JEMBE LA SOLWA LAMKUNA DK. MAGUFULI

Na Chibura Makorongo,Shinyanga

MGOMBEA urais wa CCM, Dk. John Magufuli, amempongeza mgombea ubunge wa jimbo la Solwa, Ahmed Salum, kwa kutekeleza vyema Ilani ya Uchaguzi ya CCM ya mwaka 2010-2015.

Dk. Magufuli alitoa pongezi hizo juzi, alipokuwa akiwahutubia wakazi wa jimbo la Solwa, katika moja ya mikutano yake ya kampeni, uliofanyika kijijini Solwa.

Mgombea huyo wa urais wa CCM aliwaomba wakazi wa jimbo hilo kuhakikisha wanamchagua tena

Salum ili aendeleze miradi ya maendeleo aliyokwishaianzisha.

Alisema binafsi anamfahamu Salum kuwa ni mmoja wa wabunge wenye upeo mkubwa katika ufuatiliaji wa mambo na utekelezaji wa miradi ya maendeleo.

“Ndugu zangu wakazi wa Solwa, tumekuja hapa kuwaombeni kura zenu Oktoba 25, mwaka huu, msifanye makosa, nichagueni mimi Magufuli, kwa ubunge mpigieni jembe lenu, Ahmed (Salumu) na madiwani wote wa CCM, msifanye makosa, tunataka funguo tatu, msituchanganyie vyama,” alisema.

Akielekezea mafanikio ya utekelezaji wa Ilani ya Uchaguzi katika jimbo hilo, Salum alisema moja ya mambo aliyoyafanyia kazi ni usambazaji wa huduma ya maji na umeme katika maeneo mengi ndani ya jimbo lake, ikiwemo uboreshaji wa elimu.

 
Salum alisema katika kipindi cha miaka mitano iliyopita, alikamilisha mradi wa maji ya bomba katika vijiji vya Ng’homango, Kadoto, Jimondoli, Ichogo, Lyabusalu na Mwajiji, ambao umewezesha watu 212,710 kupata maji safi na salama, uliotekelezwa kwa fedha iliyotolewa na serikali kuu.

“Mheshimiwa mgombea urais, ndani ya miaka mitano nimefanya mengi, lakini kwa upande wa sekta ya maji ninatarajia ifikapo Desemba, 2015, idadi ya wananchi watakaopata huduma ya maji safi na salama itaongezeka kutoka asilimia 60.03 ya sasa hadi asilimia 68.52 baada ya vijiji vingine vinane kupatiwa huduma hiyo,” alisema.

Kuhusu miundombinu ya barabara, alisema katika kipindi cha miaka mitano iliyopita, Halmashauri ya Wilaya ya Shinyanga, imefanikiwa kuongeza mtandao wa barabara na kufikia kilometa 1,239.89, ikiwa ni pamoja na kukarabati maeneo korofi kwa kutumia fedha kutoka mfuko wa barabara.

00000