IGP MANGU AWAONYA VIONGOZI WA SIASA MARA

Na Frank Geofray-Jeshi la Polisi, Tarime

MKUU wa Jeshi la Polisi nchini, Ernest Mangu, amewataka viongozi wa vyama vya siasa katika Wilaya za Tarime na Rorya, kufanya kampeni za kistaarabu ili kufanikisha uchaguzi mkuu na kuimarisha amani na usalama wilayani humo.

IGP Mangu aliyasema hayo wakati alipozungumza na wadau wa polisi, wakiwemo viongozi mbalimbali wa vyama vya siasa na wagombea ubunge na udiwani.

Aliyasema hayo alipokuwa katika ziara ya kikazi katika Kanda Maalumu ya Polisi Tarime na Rorya.

“Ili uchaguzi wa mwaka huu uweze kufanyika kwa amani, viongozi wa vyama vya siasa na wagombea hawana budi kuwashawishi wafuasi wao

kufuata maadili ya uchaguzi, ikiwemo kutotoleana lugha za matusi.

“Baada ya uchaguzi maisha yataendelea kama kawaida, hivyo ni jukumu la wananchi wote wa Tarime kuondoa uhasama katika mambo ya siasa kwa kuwa siasa sio uhasama,” alisema.

Aidha, aliwashauri wagombea ubunge na udiwani katika majimbo ya Tarime Mjini, Vijijini na Rorya, kukutana mara kwa mara ili kujenga kuaminiana na kutatua changamoto zinazojitokeza katika kipindi hiki cha kampeni na hatimaye siku ya uchaguzi mkuu.

Kamanda wa Polisi wa Kanda hiyo, Kamishna Msaidizi wa Polisi (ACP), Lazaro Mambosasa, aliwahakikishia wadau wote kuwa Jeshi la Polisi limejipanga vema kukabiliana na vitendo vyote vya vurugu vitakavyojitokeza.

Mambosasa alisema watahakikisha kwamba kila mwananchi aliyejiandikisha anapata fursa ya kupigakura bila vitisho vya aina yoyote.

Naye mgombea ubunge katika Jimbo la Rorya kwa tiketi ya CCM, Lameck Airo, alisema katika jimbo analogombea, hakuna vurugu kwa kuwa wamekuwa wakiheshimiana katika kampeni ili kuepusha vurugu kwa wagombea na wafuasi wao.

Kikao hicho kilihudhuriwa na viongozi mbalimbali wakiwemo wa dini, vyamavya siasa, wafanyabiashara, asasi zisizo za kiserikali, wazee wa kimila na wajumbe wa Kamati ya Ulinzi na Usalama Wilaya ya Tarime.