wa wananchi juu ya usalama barabarani kwa makundi mbalimbali ya watuamiaji wa barabara, kumesaidia kupunguza ajali.

Alisema kupungua huko kwa ajali kumetokana na kushirikiana kwa kupiga simu na kutoa taarifa polisi ili kuwakamata madereva wanaoshindwa kufuata sheria za barabarani.

Kamanda huyo alisisitiza kuwa, wataendelea kufuta leseni za madereva watakaobainika kutotii sheria za barabarani bila ya kujali cheo au umaarufu wa mtu.