DOVUTWA, MREMA WAIPA TANO NEC YA CCM

MWENYEKITI wa Taifa wa Chama cha UPDP,  Fahmi Dovutwa, ameipongeza Halmashauri Kuu ya Taifa  (NEC) ya Chama Cha Mapinduzi (CCM), kwa kuwaengua wagombea wa uenyekiti wa wilaya nne na kusema kwamba, kama mtu sio kada, ni muasi hafai kuwa kiongozi.

Amesema uamuzi uliofanywa na CCM ni wa kuigwa na vyama vingine vya siasa nchini, kwa sababu uongozi ni lazima apewe mtu ambaye ni kada.

Dovutwa alitoa kauli hiyo jana, alipozungumza na gazeti hili kuhusu uamuzi uliochukuliwa na NEC, wa kuwaengua wagombea hao, kutokana na kasoro za maadili zenye viashiria hatarishi kwa Chama.

Alisema kila chama kina utaratibu wake wa kuwapata wagombea, hivyo haijarishi wilaya nne kuenguliwa na hata ingekuwa mkoa.

Mwenyekiti huyo alisema hatua ya CCM kuwaengua wagombea wa wilaya nne ni wa kuigwa na vyama vyote vya kisiasa nchini.

Kwa mujibu wa Dovutwa, uongozi wa chama ni lazima apewe mtu ambaye ni kada, siyo muasi, hivyo huyo hafai kuwa kiongozi na hilo siyo la CCM, bali ni la vyama vyote nchini.

“Kama mikoa wanaonyesha kuna uasi, hauwezi kuendelea na waasi. Mwanachama wa chama sawa sawa na askari, kama askari ana ndimi mbili hafai kuwa askari,”alisema.

“Kama wenyewe wameona wanachama hao wameasi, wapo kinyume na chama, nadhani kwa utaratibu wa chama wapo sahihi, kwani kila chama kina utaratibu wake,”alisema.

Kwa upande wake, Mwenyekiti wa Taifa wa Chama cha TLP, Augustine Mrema, alisema CCM imefanya jambo zuri kuwaengua wagombea hao, kwani imeona  haiwezi kuendelea na wanachama, ambao hawana viwango na sifa.

Mrema alisema uamuzi uliofanywa na Chama una nia njema ya kukijenga katika misingi ya maadili.

Mwishoni mwa wiki iliyopita, akizungumza na waandishi wa habari, baada ya kumalizika kwa mkutano wa NEC, ambao ulipitisha majina ya wagombea wa uenyekiti wa katika wilaya nchini, Katibu wa NEC, Itikadi na Uenezi, Humphrey Polepole, alisema  wagombea hao walienguliwa  katika wilaya nne.

Alizitaja wilaya hizo kuwa ni Moshi Mjini, Siha na Hai zote za mkoa wa Kilimanjaro na Makete mkoani Iringa. Alisema uchaguzi katika wilaya hizo utatangazwa tena.

Pia, uchaguzi kwenye wilaya ya Musoma utatangazwa baadaye, baada ya Halmashauri Kuu kuamua kuundwa kwa wilaya mpya mbili za kichama , ambazo ni Musoma Mjini na Musoma Vijijini.

Alisema wagombea waliopitishwa kushiriki uchaguzi huo wanapaswa kuzingatia kanuni za uchaguzi, uongozi, maadili na katiba ya CCM.

Polepole alisema wagombea watakaoshindwa kuzingatia maadili, Chama kitawachukulia hatua, ikiwemo kuwafukuza uanachama.