RAIA WAPYA WA TANZANIA WAAHIDI KUMPA KURA RAIS KUTOKA CCM

NA PETER KATULANDA, KALIUA

 WATANZANIA waliopata urai mpya wilayani hapa, baada ya kuhamia kutoka  Burundi, wameahidi kuipigia kura za kishindo CCM, akiwemo mgombea wake wa urais, Dk. John Magufuli.

Wamesema licha ya kushawishiwa na wagombea wa vyama vingine, akiwemo Mwenyekiti wa chama cha ACT Wazalendo, Zitto Kabwe, wasiipigie kura CCM, wataipigia kura zao zote na hakuna mwingine wanayetamani awe rais wa Tanazania zaidi ya Dk. Magufuli.

Ahadi hiyo waliitoa juzi kwa nyakati tofauti katika mikutano ya kampeni za mgombea ubunge wa CCM katika Jimbo la Ulyankulu, John Kadutu, iliyofanyika katika vijiji vya Mtakuja, Keza, Imara na Taba Kata ya Igombemkuru, wilayani Kaliua, mkoani Tabora.

“Toka mwaka 1972 wazazi wetu walipokimbia Burundi na kupewa makazi hapa Keza, kulikuwa na chama kimoja tu cha CCM, wamezeekea hapa, wengine wamefia hapa na sisi wengine tumezaliwa hapa, hata uraia tumepewa na serika ya CCM. Tunamshukuru Rais Jakaya Kikwete,” alisema Midiam Tito.

Tito, mkazi wa Keza na Katibu wa CCM wa Kata hiyo, alisema yeye na raia wenzake wapya, wote watakipigia kura Chama Cha Mapinduzi ambacho kimekuwa na uongozi bora na kimetunza amani ya Tanzania.

 “Kwani Rais Kikwete angekataa tusipewe uraia nani angemlazimisha,” alihoji  Adoneth Dotto.

Adoneth alisema wana matumaini na mapenzi makubwa kwa CCM na kwamba tangu  akiwa mdogo, wazazi wake walimwambia CCM wasingelinda amani na kusaidia nchi nyingine, wasingekuwa hai na asingezaliwa.

Wakimkaribisha Kadutu kwa shangwe, vifijo, vigelegele na nyimbo za kumpongeza Dk. Magufuli katika vijiji vya Imara na Taba, raia hao walisema wiki iliyopita, Zitto  aliondoka kwa aibu baada ya kukosa watu wa kumsikiliza kabla ya kwenda kuhutubia Ulyankulu, ambapo pia alipata watu wachache.

 Walisema wanatamani Dk. Magufuli awatembelee na kuona makazi yao ambayo kutokana na kutokuwa na uhakika wa kuishi (kabla ya kupewa uraia) kwa miaka 10, walishindwa kuyaendeleza, lakini sasa kwa kuwa wamekuwa Watanzania halali, watachapa kazi wapate maendeleo.

 Watanzania hao ambao kutokana na kutosajiliwa mapema kwa Kata yao, hawataweza kupiga kura za madiwani, waliahidi kumpa kura nyingi Kadutu na kudai kuwa wagombea wa UKAWA, akiwemo Edward Lowassa, wasipoteze muda wao kwenda kuwaomba kura, kwani  watamtazama kama walivyomfanyia Zitto.

Akizungumza na wananchi hao, Kadutu alisema Rais Kikwete kama alivyokuwa Hayati Baba wa Taifa, Mwalimu Julius Nyerere, anapenda watu, atakumbukwa kwa mengi, likiwemo la wao kupewa uraia.

Aliwaomba wananchi hao kuichagua CCM ili washirikiane kujenga nchi na kuwaletea maendeleo, ambapo aliahidi kufufua na kuboresha barabara za awali wakati wa makazi ya raia hao walipokuwa wakimbizi.

Aidha, atashirikiana na wananchi hao kujenga vyumba vya madarasa, nyumba za walimu, zahanati na kwa kuanzia ,atatoa mifuko 300 ya saruji kwa ajili ya ujenzi wa shule ya Msingi Mwankuba na kujenga nyumba moja ya walimu katika Kijiji cha Taba.

Kadutu alisema ubora wa Dk. Magufuli hauwezi kulinganishwa na wa wagombea wengine wanaosaka urais.

 Watanzaia hao wapya walipewa uraia Aprili, 2014, baada ya kuishi nchini kwa zaidi ya miaka 40 tangu mwaka 1972 walipokimbia machafuko ya mapigano ya wenyewe kwa wenyewe nchini Burundi na wengine kuzaliwa nchi hapa baada ya wazazi kukimbia.