MAJALIWA: MADIWANI WASIPEWE FEDHA ZA MAENDELEO MKONONI

WAZIRI Mkuu, Kassim Majaliwa amewataka wakurugenzi wa halmashauri na manispaa nchini, kuacha kutoa fedha taslimu na kuwapa madiwani ili zikafanye kazi za maendeleo.

Badala yake, amewataka waandae mfumo maalumu wa kutoa fedha hizo kama zinavyotolewa fedha za mfuko wa jimbo, ambazo ni maalumu kwa wabunge, lakini zinatumika kwa shughuli za maendeleo jimboni.

Alitoa kauli hiyo jana, wakati akizungumza na viongozi na watendaji wa mkoa wa Ruvuma, baada ya kupokea taarifa ya mkoa huo kwenye Ikulu ndogo, iliyoko Manispaa ya Songea.

“Nimepata taarifa kuwa fedha za maendeleo kwa madiwani zinakabidhiwa mkononi. Hapana. Msiwape fedha mkononi, bali zifuate mfumo wa utoaji fedha wa serikali. Kama mlikuwa na matumizi ya aina hiyo, mwisho wake ni jana,” alisisitiza Waziri Mkuu Majaliwa.

“Fedha za Mfuko wa Jimbo ni za mbunge, lakini hapewi mkononi bali zinapelekwa kwenye halmashauri na yeye anahusika kwenye kikao cha maamuzi. Anakubaliana na madiwani wenzake ni miradi ipi ipatiwe fedha, ambayo mara nyingi inakuwa imekwishaidhinishwa na vikao husika,”aliongeza.

Waziri Mkuu alisema makusanyo ya fedha yanayofanywa na halmashauri, hayana budi kuangaliwa pia na jinsi fedha hizo zinavyotumiwa.

“Lazima tukishakusanya tuangalie tumepata kiasi gani, siyo kukaa na kuamua kutoa shilingi laki tano tano kwa kila diwani. Suala la matumizi ni muhimu sana, ni lazima fedha hizo ziende kwenye miradi ya maendeleo,”alisisitiza Majaliwa.

Alisema wapo baadhi ya watu wanaamua kugawana fedha kwa kigezo cha maendeleo, lakini wanaishia kutumia fedha hizo kwa kigezo cha kujengeana uwezo.

“Hii siyo sahihi na jana, nimepiga marufuku posho za aina hii na fedha za vitafunwa kwa sababu zinaishia kwa wakubwa wachache na waliozikusanya hawapati chochote,”alionya Waziri Mkuu Majaliwa.

Akizungumzia kuhusu ukusanyaji wa mapato kwenye halmashauri, aliwataka waangalie baadhi ya kampuni, ambazo zinajitokeza kutoa vifaa vya kukusanya ushuru,  lakini wanatumia 'software', ambazo zinawanufaisha na wao pia.

“Tumieni watu wenu wa TEHAMA kukagua mifumo hii kwani kuna baadhi ya watu wanaoleta zile mashine sio waaminifu. Watu wa TEHAMA wazikague na kujiridhisha kuwa hakuna mianya ya wizi.

"Tumegundua wako wanaokusanya fedha, lakini asilimia 80, inangia kwenye akaunti za halmashauri na asilimia 20, inapelekwa sehemu wanayoijua wao. Ukiangalia unaona mapato yanaongezeka, lakini kumbe pia unaibiwa. Jaribuni kuchunguza na mjiridhishe na hizo software zao,”alitahadharisha.