ASANTENI TABORA

 Mgombea wa Urais kupitia CCM Dk. John Pombe Magufuli akiwasili kwenye uwanja wa Ali Hassan Mwinyi mkoani Tabora kwenye mkutano wa kampeni za CCM

Mgombea wa Urais wa Jamhuri ya Muungano wa Tanzania kupitoa Chama Cha Mapinduzi Dk. John Pombe Magufuli akihutubia wakazi wa mji wa Tabora waliofurika kwenye mkutano wa kampeni za CCM ambapo aliwaambia anataka kujenga Tanzania mpya yenye kuleta maendeleo kwa wananchi wote

 Mgombea wa Urais kupitia CCM Dk. John Pombe Magufuli akihutubia umati wa wananchi wa mji wa Tabora waliojazana kusikiliza Sera na Mipango ya Chama Cha Mapinduzi itakayotumika kuongoza kwa miaka 10 ijayo

Katibu Mkuu wa CCM Ndugu Abdulrahman Kinana akihutubia wakazi wa tabora mjini na kuwaambia kuwa Dk. Magufuli ni kiongozi sahihi anayehitajika Tanzania kwa sasa na kuwataka wananchi kumpigia kura zote ifikapo Oktoba 25 mwaka huu

 Mwenyekiti wa Jumuiya ya Wazazi na Mjumbe wa Kamati Kuu ya CCM Alhaj Abdallah Bulembo akihutubia wakazi wa mji wa Tabora kwenye mkutano wa kampeni za CCM uliofanyika kwenye uwanja wa Ali Hassan Mwinyi

Mgombea wa Urais kupitia CCM Dk. John Pombe Magufuli (kushoto) akizungumza na Mgombea Ubunge Jimbo la Nzega mjini Hussein Bashe na Mgombea wa Ubunge jimbo la Nzega Vijijini Dk. Khamis Kigwangala (kulia) kabla ya kuhutubia wakazi wa Nzega waliojitokeza kwa wingi kwenye mkutano wa hadhara uliofanyika kwenye viwanja vya Parking

Mgombea Ubunge wa Jimbo la Nzega mjini, Hussein Bashe, akihutubia wakazi wa mji huo waliojitokeza kwa wingi kwenye mkutano wa hadhara wa kampeni za CCM ambapo mgombea wa Urais kupitia CCM alihutubia

NA SELINA WILSON, TABORA
KATIBU Mkuu wa CCM, Abdulrahman Kinana, ameseama mgombea wa CCM, Dk. John Magufuli ni muadilifu na mzalendo mwenye nia njema ya kuwatumikia Watanzania.
Amesema Dk. Magufuli ndiye atakayewaondoa wananchi wa kawaida kutoka katika manyanyaso na changamoto na kuwewawezesha kufanya shughuli zao katika mazingira bora na unafuu zaidi.
Kinana aliyasema hayo jana wakati akizungumza na maelfu ya wakazi wa mkoa huo walifurika katika Uwanja wa Ally Hassan Mwinyi kwenye mkutano wa kampeni za uchaguzi mkuu utakaofanyika Oktoba 25 mwaka huu.
Alisema kwamba Mkoa wa Tabora ulikuwa na changamoto ya hospitali iliyokaa miaka mwili bila kuendelezwa kutokana na changamoto za mkandarasi, lakini yeye alitatua na sasa amepatikana Dk. Magufuli ndio dawa ya matatizo kama hayo.
“Nilikuta pia kuna ujenzi wa chuo kimoja ujenzi ulisimama mkandarasi ameng’ang’ania eneo la mradi anadai fedha zake nikalitatua. Haya yote dawa yake ni Dk. Magufuli, namfahamu ni mchapa kazi,”alisema.
Alisema kuna kero kwa wachimbaji wadogo wa madini wanasumbuliwa huku kukiwa na watu waliohodhi maeneo makubwa ambayo hayajaendelezwa.
“Nimemsikia Dk. Magufuli akisema atawanyang’anya wenye mashamba makubwa waliyoyatelekeza, sasa na hawa dawa yao ni Dk. Magufuli, mchagueni ili awe Rais awafanyie kazi,”alisema .
Kinana ambaye wakati wote alikuwa akishangiliwa na umati huo wananchi aliwanadi wagombea ubunge na udiwani wa mkoa huo huku akisisitiza  kwamba Dk. Magufuli ataleta mabadiliko ya kiuchumi.
Alisema kero za wanyabiashara ndogondogo, kusumbuliwa na mgambo, polisi na Mamlaka ya Mapato Tanzania (TRA), zitamalizwa na Dk. Magufuli kwa kuwa ni mtu mwenye kupenda maendeleo ya wanyonge.
Mapema, akizungumza katika mkutano huo, Mjumbe wa Kamati ya Kampeni za CCM, Samuel Sitta, alisema CCM imeteua mgombea bora anayekubalika na ndio maana mafisadi walisusa na kutimkia UKAWA.
Sitta aliwataka wananchi wasikubali kupotoshwa na Mgombea wa UKAWA, Edward Lowassa,  kwa kuwa hafai kuongoza nchi, sio msafi na hana sifa za kuwa Rais wa Tanzania.
Alisema Lowassa akiwa kijana mdogo, alikuwa na fedha nyingi na mpaka sasa hakuna mwanasiasa anayemfikia kwa kuwa na fedha nyingi ambazo hazijulikani kazipataje.
DK. JOHN MAGUFULI
“Mtu amekopeshwa amekwenda chuo kikuu amemaliza masomo yake amefaulu vizuri anakuja na cheti chake kutafuta kazi unamwambia awe na uzoefu wa miaka mitatu mpaka mitano, huo uzoefu ameupata wapi…”



