BASHE: MABADILIKO YA KWELI YATAPATIKANA CCM

NA SELINA WILSON, NZEGA

MGOMBEA ubunge wa CCM Jimbo la Nzega Mjini, Husein Bashe, amesema yeye ni muumini wa mabadiliko ndani ya CCM na ana imani kuwa yatapatikana chini ya uongozi wa Dk. John Magufuli.

Amesema Dk. Magufuli ni mgombea bora, wakala wa mabadiliko anayeakisi mahitaji ya sasa yajayo na kusisitiza kwamba, atapata kura za kishindo na kushinda uchaguzi mkuu.

Bashe alisema hayo jana akitoa salamu kwa wananchi wa Jimbo la Nzega Mjini katika uwanja wa Maegesho ya magari katika Mgombea urais wa CCM, Dk. John Magufuli kuhutubia umati wa wananchi kwenye mkutano wa kampeni za uchaguzi mkuu.

Akizungumzia kuhusu kutuhumiwa kwamba atahamia Ukawa, Bashe alisema kwamba kama mwana CCM alikuwa kwenye kundi fulani lakini baada ya chama kukamilisha vikao vyake na kumpata mgombea bora ameendelea kubaki ndani ya chama .

“Mimi na CCM hatukutana barabarani. Mimi ni muumini wa mabadiliko ndani ya chama  na tumempata wakala wa kutekeleza mabadiliko kwa vitendo,

“Kwenye uchjaguzi ndani ya CCM mimi na kaka yangu Bulembo tulikuwa kambi tofauti lakini uchaguzi umekwisha  tunatafuta kura za CCM kwa ajili ya Dk. Magufuli na ninaamini katika wapiga  47,000 za jimbo lake zinaweza kukosekana asilimia tano lakini zingine zote atapata,”alisema.

Akizungumzia ufisadi, Bashe alimuomba Dk. Magufuli kupambana na na ufisadi kwa vitendo na kwa kuwa ameshatangaza kwamba ataanzisha mahakama ya mafisadi na majizi ana imani atakomesha vitendo hivyo.

“Ndugu Magufuli nakuomba kwenye vita hii tumekuwa watu wa kusema bila kutekeleza, tutakuwa tukihoji mara kwa mara kwa utakayemtua kuwa waziri wa katiba na sheria,

Tutahoji juu ya muswada wa kuanzisha mahakama hiyo uje mapema ili watu washughulikiwe. Taifa leti ni tajiri kuna wezi wapo bandarini na pale upaangalie,” alisema.

Bashe pia aliwatahadharisha wanasiasa wanatafuta kura kwa udini na aliwataka watekeleze ahadi zao.

“Kuna kanisa la Moravian hapa Nzega kuna mtu alitoa cheki feki ya kuchangia kanisa tunahitaji aje atoe fedha alizoahidi,” alisema bila kutaja jina la mhusika.

Katika hatua nyingine, Bashe alimuomba Dk. Magufuli akishachaguliwa kuwa Rais, amsadie kutatua kero ya maji kwa kumpati matanki makubwa matano na kujengewa daraja katika eneo la Mto Nobola.

Pia aliomba serikali ya awamu ya tano iendelee kuawangalia wafanyabiashara ndogondogo wakiwemo mama ntilie ambao wamekuwa wakinyanyaswa kwa kufukuzwafukuzwa.

Alisema katika eneo la uwanja huo uliokuwa ukifanyika mkutano kuna mama ntilie wanaouza chakula wamekuwa wakinyanyaswa na halmashauri yake hivyo, aliaonya watendaji kwamba waache wafanye biashara zao bila matatizo.

Akizungumza katika mkutano huo Dk. Magufuli alimuhakikishia Bashe kwamba, serikali itatekeleza mambo yote ili mradi kuwaondolea kero wananchi.

“Naomba haya ya maji, daraja, wafanyabishara ndogondogo mniachie nitayamaliza na nitajenga barabara za lami. Mimi ndio Magufuli kwangu ni kazi tu,” alisema.

Dk. Magufuli alimsifu Bashe kuwa ni kijana mvumilivu ambaye mwaka 2010 alishinda kura za maoni lakini hakuteuliwa na akabaki kuwa mwana CCM hakuhama kwenda kokote na sasa imefika wakata atakuwa mbunge.

Aliwaomba wananchi wa Nzega waichague CCM kwa kuwa imejipanga kuelata mabadiliko makubwa ya kiuchumi na kwa kuwawezesha wananchi wa hali ya chini ili wabadilishe maisha yao.

“Mimi nimeshagombea urais na Oktoba 25, mwaka huu, nikishashinda watu wanaonyanyasa  wafanyabiashara ndogondogo watafute pa kwenda, sitakubali kwa kuwa hizi kero ndogo ndio zinawafanya wasijikwamue kiuchumi,”alisema.

