RIDHIWANI KUSIMAMIA MATUMIZI BORA YA ARDHI

Na Mwamvua Mwinyi, Vigwaza

MGOMBEA ubunge wa CCM katika jimbo la Chalinze, Ridhiwani Kikwete, amesema iwapo atachaguliwa kuwa mbunge, atahakikisha anasimamia vyema mpango wa matumizi bora ya ardhi.

Amesema lengo la uamuzi wake huo ni kuondoa kero ya migogoro  baina ya wakulima na wafugaji katika kata za Vigwaza na Pera, jimboni humo.

Ridhiwani alisema atahakikisha anashirikiana na viongozi mbalimbali kusimamia matumizi bora ya ardhi kwa kutenga maeneo ya wakulima na wafugaji ili kila mmoja aweze kunufaika kulingana na shughuli yake.

Alisema hayo juzi katika mkutano wa kampeni uliofanyika Kata ya Vigwaza jimboni humo na kuongeza kuwa, migogoro ya ardhi jimboni humo itapatiwa ufumbuzi wa kudumu.

Alisema inasikitisha kuona wakulima hawanufaiki kutokana na mifugo kula mazao yao, ama wafugaji kukosa haki zao, hivyo atahakikisha anasimamia kumaliza tatizo hilo.

Hata hivyo, alisema alishafanikiwa kupunguza tatizo hilo, hivyo lengo lake ni kulimaliza kabisa.

Katibu CCM wilaya ya Bagamoyo, Kombo Kamote, alisema kiongozi mwenye uwezo wa kushughulikia matatizo ya wananchi wa Chalinze ni Ridhiwani, hivyo aliwaomba wananchi kuendelea kumuunga mkono ili aweze kuliongoza jimbo hilo.

Alisema Ridhiwani amefanya mambo makubwa katika jimbo hilo kwa kipindi kifupi, hivyo anaamini katika kipindi cha miaka mitano ijayo atafanya mambo mengi zaidi.

Mgombea wa udiwani wa Kata ya Vigwaza, Muhsin Baruani, alisema iwapo atachaguliwa, atasimamia sheria na kudhibiti migogoro ya ardhi ambayo, kwa Vigwaza ni tatizo kubwa.