Kero ya vijana wanaomaliza vyuo vikuu kukosa kazi kwa kigezo cha kutokuwa na uzoefu itakuwa historia baada ya kanuni na sheria za kazi hususan serikalini na taasisi za umma.
Mgombea Urais wa CCM, Dk. Magufuli, alitoa ahadi hiyo jana wakati akihutubia umati wa wananchi katika uwanja wa Ali Hassan Mwinyi Mjini Tabora.
Alisema hiyo ni kero kubwa na kama ni sheria ama kanuni, akiingia madarakani serikali yake itaipitia upya ili kutoa fursa za ajira kwa sababu utaratibu huo hauna tija na unawakwaza wahitimu.
“Mtu amekopeshwa amekwenda chuo kikuu amemaliza masomo yake amefaulu vizuri anakuja na cheti chake kutafuta kazi unamwambia awe na uzoefu wa miaka mitatu mpaka mitano, huo uzoefu ameupata wapi,”alisema.
Dk. Magufuli alisema hizo ni sehemu ya kero na manyanyaso kwa wananchi wenye maisha ya chini ambapo katika serikali yake anataka kuyamaliza kabisa ili kubadilisha maisha ya Watanzania.
Akizungumzia uchumi Dk. Magufuli alisema, ameomba urais ili kuunda serikali makini itakayoangalia rasilimali za Watanzania na kuzisimamia ipasavyo ili ziwanufaishe wananchi wote.
Alisema pia ataweza mazingira mazuri kwa wawekezaji hususan wanaokuja akuwekeza kwenye viwanda na  wawe wanapatiwa vibali za kuanzisha viwanda bila kuzungushwa.
Dk. Magufuli alisema pia atakuwa mkali kwa wakandarasi wazembe wanaochelewesha miradi ya wananchi ikiwemo ya umeme ambayo amepata taarifa kuna ucheleweshaji.
“Mimi ndio kiboko ya makandarasi. Nilikuwa nawasimamia makandarasi wa ujenzi wa barabara sasa nikiwa rais nitawasimamia makandarasi wa umeme, maji, ujenzi na wengine na watakaochelewesha kazi watakiona,”alisema.
Akiwa katika jimbo la Bukene, alimnadi mgombea ubunge wa jimbo hilo, Seleman Zedi na kuwataka wananchi wamchague kwa kuwa ni mfuatiliaji wa maendeleo ambaye ameweza kupata mradi wa barabara ya lami kilomita 149 ndani ya jimbo lake.
Dk. Magufuli aliwaonya watendaji wa serikali wanaojilimbikizia posho kwenye maadhimisho ya sherehe ikiwemo Wiki ya Maji wakati hakuna huduma hiyo na kusisitiza kwamba ataifuta.
Katika majimbo mbalimbali mkoani Tabora, Dk. Magufuli alisisitiza dhamira ya kufuta karo shule za msingi hadi sekondari kidato cha nne, kuboresha huduma za afya, maji na umeme na kuwezesha wananchi kiuchumi.


HUSSEIN BASHE

“Dk. Magufuli pambana na ufisadi kwa vitendo na kwa kuwa umeshatangaza utaanzisha mahakama ya mafisadi na majizi nina imani utakomesha vitendo hivyo…”

Mgombe ubunge wa Nzega Mjini kupitia CCM, Hussein Bashe, amesema ni muumini wa mabadiliko ndani ya CCM na ana imani yatapatikana chini ya uongozi wa Dk. John Magufuli.

Amesema Dk. Magufuli ni mgombea bora, wakala wa mabadiliko anayeakisi mahitaji ya sasa, yajayo na kusisitiza kwamba, atapata kura za kishindo na kushinda uchaguzi mkuu.

