VIGOGO TANTRADE JELA MIAKA MITATU

MAHAKAMA ya Hakimu Mkazi Kisutu, imewatia hatiani vigogo wawili wa Mamlaka ya Maendeleo ya Biashara Tanzania (Tan Trade) na kuwapa adhabu ya kulipa faini ya sh. milioni 20, kila mmoja na iwapo watashindwa, watatumikia kifungo cha miaka mitatu.

Washitakiwa waliopewa adhabu hiyo ni Mkurugenzi wa Utafiti na Mipango wa mamlaka hiyo, Samweli Mvingira na Naibu Mkurugenzi wa Fedha na Utawala, Judith Msuya, ambao walitiwa hatiani kwa makosa manne ya matumizi mabaya ya madaraka.

Hukumu hiyo ilitolewa mwishoni mwa wiki iliyopita na Hakimu Mkazi Mfawidhi wa mahakama hiyo, Cyprian Mkeha, baada ya kusikiliza ushahidi wa pande zote husika.

Akisoma hukumu hiyo, Hakimu Mkeha aliwatia hatiani washitakiwa hao katika mashitaka manne, kutokana na upande wa jamhuri kuweza kuthibitisha mashitaka dhidi yao pasi na kuacha shaka yoyote.

Hata hivyo, Hakimu Mkeha aliwaachia washitakiwa hao katika shitaka la tano, kwa kuwa upande wa jamhuri umeshindwa kuthibitisha mashitaka pasi na kuacha shaka.

Akitoa adhabu, Hakimu Mkeha alisema kila mshitakiwa katika shitaka la kwanza hadi la nne kwa kila kosa, atalipa faini ya sh. milioni tano, akishindwa atakwenda jela miaka mitatu.

Hakimu Mkeha alisema, kesi hiyo ilikuwa na washitakiwa watatu, akiwemo Mkurugenzi Mkuu wa Tan Trade, ambaye alifariki dunia wakati shahidi wa kwanza alipotoa ushahidi.

Washitakiwa hao baada ya kupewa adhabu hiyo, walipelekwa gerezani kutokana na kushindwa kulipa faini, ambapo jana, alionekana mahakamani hapo ndugu wa Judith, akiwa ameleta risiti aliyolipia faini ya sh. milioni 20.

Kwa mujibu wa hati ya mashitaka, washitakiwa hao wanadaiwa kati ya Septemba, 2007 na Julai, 2008, katika makao makuu ya Tan Trade, yaliyoko wilayani  Temeke, Dar es Salaam, walitumia madaraka yao vibaya kwa kuagiza gari lililotumika kinyume cha Sheria ya Manunuzi ya Umma, hivyo kusababisha AL Hamadi Motors FZD kupata faida ya sh. 34,895,400.

Pia, walikuwa wakidaiwa tarehe hiyo na mahali hapo, walitumia madaraka yao vibaya kwa kununua gari lililotumika kwa lengo la kumnufaisha Humer Stars sh. 32,773,475.

Washitakiwa hao walikuwa wakidaiwa bila kufuata utaratibu wa kushindanisha zabuni, waliagiza gari lililotumika na kusababisha AL Hamad kupata faida ya sh. 34,895,400.

Shitaka la nne, walikuwa wakidaiwa kukunua magari hayo bila ya kufuata utaratibu wa zabuni.

Shitaka la tano lililokuwa likiwakabili washitakiwa hao ambalo mahakama iliwaachia huru, walikuwa wakidaiwa kutumia madaraka yao vibaya, uzembe na kumsababishia mwajiri wao kupata hasara ya sh. 49,145,855.05.