VIZIWI WALIA NA WANASIASA

NA ATHNATH MKIRAMWENI

WATU wenye ulemavu wa kusikia wamevitaka vyama vya siasa kuweka wakalimani kwenye mikutano ya hadhara, ili kuwawezesha kufahamu sera na ahadi zinazozungumziwa na wagombea.

Wamesema mikutano mingi ya kampeni ya vyama vya siasa haina wakalimani, hali inayowafanya washindwe kushiriki kikamilifu na badala yake kuwa wasindikizaji, licha ya kwamba wanapiga kura kuchagua viongozi.

Kauli hiyo imetajwa kuwa ni changamoto kubwa kwa jamii hiyo, kwanihawatambui kinachosemwa na wagombea kuanzia urais, ubunge na udiwani.

Ofisa Jinsia na Maendeleo wa Chama Cha Viziwi Tanzania (CHAVITA), Lupi Maswanya, alisema  ili  washiriki  ipasavyo mikutano ya kampeni, suala la vyama kuweka wakalimani ni la msingi.

Alisema kutokana na changamoto hiyo, wameandaa Maadhimisho ya Siku ya Walemavu yaliayoanza jana na kilele chake kitakuwa Septemba 27, mwaka huu. 

Alisema lengo la maadhimisho hayo ni kusisitiza  ujumuishaji wa haki za matumizi lugha ya alama  nchini kwa watoto viziwi, ili wanufaike na elimu na fursa nyingine za kijamii.

Lupi alisema maadhimisho hayo yamebebwa na kauli mbiu isemayo ‘Kwa haki za lugha ya alama ya Tanzania watoto wetu wanaweza kuihamasisha   jamii kutambua mchango wa viziwi, haki za binadamu na maandalizi ya viziwi katika kukabiliana na changamoto mbalimbali za maisha’.

“Kwa haki ya lugha ya alama watoto wetu  wanaweza kutambua lugha za alama kwa njia halali ya kiisimu ya kuwasilisha mawazo, fikra na hisia za kujadili mijadala mbalimbali,’’ alisema.

Naye Ofisa Uhusiano Umoja wa Miradi kwa Viziwi (UMITA), Tungi Mwanjala, aliiomba serikali kuwatengenezea walemavu vitambulisho maalum vitakavyowatambulisha siku ya kupiga kura ili nao kushiriki ipasavyo kuchagua kiongozi makini.

‘’Watu wasioona wametengenezewa utaratiu wa kusoma kwa kutumia nukta nundu, lakini sisi  tusiosikia hatujatengenezewa mazingira rafiki kutuwezesha kushiriki kupiga kura, basi  tutengenezewe vitambulisho maalumu vya kututambulisha,’’ alisema.

Maadhimisho hayo yanafanyika mkoani Pwani, ambapo mgeni rasmi anatarajiwa kuwa Waziri wa Afya na Ustawi wa Jamii, Dk. Seif Rashid.