Bashe alisema hayo jana wakati akitoa salamu kwa wananchi wa Nzega Mjini katika Uwanja wa Maegesho ya Magari wakati  mgombea urais wa CCM, Dk. John Magufuli, akihutubia umati wa wananchi kwenye mkutano wa kampeni za uchaguzi mkuu.

Akizungumzia kuhusu kutuhumiwa kwamba atahamia UKAWA, Bashe alisema kama mwana CCM alikuwa kwenye kundi fulani, lakini baada ya Chama kukamilisha vikao vyake na kumpata mgombea bora ameendelea kubaki ndani ya Chama.

“Mimi na CCM hatukukutana barabarani. Mimi ni muumini wa mabadiliko ndani ya Chama  na tumempata wakala wa kutekeleza mabadiliko kwa vitendo…kwenye uchaguzi ndani ya CCM,  mimi na kaka yangu Bulembo (Abdallah) tulikuwa kambi tofauti, lakini uchaguzi umekwisha  tunatafuta kura za CCM kwa ajili ya Dk. Magufuli na nina amini katika wapiga  47,000 za jimbo langu zinaweza kukosekana asilimia tano, lakini zingine zote atapata,”alisema.

Akizungumzia ufisadi, Bashe alimuomba Dk. Magufuli kupambana na na ufisadi kwa vitendo na kwa kuwa ameshatangaza ataanzisha mahakama ya mafisadi na majizi ana imani atakomesha vitendo hivyo.

“Dk. Magufuli nakuomba kwenye vita hii tumekuwa watu wa kusema bila kutekeleza, tutakuwa tukihoji mara kwa mara kwa utakayemtua kuwa Waziri wa Katiba na Sheria, Tutahoji juu ya muswada wa kuanzisha mahakama hiyo uje mapema ili watu washughulikiwe. Taifa leti ni tajiri kuna wezi wapo bandarini na pale upaangalie,” alisema.

Pia, aliwatahadharisha wanasiasa wanaotafuta kura kwa udini na aliwataka watekeleze ahadi zao.

“Kuna Kanisa la Moravian hapa Nzega kuna mtu alitoa cheki feki ya kuchangia kanisa tunahitaji aje atoe fedha alizoahidi,” alisema bila kutaja jina la mhusika.

Katika hatua nyingine, Bashe alimuomba Dk. Magufuli akishachaguliwa kuwa Rais, amsadie kutatua kero ya maji kwa kumpati matanki makubwa matano na kujengewa daraja katika eneo la Mto Nobola.

Pia, aliomba serikali ya awamu ya tano iendelee kuawangalia wafanyabiashara ndogondogo wakiwemo mama ntilie ambao wamekuwa wakinyanyaswa kwa kufukuzwafukuzwa.

Alisema katika eneo la uwanja huo uliokuwa ukifanyika mkutano kuna mama ntilie wanaouza chakula wamekuwa wakinyanyaswa na halmashauri yake, hivyo aliaonya watendaji kwamba waache wafanye biashara zao bila matatizo.

Akizungumza katika mkutano huo, Dk. Magufuli alimhakikishia Bashe kwamba serikali itatekeleza mambo yote ili mradi kuwaondolea kero wananchi.

“Naomba haya ya maji, daraja, wafanyabishara ndogondogo mniachie nitayamaliza na nitajenga barabara za lami. Mimi ndio Magufuli kwangu ni kazi tu,” alisema.

Dk. Magufuli alimsifu Bashe kuwa ni kijana mvumilivu ambaye mwaka 2010 alishinda kura za maoni, lakini hakuteuliwa na akabaki kuwa mwana CCM ambaye hakuhama kwenda kokote na sasa imefika wakata atakuwa mbunge.

Aliwaomba wananchi wa Nzega waichague CCM kwa kuwa imejipanga kuleta mabadiliko makubwa ya kiuchumi na kwa kuwawezesha wananchi wa hali ya chini ili wabadilishe maisha yao.

“Nimegombea urais na Oktoba 25, mwaka huu nikishinda, watu wanaonyanyasa  wafanyabiashara ndogo ndogo watafute pa kwenda, sitakubali kwa kuwa hizi kero ndogo ndio zinawafanya wasijikwamue kiuchumi,”alisema.

Dk. Magufuli alisema kama  eneo la stendi, halmashauri itafute eneo lingine lipimwe kwa ajili ya kujengwa stendi na eneo la uwanja huo litumike kwa ajili ya mama lishe na wengine.

Dk. HAMIS KIGWANG’ALA

“UKAWA wamepoteza mwelekeo kwa kuwachukua wahandisi na wakandarasi wa ufisadi...”

Kwa upande wake mgombea ubunge wa jimbo la Nzega Vijijini, Dk. Hamisi Kigwang’ala, ameliponda kundi la vyama vya siasa linalounda UKAWA kwamba limepoteza mwelekeo kwa kuwachukua wahandisi na wakandarasi wa ufisadi.

