MKEMIA MKUU KUCHUNGUZA GONGO ILIYOUA WATU 10 DAR

SAKATA la vifo vya watu 10, waliopoteza maisha kwa kunywa pombe haramu ya gongo, limefikishwa kwa Mkemia Mkuu wa Serikali kwa ajili ya uchunguzi zaidi.

Hatua hiyo imefikiwa kwa ajili ya kubaini aina ya sumu iliyokuwepo kwenye pombe hiyo.

Oktoba 04, mwaka huu, watu 10 walifariki dunia kwa kunywa pombe haramu.

Akizungumza jijini Dar es Salaam, jana, Kamanda wa Kanda Maalumu ya Dar es Salaam, Lazaro Mambosasa, alisema jana kuwa, ili  kubaini aina ya sumu iliyokuwa kwenye pombe hiyo, wamelazimika kupeleka vielelezo kwa Mkemia Mkuu wa Serikali.

Mambosasa alivitaja vielelezo hivyo kuwa ni chupa tatu zenye ujazo wa lita moja, zilizokuwa na kinywaji hicho haramu, ambazo ziliokotwa eneo la Kimara Stop Over.

"Tulivipata vielelezo hivyo katika pagala lililokuwa likitumika kwa ajili ya uuzaji wa pombe hiyo haramu, tumevipeleka kwa mkemia kwa uchunguzi zaidi,” alisema Mambosasa.

Aliongeza: “Inasikitisha na kushangaza  kuona eneo hilo likitumika kwa shughuli ya kuuza pombe haramu, kwani hapo ni eneo lililovunjwa, ambako muuzaji huyo anaendelea na biashara haramu."  

Alisema wamegundua ‘pagala’ hilo kufuatia upelelezi wa kina uliofanywa na polisi, kwamba lilibaki baada ya bomoa bomoa kwa baadhi ya nyumba kufanyika.

Alisema muuza gongo huyo ajulikanae kwa jina moja la Hanoza, ni miongoni mwa waliofariki kwa kunywa kinywaji hicho.

Mambosasa  aliwataja wengine waliopoteza maisha kuwa ni Baruku  Rashid (64), Mohamed  Issa (67),  Stanlaus Joseph(68), Steven  Yessey (61), Monika Legukama (42), Alex  Madega (41), Hamis Mbala (35) na Ekson Nyoni (28), wote wakazi wa Kimara.

Alisema watu hao waliwabaini baada ya kupata taarifa kuwa, kuna watu wako Hospitali ya Mwananyamala na Tumbi, iliyopo Kibaha,  ambao walifariki kwa kunywa gongo.

Pia, alisema miili ya watu hao imehifadhiwa katika Hospitali ya Taifa, Muhimbili, ikitokea Hospitali ya Mwananyamala.

Mganga Mkuu wa Hospitali ya Mwananyamala, Daniel Nkungu alilithibitishia gazeti hili kupokea miili hiyo tangu Jumanne, kwa nyakati tofauti.

Alisema awali, alipokea miili saba huku baadhi wakiwa bado wazima na wengine wamepoteza maisha. Alisema walioonekana wazima, hawakuendelea kuishi muda mrefu, kabla ya kupoteza maisha.

"Hadi sasa tayari tumeshaipeleka miili hiyo Hospitali ya Taifa ya Muhimbili kwa ajili ya uchunguzi," alisema Dokta Nkungu.