DK. SHEIN AAHIDI KUMWAGA KOMPYUTA SHULE ZA SEKONDARI

Na Hamis Shimye, Zanzibar

MGOMBEA urais wa Zanzibar kupitia Chama Cha Mapinduzi (CCM), Dk. Ali Mohamed Shein, ameahidi kutoa kompyuta katika shule za sekondari za Kusini Unguja na kuongeza walimu wa sayansi katika shule hizo.

Akizungumza katika mkutano wa kampeni, uliofanyika jimbo la  Paje, Kusini Unguja, jana, Dk. Shein alisema kuongeza idadi ya walimu wa sayansi katika shule hizo kutasaidia kuongeza ufaulu katika masomo hayo.

"Serikali itaboresha sekta ya elimu kwa kujenga shule na tayari tunamalizia shule 22, tulizoanza kuzijenga mwaka jana,”alisema.

Mbali na hilo, alisema wamefanikiwa kutekeleza ahadi walizoahidi na kusisitiza kuwa ahadi ya maji katika eneo la Paje kwa baadhi ya maeneo inatarajiwa kumalizika hivi karibuni.

Dk. Shein alisema anaamini mambo mengi aliyoyaahidi yatamalizika kwa kuwa kila alichokiahidi lazima kitekelezwe kwa wananchi wa Zanzibar.

Aliwaomba wananchi wa Paje kujitokeza kwa wingi tarehe ya uchaguzi mkuu na kuhakikisha wanampa kura za kutosha ili aweze kushinda kwenye uchaguzi huo.

Shamsi awashangaa viongozi wa CUF

ALIYEKUWA Waziri Kiongozi wa Serikali ya Mapinduzi ya Zanzibar, Shamsi Vuai Nahodha, amesema anashangazwa na viongozi wa CUF kulalamika serikali haitoi ajira wakati Wizara ya Ajira ilikuwa chini yao.

Nahodha alitoa kauli hiyo juzi kwenye mkutano wa kampeni wa kumnadi mgombea urais wa CCM wa Zanzibar, uliofanyika katika uwanja wa Paje, Kusini Unguja.

Alisema katika Serikali ya Umoja wa Kitaifa (SUK), wizara za ajira, biashara, utalii, viwanda, viwanja vya ndege na barabara zilikuwa zinasimamiwa na mawaziri wa CUF.

"Anapotokea mpinzani anayesema serikali ya CCM haitoi ajira, huyo apimwe akili. Ningekuwa mimi ndiye Maalim Seif, ningewaita mawaziri wangu na kuwauliza kimetokea nini. Lakini wao kila mtu ni kulalamika tu, haijulikani kiongozi nani," alisema.

Nahodha alisema CUF wakiulizwa kwa nini wanashindwa, wanadai sera inayotekelezwa ni ya CCM, lakini kazi ya upinzani ni kutoa mawazo na kutengeneza sera mbadala.

Alisema alikuwa akiwategemea CUF kufanya mambo hayo, lakini imekuwa kinyume, badala yake wamekuwa watu wa kulalamika ovyo bila sababu za msingi.

"Nawaomba ndugu zangu tumpe kura za kutosha Dk. Shein kwa kuwa ni mtu makini na mwenye uwezo wa kuleta maendeleo kwa wananchi," alisema.