Alisema kwa miaka 20, ajenda yao kubwa ilikuwa ni kupambana na ufisadi, lakini kwa sasa ajenda yao ili kushika dola wameamua kuwatumia mafisadi wakiamini kwamba watawafikisha kwenye lengo lao la kuingia Ikulu.

Dk. Kigwang’ala alisema hayo jana alipozungumza na wananchi wa Nzega katika mkutano wa kampeni za uchaguzi uliofanyika katika Uwanja wa Barafu mjini hapa.

Alisema  mwaka huu CCM imemleta mgombea urais muadilifu, mwaminifu, mchapakazi na msomi aliyebobea, Dk. Magufuli na kusababisha wapinzani kukosa hoja na kuanza kuhangaika na mafisadi waliohama CCM.

“CCM imemsimamisha mgomnbea bora, wenzetu waliamua kuwachukua wahandisi na makandarasi wa ufisadi. Nawaomba wana Nzega tuwe makini tuchague kiongozi kwa kutulia,”alisema.

Dk. Kigwang’ala alisema ajenda ya upinzani haijawahi kuwa maendeleo hata siku moja, tangu walipoanzisha vyama vyao, hivyo Watanzania wanapaswa kuwa makini katika uchaguzi wa mwaka huu.

“Lengo lao ni kutaka kushika dola na sasa wameamua kupitia njia yoyote hata iwe ya shetani ili mradi wafike Ikulu. Msikubali mchagueni Dk. Magufuli hana tabia ya uongo ni muadilifu na mtekelezaji,”alisema.

Alisema ndani ya CCM wapo mafisadi wachache ambao baada ya Dk. Magufuli kuteuliwa wamekuwa na hofu kubwa na kasi yake ya utendaji na sasa wanatafuta pa kwenda, hivyo wananchi wamchague ili asafishe serikali na chama na kujenga nidhamu.

ABDALLAH BULEMBO

“Tumemvumilia sasa tumechoka, tutamchapa. Tunamtaka arudishe walinzi ili kuthibisha kwamba hastahili kwa kuwa miaka yote 10 alikuwa analipwa bure bila kufanya kazi…”

Katika hatua nyingine, akizungumza katika mikutano ya kampeni za uchaguzi  Nzega na Tabora Mjini wakati akimnadi Dk. Magufuli, Mjumbe wa Kamati Kuu, Abdallah Bulembo, alimtaka Waziri Mkuu mstaafu, Frederick Sumaye, arejeshe asilimia 80 ya mshahara wa waziri mkuu na walinzi.

Alisema kwa miaka 10 amekuwa waziri mkuu, kisha anasema serikali ya CCM kwa miaka 54 haijafanya kitu, lakini mpaka sasa anaishi kwa mashahara wa waziri mkuu ambao hakuufanyia kazi yoyote.

“Tumemvumilia sasa tumechoka, tutamchapa. Tunamtaka arudishe walinzi ili kuthibisha kwamba hastahili kwa kuwa miaka yote 10 alikuwa analipwa bure bila kufanya kazi,” alisema.

Bulembo alisema Sumaye ametimkia UKAWA baada ya kuona hana sifa za kiongozi ndani ya CCM, aligombea  ujumbe wa NEC, ‘akapigwa’ na Dk. Mary Nagu.

Alisema hakuna kiongozi aliyetoka CCM kwenda upinzani kama hana makandokando na kukosa sifa za kuwa kiongozi ndani ya Chama.

Bulembo pia alimshangaa Mwenyekiti wa CHADEMA, Freeman Mbowe,  ambaye ameanza kulalamika kwamba wataibiwa kura wakati wao na mgombea wao, Edward Lowassa, wanapita angani Dk. Magufuli anapita chini.

“Wapiga kura wako angani au chini anakopita Dk. Magufuli,” alihoji Bulembo huku akijibiwa na umati wa wananchi wa Tabora Mjini waliofurika Uwanja wa Ally Hassan Mwinyi.

Alisema CCM imeshafanya kampeni kwenye mikoa 23, Dk Magufuli ameshakwenda mikoa 12 na Mgombea Mwenza Samia Suluhu Hassan, ameshapita mikoa 11.

Bulembo ambaye ndiye kiongozi wa msafara wa kampeni wa Dk. Magufuli alisema mpaka sasa Dk. Magufuli alishafanya mikutano mikubwa ya hadhara 98 na mikutano isiyo rasimi  300.

Kwa upande wa Samia ameshafanya mikutano rasmi 65 na mikutano isiyo rasmi 200. Alisema kwa kuwa wapiga kura wapo chini,  Oktoba 25 kwenye uchaguzi mkuu lazima wachapwe tu na CCM itashinda.