WALIOPORA MIL. 25/- DAR WATIWA MBARONI

POLISI Kanda Maalumu ya Dar es Salaam, inawashikilia watu waliohusika na tukio  la ujambazi wa sh. milioni  25,  lilitokea  juzi eneo la TAZARA, Dar es Salaam.

Taarifa iliyotolewa jana na Kamishna wa Polisi Kanda Maalumu ya Dar es Salaam, Simon Sirro,  ilisema watu hao walikamatwa na wapo kituoni kwa ajili  ya kuhojiwa.

“Tumefanikiwa  kuwakamata  baadhi ya watu waliojihusisha  na  tukio la ujambazi  maeneo ya TAZARA na wako kituoni, ambapo  polisi wako nao kwa ajili ya kuwahoji ili kujua  lengo la wizi huo,” alisema.

Sirro  alisema  wizi huo ulifanyika eneo hilo bila mlio wowote wa bunduki, jambo lililosababisha  polisi  kushindwa  kutambua tukio hilo mapema.

Alisema watu hao walivunja kioo cha gari la  mmiliki wa kampuni inayotengeneza mabati ya Sun Shine na  kufanikiwa kuiba fedha hizo.

Sirro alisema upelelezi bado unaendelea ili kuwabaini watu wengine waliohusika na  uporaji wa fedha hizo na ukikamilika, watawafikisha mahakamani.

Wizi huo ulitokea juzi, saa nne asubuhi, wakati gari  hilo likiwa  kwenye foleni  ya magari eneo la TAZARA.

Majambazi hao walipora fedha hizo wakiwa katika eneo hilo huku askari waliokuwa doria wakiwa wametanda wakikamata  pikipiki  zilizokuwa zikitoka eneo la Buguruni.

Ilielezwa kuwa watu waliokuwa  kwenye gari walikuwa wakipeleka fedha hizo benki  pasipokuwa na ulinzi wa polisi.