HAKUNA WA KUIBADILI ZANZIBAR KWA SIKU 100-BALOZI IDDI

Na Mwandishi Wetu, Zanzibar 

MAKAMU wa Kwanza wa Rais wa Zanzibar, Balozi Seif Ali Idd amesema mwanasiasa anayedai akichaguliwa ataibadilisha Zanzibar kwa siku 100 kuwa Singapore, huyo ni muongo.

Amesema ingekuwa kauli hiyo ni ya ukweli, mgombea urais wa Zanzibar, Maalim Seif Sharrif Hamad, angeweza kuibadili Pemba kuwa Singapore ndani ya miaka 20 aliyokuwa kiongozi serikalini.

Kauli ya Balozi Iddi imetokana na kauli ya Maalimu Seif Sharif Hamad, ambaye ni mgombea wa CUF katika nafasi ya urais Zanzibar, kuwa ataibadilisha Zanzibar na kuwa Singapore ndani ya siku 100, endapo atachaguliwa kuwa rais.

Balozi Iddi alisema Maalimu Seif ni mtu muongo na ndio maana hajawahi kuchaguliwa katika uchaguzi mkuu zaidi ya mara nne alizoshiriki akiwa mgombea wa CUF.

Alisema Maalim alianza kugombea urais visiwani humo tangu mwaka 1995, lakini amekuwa akiangushwa na viongozi mbalimbali kutokana na kutokuwa na ushawishi.

"Naamini Dk. Shein atamwangusha tena na ninamwambia kama anataka mabadiliko, aanze yeye mwenyewe ndani ya Chama chake," alisema.

Alisema Maalim ni mtu mbaya na kama ukitaka kugombana naye, mweleze unataka kugombea ukatibu mkuu wa CUF.

Balozi Iddi alisema mgombea huyo wa CUF hana sera yeyote ya kuleta mabadiliko na kwamba alichobakia nacho ni kuwa na sera za uongo kwa wananchi.

CCM yawaombea waliopoteza

vitambulisho wapigekura

NAIBU Katibu Mkuu wa CCM (Zanzibar), Vuai Ali Vuai amesema CCM imeiandikia barua Tume ya Uchaguzi Zanzibar (ZEC) kuiomba iwaruhusu kupigakura wananchi waliopoteza vitambulisho vyao.

Pia, amesema CCM kamwe haiwezi kutumia sh. bilioni nne kwa ajili ya kununua shahada za kupigiakura kwa wananchi wa Unguja na Pemba.

Vuai alisema hayo juzi kwenye mkutano wa hadhara wa kampeni uliofanyika kwenye uwanja wa Paje, ulioko Kusini Unguja.

Alisema CCM inajiamini katika uchaguzi huu na ndio maana inaamini itaibuka na ushindi wa zaidi ya asilimia 60.

"Tunawaeleza wapinzani sisi hatuwezi kutoa fedha ili tushinde kwa kununua shahada za kura na ndio maana tumeiomba ZEC kuwaruhusu wapigekura wale waliopoteza vitambulisho," alisema.

Vuai alisema kama wangekuwa wamenunua shahada wasingekubali kuiandikia NEC kuiomba iwaruhusu wale waliopoteza vitambulisho wapigekura.

Alisema shutuma zinazotolewa kwa CCM ni sehemu ya kuanza kushindwa kwa CUF na ndio maana wanatoa visingizio vingi.

Katika hatua nyingine, Vuai alisema Serikali ya Umoja wa Kitaifa imepiga hatua kubwa visiwani humo kutokana na maendeleo makubwa.