Dk. Magufuli alisema kama  eneo la stendi, halmashauri itafute eneo lingine lipimwe kwa ajili ya kujengwa stendi na eneo la uwanja huo litumike kwa ajili ya mama lishe na wengine.

Dk. Kingwangala

Kwa upande wake Mgombea ubunge wa CCM jimbo la Nzega Vijijini, Dk. Hamisi Kingwangala, ameliponda kundi la vyama vya siasa linalounda Ukawa, kwamba wamepoteza mwelekeo kwa kuwachukua wahandisi na wakandarasi wa ufisadi.

Amesema kwa miaka 20 ajenda yao kukubwa ilikuwa ni kupambana na ufisadi, lakini kwa sasa ajenda yao ni kushika dola wameamua kuwatumia mafisadi wakiamini kwamba watawafikisha kwenye lengo lao la kuingia ikulu.

Dk. Kingwangala alisema hayo jana alipozungumza na wananchi wa Nzega katika mkutano wa kampeni za uchaguzi uliofanyika katika uwanja wa Barafu mjini hapa.

Alisema  mwaka huu CCM imemleta Mgombea urais muadilifu, mwaminifu, mchapakazi na msomi aliyebobea, Dk. John Magufuli na kusababisha wapinzani kukosa hoja na kuanza kuhangaika mafisadi waliohama CCM.

“CCM imemsimamisha mgomnbea bora wenzetu waliamua kuwachukua wahandisi na makandarasi wa ufisadi. Nawaomba wana Nzega tuwe makini tuchague kiongozi kwa kutulia,”alisema.

Dk. Kingwangala alisema ajenda ya upinzani haijawahi kuwa maendeleo hata siku moja tangu walipoanzisha vyama vyao hivyo Watanzania wanapaswa kuwa makini katika uchaguzi wa mwaka huu.

“Lengo lao ni kutaka kushika dola na sasa wameamua kupitia njia yoyote hata iweze ya shetani ili mradi wafike Ikulu. Msikubali mchagueni Dk. Magufuli hana tabia ya uongo ni muadilifu na mtekelezaji,”alisema.

Alisema ndani ya CCM wapo mafisadi wachache ambao baada ya Dk. Magufuli kuteuli wamekuwa na hofu kubwa  na kasi yake ya utendaji na sasa wanatafuta pa kwenda, hivyo wananchi wamchague ili asafishe serikali na chama na kujenga nidhamu.

Bulembo

Katika hatua nyingine akizungumza katika mikutano ya kampeni za uchaguzi  Nzega na Tabora Mjini wakati akimnadi Dk. Magufuli, Mjumbe wa Kamati Kuu, Abdallah Bulembo, alimtaka Waziri Mkuu Mstaafu, Fredrick Sumaye, arejeshe asilimia 80 ya mshahara wa waziri mkuu na walinzi.

Alisema kwa miaka 10 amekuwa waziri mkuu anasema serikali ya CCM kwa miaka 54 haijafanya kitu, lakini mpaka sasa anaishi kwa mashahara wa waziri mkuu ambao hakuufanyia kazi yoyote.

“Tumemvumilia sasa tumechoka, tutamchapa. Tunamtaka arudishe walinzi ili kuthibisha kwamba hastahili kwa kuwa miaka yote 10 alikuwa analipwa bure bila kufanya kazi,” alisema.

Bulembo alisema Sumaye ametimkia ukawa baada ya kuona hana siafa za kiongozi ndani ya CCM, aligombea  ujumbe wa NEC, ‘akapigwa’ na Dk. Mary Nagu.

Alisema hakuna kiongozi aliyetoka CCM kwenda upinzani kama hana makandomakando  na kukosa sifa za kuwa kiongozi ndani ya Chama.

Bulembo alisema pia anamshangaa Freeman Mbowe ambaye ameanza kulalamika kwamba wataibiwa kura wakati wao na Mgombea wao Edward Lowassa wanapita angani Dk. Magufuli anapita chini.

“Wapiga kura wako angani au chini anakopita Dk. Magufuli,” alihoji Bulembo huku ajijibiwa na umati wa wananchi wa Tabora Mjini waliofurika uwanja wa Allya Hassan Mwinyi.

Alisema CCM imeshafanya kampeni kwenye mikoa 23, Dk Magufuli ameshakwenda mikoa 12 na Mgombea mwenza Samia Suluhu Hassan, ameshapita mikoa 11.

Bulembo ambaye ndiye kiongozi wa msafara wa kampeni wa Dk. Magufuli alisema mpaka sasa Dk Magufuli ameshafanya mikutano mikubwa ya hadhara 98 na mikutano isiyo rasimi  300.

Kwa upande wa Samia ameshafanya mikutano rasmi 65 na mikutano isiyo rasmi 200. Alisema kwa kuwa wapiga kura wapo chini Oktoba 25 kwenye uchaguzi mkuu lazima wachapwe tu na CCM itashinda.