LUGHA YA KUUDHI KWA JPM YAMPANDISHA KIZIMBANI HALIMA MDEE

KESI ya kutumia lugha ya matusi dhidi ya Rais Dk. John Magufuli, inayomkabili mbunge wa Jimbo la Kawe, Halima Mdee (CHADEMA), imepangwa kuanza kusikilizwa, Novemba 8, mwaka huu.

Hatua hiyo inatokana na upande wa jamhuri katika kesi hiyo iliyoko Mahakama ya Hakimu Mkazi Kisutu, jana ilimsomea maelezo ya awali.

Mbele ya Hakimu Mkazi Mwandamizi, Victoria  Nongwa, Wakili wa Serikali, Leonard  Chalo akishirikiana na Wakili wa Serikali, Janeth Magoho, walimsomea Halima maelezo ya awali.

Kabla ya kusomewa maelezo, Halima alikubushwa shitaka linalomkabili ambalo alikana kulitenda.

Kwa mujibu wa hati ya mashitaka, Halima anadaiwa Julai 3, mwaka huu, makao makuu ya CHADEMA, yaliyoko maeneo ya Ufipa, wilayani Kinondoni, Dar es Salaam, alitoa lugha ya matusi dhidi ya Rais Magufuli.

Halima anadaiwa kutamka nanukuu; 'anaongea hovyo hovyo anatakiwa afunge breki,' jambo ambalo lingesababisha uvunjifu wa amani.

Akimsomea maelezo ya awali, Janeth  alidai Halima  (39), mbunge na mkazi wa Makongo, Kinondoni, Dar es Salaam.

Alidai Julai 3, mwaka huu, mshitakiwa alikuwa maeneo ya ofisi za CHADEMA, zilizoko  Ufipa, Dar es Salaam, ambapo akiwa hapo alitoa maneno hayo ya kejeli kwa Rais Magufuli.

Janeth alidai kutokana na maneno hayo, Julai 4, mwaka huu, mshitakiwa alikamatwa Kibamba, wilayani Kinondoni, na kuhojiwa ambapo alikubali kusema maneno hayo na baada ya utaratibu wa polisi kukamilika alipelekwa mahakamani.

Baada ya kusomewa maelezo hayo, mshitakiwa huyo ambaye anatetewa na wakili Hekima Mwesigwa, alikubali taarifa zake binafsi, Julai 3, mwaka huu alikuwa makao makuu ya CHADEMA na kukamatwa kwake huku akikana maelezo mengine.

Hakimu Victoria aliahirisha shauri hilo hadi Novemba 8, mwaka huu, kwa kuanza kusikilizwa kwa mashahidi wa upande wa jamhuri na dhamana ya mshitakiwa inaendelea.